الدنيا ربيـــع

الدنيا ربيع و الجو بديع

قفلي على كل المواضيع

قفل قفل قفل قفل

مفيناش كاني مفيناش ماني

كاني ماني ايه

دا الدنيا ربيع

الدنيا ربيع الدنيا ربيع

الشجر الناشف بقا ورور

و الطير بقا لعبي و متهور

واحنا هنفرفش امتى امال

دلوقتي والا في سبتمبر

قالك قالك قالك ايه

قالك اه

قالك قالك قالك ايه

قالك اه

قالك فرفشة اليومي

متأجلهاش للغد

و اللي هنظبته مهموم

راح نزعل منه بجد

الدنيا ربيع و الجو بديع

قفلي على كل المواضيع

قفل قفل قفل قفل

مفيناش كاني مفيناش ماني

كاني ماني ايه دا الدنيا ربيع

الدنيا ربيع الدنيا ربيع

يلا مباراة يلا مسابقة

مين اشطر في الضحكة الرايقة

ابو دم خفيف

طبعاً يكسب

و ابو دم تقيل

طبعاً لأ

الورد مفتح شوفوا شوفوا

بيرقص و يداري كسوفه

واللي يحب النبي ياخوانا

عالواحده يصقف بكفوفه

لالالاه لاه لا لا

لالالا لا ولا لا

قالك قالك قالك ايه

قالك اه

قالك قالك قالك ايه

قالك اه

قالك وصفة بلدية

للصحة و طولة العمر

خد شمس و هوا على ميا

بلا دوا بلا عيا بلامر

والدنيا ربيع و الجو بديع

قفلي على كل المواضيع

قفل قفل قفل قفل

مفيناش كاني مفيناش ماني

كاني ماني ايه دا الدنيا ربيع

الدنيا ربيع الدنيا ربيع

كلمات .. مجرد .. كلمات

دي الكلمات اللي كتبتها من سنة تقريبا عشان مجلة كنت بكتب فيها
حبيت أعرضها عليكم عشان عجبت كتير من صحابي
علما بإنها مجرد تأليف و تخريف ,
 ياريت أصلا يبقى فيه حد ممكن تحس بالحاجات دي ناحيته

حبيبي قد تخونني الكلمات في التعبير عن حبي لك

 

بسيطة أنا في نظراتي , تعرفني و تعرف قلة حيلتي

احترت في عشقك , هل هو مستمر أم إلى القاع منتهي

 

ترتجف مشاعري و تختبأ حين تراك خوفا من أن تشعر بها أو أن تصلك رغما عني

 

أختبئ في ثياب من لا تهتم بك حتى أريحك و أرتاح

 

سعادتك أكبر همي , فرؤية الإبتسامة على وجهك هو ما ينير بقية يومي

 

تتراكم الهموم و المشاكل فلا تراني سوى سعيدة و مبتسمة حتى لا تحزن لأجلي أو أشغل بالك

أدعو خالقي أن يهديك إلى طريق السعادة فتقترب منه و تشرب من ينابيعه

اطمئن على أحوالك دون أن أشعرك فلا تدرك ما قصتي معك و ما حالي

 

يتوقف فؤادي عن النبض لثواني إذا شعرت أن مكروها أصابك

 

و لا أرتاح حتى أسمع الخير عنك فتقر عيني و تهدأ

إذا أغمضتها رأيتك تبتسم , تضحك , تتضايق هذا و تداعب ذاك

 

فلا تغيب صورتك عن خيالي

 

إذا استسلمت للنوم فإنك لا تفارقني في احلامي

 

فأدرك أن ما تجاهلته في الصباح لن أهرب منه في نومي

 

لكني عندما أستيقظ أعود لأرض الواقع و أدرك أن ما هدمته يداي لن يصلحه الزمن

 

و أنه مهما بلغ حبي و عشقي لك فإنه لا يساوي شيئا مقابل محاولاتك معي و صدي المستمر لك

تدرك طبيعتي و خجلي فتستحي مني و تبتعد

و أدرك الخير بداخلك و طيبة قلبك و صفاء نيتك فتجدني منك أقترب

تتلاعب بنا الأقدار و الأيام فلا نعود نعلم ما يحدث لنا

 

