إزيكم ؟؟؟؟؟؟؟؟
وحشتوني خالص
معلش أنا عارفة إني مش بكتب من فترة
بس كنت مشغولة في حاجات كتير
جا على بالي النهاردة سؤال
و هو إذا كان في إيدي أرجع بالزمن لأي وقت أنا عايزاه من حياتي
و أكمل من بعده
حختار أي سنة بالضبط ؟
هل حختار الإبتدائي ؟
أرجع طفلة كل همي الألعاب و الأتاري و السيجا و الكرتون ؟
ما أنا لسه بلعب بكل ده أصلا و أنا طول الباب ههههههه
طب ما ساعتها حبقا أذكى صحابي بقا و الأولى على مدرستي
و كل حاجة ضايقتني قبل كده حتجنبها
مش مستاهلة برضه
طب أرجع لموقف معين أصححه ؟
أرجع لإحساس حسيته و أمنعه ؟
أو أرجع لحد معرفتش أخد حقي منه و أخده ؟
ما لقتش حاجة معينة نفسي أصححها
في حاجات كتير في حياتنا حصلتنا
ظلم أتظلمناه
حق ما أخدناهوش
كلام إتقال علينا
ناس ضحكوا على عقولنا و قلوبنا
ناس لعبوا بمشاعرنا و جرحونا
ناس خانوا صداقتنا
حنلاقي و لا مليون حاجة كان نفسنا نقولها في يوم
و ما قلناهاش
فكرت كده
يمكن كل اللي حصل قبل كده
مهما كان وحش أو حلو
هو سبب اللي أنا فيه دلوقتي
كل موقف بيعدي على البني آدم
سبب في تكوين شخصيته الموجودة حاليا
كل حتة منك بتكون بسبب حاجة حصلتلك
حاجة سمعتها , حستها أو كنت عايزها
عشان كده رأيي إن اللي فات لازم يتنسى
نعيش على أمل إن بكرة أحسن إن شاء الله
