حاجات في 2011

قاعدة بفكر كده 

إيه اللي نفسي أعمله في 2011 إن شاء الله

أكيد حاجات كتير

زي ما عملت السنة اللي فاتت لستة قررت السنة دي كمان إن شاء الله أعمل لستة

و لو ربنا إداني العمر ل 2012 إن شاء الله حشوف إيه اللي عرفت أعمله منها

1- نفسي أقرب من ربنا أكتر و ما أعملش حاجة تغضبه أبدا و ما اكتفيش بالفروض اللي عليا و أقول كده حلو , 

 لأ أعمل اللي أقدر عليه إن شاء الله عشان أنا مفهوم إن الواحد مش ضامن عمره كان ضايع من عندي حبتين

ابتديت أفهمه بقالي فترة و فعلا فيه حاجات غلط كتير لازم تقف و حاجات عايزة تتطور و حاجات عايزة تتعمل

فربنا يوفقني إن شاء الله و يهديني لطاعته

2-  أخد كل كورسات معهد دراسات السلام إن شاء الله بتاعت الصيف الجاي

3-  أرفع من معدلي في الكلية إن شاء الله

4- عايزة أريح مامتي و أعملها كل اللي نفسها فيه و نفسي أشوفها مبسوطة على طووووول

5- عايزة أخس :( اهيء اهيء اهيء , فعلا أنا تخنت من أول ما الشتا بدأ , إن شاء الله عايزة أعدل من نظام أكلي و أعمل رياضة

6- إن شاء الله أتجرأ و أسوق في شوارع الإسكندرية ربنا يستر يا رب

7- عايزة مستوايا في شغلي التطوعي يزيد إن شاء الله

8- فيه حاجة كده مش حكتبها بس ححطلها كود عشان ما أنساش " السيوف " 

9- عايزة أتعلم إسباني إن شاء الله

10 - ناوية إن شاء الله إن شاء الله أخد التويفل

11- ححاول إن شاء الله أقرى كل شهر كتاب

مش عارفة مش جاي في بالي حاجة تانية اعتقد هو ده كل اللي نفسي أعمله إن شاء الله في السنة الجديدة

ربنا يجعلها سنة جميلة على الكل يا رب و يقربنا لطاعته فيها و يسهلنا أمورنا و يوفقنا يا رب

دعاء

دعاء جميل قريته حبيت أبتدي بيه السنة الجديدة 

"  

اللهُم إني أستودعك سنة مضت من عمري بأن تغفرها لي ، و ترحمني و تعفو عني وان تُبارك لي في أيامي القادِمه،وتصلح نفسي و تُيسر أمري، يارب لا تفجعني بفقد أحدفلا طَاقـۃ لي لفقد الاحبـۃ ربي إحفظ لي منْ حولي و لا تحرمني قريبْ و لا بعيد

"  

2010 مع ألف سلامة

مش مصدقة إني بقالي 48 ساعة ما فتحتش فيس بوك و لا بلوج و لا حتى من الموبايل

كانوا يومين مليانين بشكل مش طبيعي لدرجة إني ما جاش على بالي أدخل على النت و لو خمس دقايق

معرفش هل ده مؤشر على إن إدمان النت بتاعي له علاج ؟ و لا ايه بالضبط ؟

المهم

فاضل كام ساعة و 2010 تخلص إن شاء الله

مش عارفة أوصف السنة دي بحاجة معينة

هي سنة مريبة بصراحة

اتعلمت فيها كتير 

شفت فيها كتير

بقيت أقوى و أنشف من زمان 

يعني الحمد لله فعلا

بس بجد بقول ل2010 

مع ألف سلامة و إن شاء الله السنة الجديدة حتكون أحلى منها بكتير

سبحانك يا ربي

سبحان مغير الأحوال

معرفش مالي

إذ فجأةً أنا متفائلة

ربنا يقدم اللي فيه الخير يا رب 

:)