و نستيقظ فجأة و قد اختفى أحدنا من حياة الآخر ربما للأبد و ربما لا

لكن الحقيقة أن شيئا بداخلنا قد يكون مصيره الموت

 

فلا سبيل لإعادته إلا بكلمة قد تقال و قد لا تقال

أسرار

فيه ناس حياتها مليانة بالأسرار بشكل مش طبيعي

ليهم حدود في خصوصيتهم واضحة ما ينفعش تعديها

من كام يوم شفت واحد كده من الناس اللي اتعرفت عليها جديد

كان مشغل خاصية البصمة على اللاب توب بتاعه

بصراحة استغربت , يعني معتقدش جوا اللاب الملفات الوزارية يعني ؟؟ و لا ايه ؟؟

بالنسبة ليا عمري ما حطيت باسوورد حتى على اللاب توب بتاعي

معنديش مانع إن أي حد يعرف أي حاجة من حياتي

مش شايفة في الموضوع مشكلة من الآخر

عندي واحدة صاحبتي متجوزة من كذا شهر

شفتها بمسك موبايلها لقيت عليه باسوورد فقلتلها يا روقانك حاطة ليه ؟ ايه الشلل ده ؟؟

قالتلي عادي أنا متعودة على كده

قلتلها و جوزك عارف الباسوورد طبعا

قالت لأ طبعا

أنا قلتلها و ساكت ؟ عادي عنده ؟؟

قالت آه احنا موافقين ان كل واحد يكون له الخصوصيات بتاعته

فكرت كده مع نفسي

حسيت إن الموضوع مش خصوصيات , أنا حسيته له علاقه بالثقة أكتر

أنا برمي الموبايل في إيد صحابي عادي , و لا عليه باسوورد و لا بطيخ

بسيب اللاب توب بره في المكتبة معاهم و ادخل عادي

حتى من يومين قلت لواحده صاحبتي تاخد اللاب معاها و هي مسافرة إذا ملحقتش تشتري واحد قبل ما تروح

إذا البني آدم واثق في اللي حواليه حيعيش مرتاح , مبسوط

بس لما كل واحد يحطلي بصمة , و باسوورد و بعد كده حتبقا بصمة العين و الصوت بالمرة

يبقى راحت فين الثقة بين الناس ؟؟ راحت فين الصداقة ؟؟ راح فين الحب ؟؟

لما يبقى اتنين متجوزين عايشين كده يبقا ايه اللي عيالهم حيتربوا عليه ؟ ايه اللي حيكبر في دماغهم ؟؟

طب مش الممنوع مرغوب ؟؟

ليه نسيب اللي قدامنا يفكروا فينا بشكل غلط و لو لثانية ؟؟

قبل ما تمنع حد يدخل حياتك

اسئل نفسك

ايه اللي انت مخبيه ؟؟

ايه اللي البنات عايزاه ؟

من كام يوم حصل موقف غريب شوية

واحد من صحابي اللي زي خواتي جدا سئلني : " ايه ده !!!! حصل ايه ؟؟؟ "

أنا لثواني سهمت كده و بعدين لقيته بيبص لظفري المكسور

فقلتله ده من الحفلة اتكسر , فاكر كنت حاطة بلاستر عليه

لقيته فاكر

استغربت شوية و في نفس الوقت عجبني الموقف

أفتكر قبل كده ان إيدي كانت مفكوكة و كنت حاطة دعامة عليها لمدة اسبوعين ,

كانت بتوجعني , لما كان أي حد بيشوفها كان بيقولي سلامتك و خلاص

بس لما حد معين افتكرته حياخد ساعتها ما أخدش باله منها خالص , كأنه مش شايفها

مفهمتش ليه

بالتفكير في الموقفين مع بعض فكرت

ايه اللي البنات عايزاه ؟؟

البنات عايزة حد ياخد بالها منه

عايزة حد يقولها كلتي ؟ شربتي ؟؟ عاملة ايه ؟؟

عايزة حد يواسيها و هي عيانة , يزعقلها لما ما تاخدش الدوا , يغلس عليها كل شوية لغاية ما تخف

