الصيف بدء و اخواتي و القطة هنا و ماما جاية بعد يومين ان شاء الله
بحاول ألم الحتت المتكسرة جوايا عشان مفيش حاجة تبان عليا
حرام البني آدمة اللي تعبت عليا سنين و سنين تشوفني كده
النهاردة خواتي قاعدين يشتروا حاجات للبحر
بونيهات , مايوهات , طيارات
و حاجات هبلة كتير من بتاعت التصييف
افتكرت أيام زمان لما كنت في أولى ابتدائي
قعدت سنة بحالها أحوش فلوسي في الحصالة
ليه بقا ؟؟
كان نفسي أشتري صنارة صيد بتاعت المحترفين دي
كنت متأثرة قوي من رامي الصياد الصغير
كرتون مشهور ساعتها
كانت أمنية حياتي و نوعا ما مازالت
بعد ما حوشت و خلاص الحصالة اتملت
فتحتها لقيت فيها 12 دينار
زي 120 جنيه ساعتها مش 240 زي دلوقتي :(
120جنيه في سنة 96 كان مبلغ و قدره
بصراحة لواحدة في أولى ابتدائي
طايرة لمحل الأدوات البحرية
و فاكرة ان الصنارة كانت تقريبا سعرها قريب من المبلغ ده
دخلت و بجري على الصنارة
قبلها بالضبط كان فيه ايه ؟
كان فيه حمام سباحة على شكل نمر كبير
و فيه كور ملونة
بصيت للصنارة
و النمر
صنارة
نمر
حاجة نفسي فيها
و حاجة عايزة أجربها
قعدت افكر
و كأي طفلة بريئة فكرت أنط لماما أشوفها تجيبلي النمر فأشتري أنا الصنارة
قالتلي لأ انتي حوشتي الفلوس دي عشان تشتري ايه ؟؟
كان ردي : اممممممممممم
النمر , عايزة حمام السباحة النمر
و اشتريت و لعبت بيه كذا سنة ورى بعض
بس لغاية دلوقتي بسئل نفسي حاجة
أنا ليه ما اشتريتش الحاجة اللي كنت عايزاها ساعتها ؟؟
و دلوقتي تمن الصنارة متوفر معايا عادي
ده تمنها ممكن يكون أقل من الفلوس اللي برميها في
وجبة بره أو خروجة ملهاش لازمة
طب ليه برضه مش بشتريها ؟؟
هل فيه حاجات جوه نفسيتنا
بنبقى عايزينها و مش عايزينها ؟؟
بنبقى بنفكر فيها من باب التفكير فيها و خلاص ؟؟
هل ممكن لو رحت اشتريتها دلوقتي تفضل في علبتها و ما تتطلعش منها ؟
يبقا أنا حرمت حد تاني من انه يشتريها
و حرمت نفسي من اني اشتري حاجة تانية بدالها ؟؟
احنا ليه مش عارفين احنا عايزين ايه ؟؟
إزاي نرضى على نفسنا اننا نتعلق بحاجة متحرمة علينا ؟؟
و في نفس الوقت نعلق غيرنا و احنا محرمينه على نفسنا ؟؟
ليه ما نقفش وقفة لثواني و نقول
احنا عايزين من الدنيا كذا و كذا
و نبطل نتعب نفسنا و نتعب غيرنا