فرصة

أيامها كلها غريبة 

لم تعد تفرق بين أحلامها و يقظتها

جاءها خبر عادة ما يفرح الفتيات في سنها

رفعت سماعة الهاتف عندما أخبرتها إحدى معارف والدتها بأن أحدهم ينوي التقدم لها

لم تعرف بما ترد , نزل عليها الخبر كالصاعقة 

لطالما كانت مختلفة عن غيرها

انتقائية عنيدة لا يعجبها العجب

لكنها لم تجد إجابة سوى أنها لا تدري

تستمع لمواصفاته الإجتماعية و الثقافية و خلفيته الأسرية 

كثير منها يتفق مع ذوقها في الرجال

لكنها لطالمت أمنت بأن الزواج بهذه الطريقة زواج غير آدمي

اثنان يلتقيان فيعجبها وجوه يرونها و ثياب يرتدونها و أذواق تظهر من خلال حركات و تصرفات

لطالما أرادت أن تتزوج بعد قصة حب هادئة جميلة

لطالما أرادت أن يكون بيت الزوجية مكانا يجمعها بشخص أحبته و أحبها

ليس بشخص لا تعرف عنه سوى الطفيف من الأمور 

تتردد و ترفض تماما حتى الفكرة 

لكنها تعود و تفكر

طوال سنوات انتظارها

هل وجدت من يحبها فعلا ؟

هل الحب حق مشروع للجميع ؟؟

ماذا لو انتظرت و انتظرت و انتظرت و لم يأتها ؟

شردت ثواني

تخيلت الحب كأي شيء في العالم , كالمال و الرزق و الأطفال و غيرها

يأتي لأشخاص دون سابق إنذار

و يحرم منه أشخاص مهما انتظروه و مهما أخلصوا له

إذا ما الذي يضمن لها أي النوعين هي ؟؟

تدرك أنها مختلفة , طباعها غريبة 

حساسة في مشاعرها

رومانسية في أفكارها

تدرك أنها تستحق أن ترتبط بشخص يرى ما بداخلها أكثر من رؤيته لوجه يعجبه أو جسد سيفنيه الزمن

هذا ما تمنته طوال حياتها , شخص يعرفها حقا و لا يستطيع العيش بدونها

لتكون له أما و أختا و حبيبة و ابنة و زوجة و كل شيء يمكنها فعله له

لكن ذلك الشخص قد يكون موجودا في خيالها فقط

قد تخونها خيالاتها المفرطة فتجد نفسها وحيدة في نهاية المطاف

في طريقها لدراستها كل يوم تنظر لسور البحر

جل ما تتمناه شخص يسير بجانبها و هي تسير فوق السور و تضحك

إن زلت قدمها و سقطت سيلتقطها و يحافظ عليها من أي مكروه

آلاف الرواسب بداخل قلبها

آلاف المخاوف

لا تدري لما تريد البكاء 

تتألم كثيرا و هي تقول لوالدتها 

" حسنا سأعطي الأمر فرصة " 