عايزة حد يسئلها عملت ايه في شغلها , حد يتطمن عليها لما تطلع من الإمتحان أو من انترفيو

عايزة حد يجيبلها سلسلة هدية قلب تحط صورتهم فيها و
 تفضل لابساها قريبة من قلبها تفتكره بيها

عايزة تفتح شنطتها تلاقي وردة حمرا , رسالة صغننة مكتوب فيها أربع حروف بحبك

عايزة تنام و هي مستريحة انها مش حتموت من غير ما حد يحس بيه لأن فيه دايما حد بيتصل يتطمن عليها

عايزة حد يقولها خدي بالك من نفسك , تصبحي على خير , صباح الخير , صباحك سكر و عسل و قشطة كمان

عايزة حد مش بيشوف غيرها , حد بيحس نفسه و لا حاجة من غيرها , حد شاريها , حد بيعتبرها كل حاجة في حياته

عايزة حد تكون اختارته زي ما اختارها

حد يهتم بالتفاصيل الصغيرة في حياتها 


راجل معاها , يفتحلها باب , يعديها قبله ,
 ما سيبهاش تتعب و لا تشيل حاجة و هو جنبها


حد يتقي ربنا فيها و يساعدها في علاقتها مع ربنا

يصلي بيها , يدعيلها و يتابعها دايما

حد ما يخنقهاش و لا يقرفها


حد يغير عليها و يخاف بجد 


حد يحب اهتمامها مهما كان ممكن يعتبرها تافهه


حد يعتبرها بنته ساعات فيجبلها لعب و دباديب


و أخته ساعات فيطبب عليها


و أمه ساعات فيحترمها


و زوجته و حبيبته فيحافظ عليها

حد يكون بيحب يتكلم معاها , يشتكيلها همومه و تشكيله همومها

عايزة حد يحضنها بكلامه , بإهتمامه , بنظراته

عايزة حد يعرف يعتذرلها لو غلط , و يسامحها لما تغلط

يمكن تكون عايزة كتير

بس كل واحد من حقه يحلم

يعيش

يحب

نظرة نوعية

جالسة أمام شاشة اللاب توب منذ الصباح كلما كتبت شيئا أجد نفسي أضغط

Ctrl + A >> delete

لا أعرف لما كلما كتبت شيئا تخوفت و مسحته ثانية

أرى في موضوعاتي الكثير من الجرأة أحيانا و في آخرى أرى فيها الكثير من الخجل

الكثير من الإنفتاح و الإنغلاق في الآن نفسه

أخاف من حكم الناس علي من خلال كلماتي

أتسائل , هل فعلا يمكن أن تحكم على أحدهم من خلال ثيابه ؟؟ نظراته ؟؟ كلماته ؟؟ كتابته ؟؟

قالت لي صديقة لي ذات مرة

رغم أنك متمسكة بالكثير من التقاليد القديمة و العادات إلا إني اكتشفت من خلال حديث واحد معك إنك انسانة متفتحة بشكل لا يصدق

ابتسمت و لم أزد على ذلك في ردي و حاولت تغيير الموضوع

أدركت أن الإنسان بحاجة إلى أن يتكلم حتى يفهممه الآخرون

منذ سنوات قالت لي معلمتي كلمات أثرت فيا كثير

" صمت الشخص دليل على أحد هذان الشيئان : إما أن الشخص الصامت إنسان حكيم جدا , أو شخص أبله "

تناقشت معها يومها و تجادلت كثيرا , و لم نصل إلى نتيجة محققة

من خلال تعاملي مع الناس خلال تلك السنوات وجدت نسبة من الصحة في كلامها

أعاود و أسئل السؤال نفسه , هل الحكم على الإنسان من خلال أمر واحد ظاهر عليه أمر فيه من الصواب من شيء ؟؟

إجابتي أن هذا من أكبر الأخطاء التي يمكن أن يرتكبها الإنسان في حق نفسه

لأنك قد تضيع صداقات من أجمل الصداقات في حياتك بسبب نظرك لشكل من يتحدث إليك أو ثيابه أو شعره