ماضي

لا تدري ماذا تفعل

فمهما بدت مشاكلها كبيرة

إلا أنها تجد ما هو أكبر منها

تجد دوما ما يزيد همها أضعافا مضاعفة

ذلك الإنسان الذي دمر حياتها

تحاول دوما نسيانه و اعتباره غير موجود

لكنها تتذكر أنه من لحمها و دمها

فإن تجاهلت تلك الحقيقة 

كيف تتجاهل صلة القرابة التي تجمعها به ؟

لم تظن أنها تكره أحدا في حياتها

و لم تفكر بالأذى لأحدهم من قبل

لكنها تدرك بعد تفكير طويل أنها تتمنى اختفائه من الحياة كلها

فموته سيكون أفضل من وجوده 

على الأقل لن يبقى لديها أي أمال بأن حاله سينصلح فيحطمها

ستفقد الأمل و ترتاح تماما

لطالما كان أملها في الناس كبيرا

تعلق أحلاما كثيرة عليهم 

يتسائل الكثيرون لما هي طيبة ؟

لما تسعى لإسعاد غيرها دوما ؟

لا يعلمون الحقيقة 

فهي ليست طيبة و لا ملاك من السماء

كل ما تريده هو رؤية السعادة في وجوه الآخرين

لأنها عجزت أن تسعد نفسها

حاولت كثيرا معرفة العيب و المشكلة

حتى أدركت تماما أن العيب ليس فيها

فهي لم تقترف ذنبا في أن تكون ابنة فلان

و لم تخطئ عندما فكرت في أشخاص قد تجد سعادتها معهم

كل ما فعلته أنها وثقت في غيرها 

تحتار و لا تعرف أين الطريق الصحيح

كلما وقعت في مشكلة أدركت أن الماضي أكبر مشاكلها

تتمنى في كثير من الأوقات أن تنسى 

لكن هذا لا يحدث

تنسى كل شيء

تنسى أن تأكل أحيانا

لكن مشكلة واحدة كفيلة بجعلها تبكي طوال الليل على كل ما رأته في حياتها

تحاول حبس دموعها كثيرا

تكبتها جيدا

لكن ارتجافها في فراشها في منتصف الليل يفضحها

حتى لحظات السعادة لم تعد تستمتع بها 

لأنها تدرك جيدا أنها لن تدوم طويلا

أصبحت متشائمة سوداوية غريبة

حتى المقربون منها بدؤوا لا يفهمون تصرفاتها العدوانية مؤخرا

ربما تحاول الدفاع عن ما تبقى من روح بشرية بداخلها

لا تدري

لطالما كانت تخبر نفسها أن القادم سيكون أفضل 

و لطالما كانت تثق في أن من تعذب طوال حياته يجب أن يرى السعادة في مستقبله

فهل هذا صحيح ؟

أم أن من يولد تعيسا يموت تعيسا ؟

مواصفات العريس المثالي

كنت قاعدة مع اتنين صحباتي

لقيتهم بيتكلموا في مواصفات العرسان و كده

جت واحدة كمان

فقعدنا أربعة من خيرة عقول بنات مصر  المفكرة و المدبرة على طربيزة واحدة

طلعت ورقة و قلم و قلتلهم اكتبوا اللي في نفسكم و حنعمل اللستة دي و حنشوف العريس ده هل العلم الحديث توصل له ؟ و لا لسه؟

ملحوظة : ده مش كلامي خالص ده كلام صحابي و أنا ملخصاه فقط :)
( بس النقطة رقم 27 بتاعتي , أكيد باين من هبلها ههههههه )

1- يكون ابن ناس و محترم و ده حيبان من لبسه و أسلوبه

2- ميكونش شكاك و غيور

3- ميكونش عصبي و متهور و لا لسانه طويل

4-يكون طيب و حنين و ده حيبان في عينيه

5- يكون من نفس مستواكي على الأقل

6- ميكونش خبيث و لئيم ( المناسبة مش فاهمة ايه الفرق بين الخبث و اللؤم )

7- ميكونش بخيل

8- ما يكونش أكبر من 27 سنة عشان ك ما كبروا كل ما دماغهم اتهبلت

9- ما يكونش من الأكاديمية ( دي جامعتي ) 

10- ياريت يكون يتيم و مقطوع من شجرة

11- يايرت أخته ما تعملش نفيها خماتك و لو تتطلع خرساء عمياء يبقى خير و بركة

12- ريحته تكون حلوة و بيستخدم بيرفيوم black XS 

13- عليه الرمق

14- حبذا لو كان برج الجدي

15- إذا كان من برج الحمل أو العقرب فالحذر واجب لأن الحمل محتاج معاملة خاصة و العقرب غدار

16- يكون جذاب , مش شرط حلو بس جذاب ( الله أعلم ده إزاي يعني )

17- يكون فاضيلي 24 ساعة بس في نفس الوقت بيعمل في وظيفة مرموقة ( يعني من الآخر بياخد راتب حرام عشان مش بيعمل حاجة غير إنه يكلمني )

18- أكون كل حياته و كل البنات يشوفها وحشة ما عدا أنا

19- ما يكونش أهبل و لا بريالة

20 - ما يكونش خرع

21- ما يكونش لكاك

22- يكون معاه عربية حلوة

23- يكون لابس ساعة ماركة

24- و أهم حاجة الشوز بتاعته 

25- شخصيته قوية و مش بتاع مامته

26 - رومانسي 

27- بيحب الهدايا و الدباديب و الحاجات الكميلة المقطقطة

28- على طول لسانه حلو و بيقول كلام حلو كتير

29- ممشوق القوام

30- مالوش في الصنف و المكيفات

31- مش بيدخن

32- بيستحمى و بيغسل سنانه

33- بيعرف يسبل , بس ليا لوحدي

34- يكون شرابه لايق على جزمته و الطقم

35-  شرابه ريحته فواحة جميلة عطرة ( على أساس حشم رجله )

36- يكون بيعرف يطبخ و يغسل و يكنس و يمسح عشان لما أتعب طبعا مش عشان حاجة تانية

37- يعاملني على إني ملكة و يجيبلي كل اللي أنا عايزاه

38- يقيد صوابعه العشرة شمع عشاني

39- على استعداد يربي العيال

الصفة رقم أربعين هي : 

يكون باباه حرامي عشان يجيب كل الحاجات اللي مكتوبة دي

و يكون ممثل شاطر عشان يعرف يمثل إن كل الحنان و الطيبة و الصفات الحلوة دي موجودة فيه قبل ما تدبسي يا حلوة في الجوازة

ta3wera

حبيت بس أسجل حقوق براءة إختراع التعوير بالبيتزا 

نقدم لكم أول إنسانة تعورها البيتزا 

أيوة البيتزا عملتي نزيف 

اهيء اهيء اهيء

سخنت البيتزا و قرمشت أطرافها

طرفها بقا ناشف

ماما بتقولي بطلي طفاسة بقا مش كويس على صحتك

و أنا أقولها لأ عادي و يا دوب بدخل البيتزاية في بوئي

لااااااااااااااااااااااااااااااااااااااااااااا

دخل حرف البيتزاية تحت لساني

شايفين الحتة الطرية اللي تحت لسانكم دي الطرية اللي مالهاش لازمة ؟

أيوة بالضبط ورمت و نزفت و اتنيلت :( 

عاااااااااااااااااااا

أروح للدكتور أقوله ايه ؟؟

عورت نفسي بالبيتزا ؟؟

أروح الصيدلية أقول ايه ؟ عايزة بلاستر للجروح تحت اللسان ؟

D:

 “To forgive is to set a prisoner free and discover that the prisoner was you.”

ملاك و لكن ؟

يقفان في ممر بارد , أصوات الأقدام على السلالم تعلو المكان

تضغط على قلمها اللعبة , ينظر لها قائلا  : " توقفي عن كونك ملاكا , فعلا , أنا أتحدث لمصلحتك , توقفي عن لعب دور الملاك , أنتي بشر , أقسم لك أنتي بشر لستي ملاكا "

نظرت له حائرة , هل تفرح بوصفه لها بالملاك ؟ أم تغضب من لهجته معها ؟ أم تحزن على حالها ؟

تلعب في خاتمها و تنظر لحذائها لا تعرف ماذا تقول

أكمل كلامه " اغضبي , إحزني , لومي من يخطئ في حقك , أظهري أي مشاعر سلبية تجاه الآخرين  كيف يخطئ فيكي أحدهم و تبتسمين في وجهه , أريد أن أفهم ؟ "

ابتسمت و لم ترد

نظر لها " لا فعلا طفح الكيل , أنت غير طبيعية "

سئلته " ما بك ؟ ما المشكلة إن كنت لا أعرف كيف أغضب من أحد أو أحزن أو أن أثير شجارا ؟؟ "

رد عليها و هو يكاد أن يكسر القلم الذي في يده " كيف يتحدث عنك أحدهم بالسوء و يصفك بأسوء الألفاظ و تذهبين تخففين عنه حزنه عندما رأيته واقفا منكسرا ؟ كيف ؟ أخبريني ؟ لماذا لم تتركيه و تذهبي ؟ أجيبي "

أخرجت رأسها من النافذة و اتكئت عليها و هي تقول له

" رأيت في دنياي أنه لم يخطئ أحدهم في حقي إلا و اعتذر لي في أحد الأيام ,

   لم يظلمني أحدهم إلا و طلب مني أن أسامحه

   لم يتحدث عني أحدهم بالسوء في ظهري إلا و ندم على فعلته بعدها

   لم يؤذيني أحدهم إلا و أخذ الله لي حقي منه يوما "

لم يرد عليها و هي لم تنظر له , بقيت متكئة رأسها خارج النافذة و أكملت كلامها

" لم أعتد أن أغضب , لم أعتد أن أحزن , لم أعتد أن أكره أحدهم ,

  اعتدت أن الحقيقة تظهر دوما و أنه إن عاملنا الناس بالخير و أحببناهم مهما ظلمونا

  فسيأتي اليوم الذي يدركون مدى خطئهم

  اليوم الذي يندمون فيه على أي شيء فعلوه معنا

   اليوم الذي يجعلهم يكرهون أنفسهم أحيانا على أفعالهم أو يصلحون ما فعلوه في أحيان آخرى "

صمت قليلا ثم قال لها : " ربما أنتِ ملاك حقا , خسارة أنتي في هذا العالم "

تتنهد و لا ترد

تعرف أن الكثير أخطئوا في حقها

و تعرف أن الكثير يتمنون قربها

و تعرف أنها ستقابل عشرات سيظلمونها

و عشرات سيخونوناها في ظهرها و يتحدثون عنها

لكنها لا تعرف

هل ستقابل من سيحافظ عليها حقا ؟

من سيعتني بها ؟

 من سيقدرها و يتمنى أن لا يتنفس إلا شذى عطرها ؟

من لا يضطرها للإبتسام في وجهه رغم ألمها من الداخل 

لأنه  ببساطة سيضمها لصدره حتى تبكي و ترتاح

غتاتة

همممم

في حاجة مريبة بتحصل بقالها فترة

كل شوية واحد يدخل البلوج يقراله كام موضوع و فجأة يفتكر أو تفتكر نفسهم خبراء في حياتي

أنا مش بكتب هنا عشان كل ما أخرج و لا أقعد مع صحابي ألاقي حد يعلقلي على بوست

و لا بكتب عشان الناس تتابع حياتي

أنا بكتب عشان بحب أكتب

و عشان بفضفض

و عشان يمكن حد يستفيد من تجربة بقولها أو قصة بحكيها

أما البرود اللي شايفاه بيحصل بقاله فترة ده بجد بيخليني أفكر أعمل مدونة جديدة 

لأني بقالي كام يوم مش عارفة أخد راحتي في الكتابة

فبجد كفاية غتاتة و اللي عايز يعرف حاجة عني ييجي يسئلني في وشي مش لازم لف و دوران

بجد فعلا مرارتي اتفقعت و مش مستحملة 

الهبل في الجبل

عرفته من كام أسبوع تقريبا

استغربت إنه من أول مرة شافني فيها 

حاول بكل الطرق يلفت نظري

أنا شفته تقريبا خمس ست مرات بالكتير لغاية دلوقتي

كل مرة فيهم كان بيبذل مجهود خرافي عشان يثبتلي أي حاجة

كلام حلو بالهبل و من اللي يحبه قلبك

نظرات بلهاء خرقاء بالعبيط

هزار على الفاضية و المليانة

و رسم 

رسم إيه بتقولولي ؟؟

بيرسم عليا

" أنا عشت في ألمانيا نص عمري " 

" أنا بابا دبلوماسي كبير و ماما من عيلة معرفش مين " 

" أنا مهندس و محامي بس شهادة الهندسة مش معترف بيها عشان من ألمانيا " 

كان ناقص يقولي إنه بيطير بليل و بينور في الضلمة و شاف سلاحف النينجا مرتين قبل كده وجها لوجه

الواد ممكن يعجب أي حد بصراحة

أي واحدة هبلة كلمتين من دول حتقع من طولها و تغني بالأحضان يا بلادنا بالأحضان

طبعا صحبتكم شكاكة , غلباوية , مريضة نفسيا

مش اي حد حييجي يتحنجل و يقولي كلمتين حلوين حفرح بيه

جا النهاردة بنية إنه يلزق

قلتله تعالا عايزاك تتعرف على واحدة صحبتي

عرفته عليها , بنوتة جميلة بحبها, تعليمها ألماني و مخها كبير ما شاء الله

و قلتلها إنه كان عايش في ألمانيا

و هنا اتضحت الفضيحة 

حاولت معاه عشان ينطق كلمة واحدة ألماني ما نطقش

و فضل يهبل

وشه بقا أحمر

و منظره بقا غريب

و آخر ما اتحرج إنه صوته علا بيقولها " إيه المشكلة أنا عشت هناك بس ما كنتش بنزل الشارع " 

يا حبيب ماما

!!!

المصيبة بقا

إنه فضل لازقلي باقي اليوم

طب يعني للدرجة دي فاكرني هبلة ؟؟

و لا عشان ضحكتي طفولية و حركاتي عبيطة يبقا فيه سندويتش همبرجر في جمجمتي مش مخ ؟؟

اتخنقت شوية لأني معرفتش الأشكال دي بتتحدف عليا منين ؟

و لا أنا بجذبهم ليه ؟

بس الحمد لله إنه رازقني عقل كبير بعرف أدافع بيه عن نفسي

بقول للناس نظفوا قلوبكم و عقولكم بقا

و بطلوا الشهوانية المقززة اللي إنتم فيها دي

كل واحدة شكلها حلو شوية و لا كويسة

الولاد يتهبلوا عليها و يعملوا أفلام و تمثليات عشان يلفتوا نظرها ؟؟

طب و آخرتها ؟

قلوب بتتكسر و تتجرح

قصص كتير بتنتهي نهايات سودة

طب ليه ؟؟

ليه مش بنحترم ثقافة الحب ؟؟

ليه مش بنسعى لإننا نحب و نتحب بجد ؟

ليه لسه فيه ناس بتكدب عشان ترتبط و لا تتحنجل ؟

يعني علاقات مبنية على الكذب حتبقا آخرتها إيه ؟؟

إيه القرف ده بجد ؟

حساب 2010

بما إننا في شهر 12 

الشهر اللي بنبتدي نحاسب فيه نفسنا

بنشوف حققنا إيه ؟

عملنا إيه طول السنة 

السنة اللي فاتت كتبت لستة بالحاجات اللي عايزة أعملها في 2010

اضغط هنا لقراءة الموضوع

فتحت كده و اتبسطت جدا جدا جدا إن تقريبا 90% من الحاجات اللي في اللستة اتعملت 

لو خدناها واحدة واحدة كده 

1- ثقتي في الناس زادت الحمد لله , ما بقيتش بتكسف أوي زي الأول أو على الأقل كسوفي بقا له معنى مش على الفاضية و المليانة

2- ما خليتش حد يوقع على عريضة الأمان و الأخوة و دي محدش له دعوة هيا إيه :)

3- الحمد لله قراراتي خدتها لوحدي و اتحملت نتايجها , الوحش خدت على دماغي و الحلو الحمد لله ربنا كرمني فيه

4- بدأت أناقش مشاكلي فيس تو فيس فعلا , و بقيت برتاح في الطريقة دي أكتر من طرق التلميح و الشات و الرسايل

5- فكرت في قرار التخصص و خدته بعد تفكير استمر أربع شهور الصيف كلها و الحمد لله ربنا وفقني في الموضوع ده

6- كبرت جدا في شغلي الحمد و عملت حاجات كتير كويسة في السنة دي

7-  speck London very best loooooooooooooooooll
P:
اتجرأت أخيرا و بقيت أتكلم انجلش و لا يهمني أتخن تخين 

8- موضوع تفتيح عنيا ده مش عارفة , قراراتي نوعا ما لسه بطيئة شوية و فيها أخطاء , يعني دي فلتت مني

9- موضوع الخوف من الإرتباط ده مش بإيدي , مفيش حد كويس ظهر في حياتي من أصله و انا اللي قلت لأ

لما ألاقي الإنسان اللي أبقى متأكدة إنه يستهال أئتمنوا على نفسي حوافق إن شاء الله , غير كده مش حرتبط مهما حصل 

10-الحمد لله أنا بقيت واخدة بالي من فلوسي أكتر بكتير من الأول , بدل البنك اللي كان مفتوح للجميع ده 

صحيح لسه عبيطة شوية بس حفاجئكم بحاجة قريب إن شاء الله حتقولوا البنت دي سوسة 

11- موضوع إني اعامل الناس بالمثل ده فشلت فيه فشل ذريععععععع ,

أصل لو حعامل كل الناس بالمثل ححرق نص اللي أعرفهم بالضبط

12- الحساسية مش عارفة هيا خفت نوعا ما بس مش قوي , لسه برضه عايزة تخف أكتر من كده

يعني عموما بالنسبة للي كنت عايزة أحققه خلال سنة فالحمد لله دي تعتبر نتيجة كويسة جدا 

يلا كله يطلع ورقة و قلم

و يفكر هي السنة دي اتحسبت في حياته ؟؟

و لا سبتوها تعدي من غير ما تعملوا فيها حاجة ؟