يمكن أن تضيع حبا قد يكون حب العمر كله بسبب حكمك على انسان من خلال نظراته , طوله , ابتسامته

يمكن أن تضيع في حياتك فرصا لتعلم الجديد بسبب حكمك على أحدهم من خلال كتابته أو كلماته

أرى الحل دوما أن نعامل الناس بشكل عادل تماما

فتقسيمهم على أساس جنسهم أو طريقتهم في الحديث أو شكلهم فيه الكثير من الظلم

لماذا أحيانا نرى اثنان يحبان بعضهما لدرجة العشق رغم أن أحدهما لا يقارن شكلا بالآخر ؟؟

لأنهم تجاهلوا هذا الأمر و أدركوا تماما أن المهم هو ما في الداخل و الجوهر

لماذا أحيانا نرى صديقان من جنسان مختلفان يتعاملان مع بعضهما كأنهما من جنس واحد و كالإخوة و يخدمان بعضهما و يقفان لبعض في أحلك المواقف ؟؟

لأنهم تجاهلوا الحواجز اللذي يضعها المجتمع و احترموا الحدود التي بينهم

النظرة النوعية من المشاكل التي تواجهننا في حياتنا

أن ينظر إلينا أحدنا على أساس الجنس , الجنسية , الشكل , الكلام , الميول و الإتجاهات , حتى الثياب

من الأمور التي تثير الشفقة على صاحبها

دوما ما أتمنى أن أرى المجتمع خالي من تلك الفروق التي حلت محل التفرقة العرقية

أن تفرق بين الناس في عقلك أمر أسوء من ان تفرق بينهم على أساس العرق أو الدين

تذكر عندما ترى شخصا في المرة القادمة أنه انسان مثلك ,

فلا تضيع على نفسك فرصة التعرف عليه فقد يكون السبب في حياة أفضل و أجمل لك

دي مش رقابة دي خيبة

حاصل اليومين دول إن اللي بيستخدم الإنترنت بالموبيل مودم مش بيقدر يفتح برنامج سكايب

كل الناس فاكرة ان الموضوع مشكلة عندهم , أو حاجة تقنية خلاص

و اللي اكتشفوه إن الشركات منعت الموضوع ده !!!!!!!

احنا عايشين فين بالضبط عايزة أعرف ؟؟

لما يمنعوا وسيلة تواصل زي سكايب بين الناس ؟؟

بالذات ان الشعب المصري لازم بتلاقي في كل كام عيلة حد مهاجر و حد مسافر و حد بيدرس بره

يعني محتاجين كل طرق التواصل الممكنة بين البشر

و اللي كان برنامج زي ده بيوفرها ببساطة و يريح الناس من تكلفة المكالمات الدولية العالية

أما بقا اللي بيسئل عن السبب فاللي عرفته إنه عشان الإنتخابات و الرقابة عليها

و ان فيه تحركات و أحزاب و ناس كتيرة بتعمل شبكات سياسية و نقاشية على الإنترنت

و لما لقوا سياسة الإستخدام العادل مش نافعة و إن الناس بتقعد برضه و بتدفع و ما بيهماش

قرروا يحدوا من الموضوع بإنهم يراقبوا و يخففوا من قعدة الناس على اليو اس بي مودم

طيب ناويين بعد كده على ايه ؟؟

يقفلوا الفيس بوك و التويتر بالمرة ؟؟

و لا يقطعوا كابل الإنترنت كله و يريحوا نفسهم ؟؟

يلا بقا نرجع للقرون الوسطى و للحمام الزاجل عشان يرتاحوا

و الله لو عملوا ايه بالذي , الناس برضه بتعرف تتواصل و اللي عايز يعمل حاجة غلط بيعرف يعملها

ارحمونا بقا دي حاجة تخنق

السياحة

كنت في رحلة يومين للقاهرة

الرحلة التقليدية اللي كلنا بنروحها بدل المرة عشرة

نلف على الاهرامات , نتغدى , نروح الحسين بلا بلا بلا بلا

و أنا في أهرامات جات بنت صغيرة كده و محجبة بتحاول تبيع لصاحبتي ورق بردي من البايظ ده

فصاحبتي قالتلها لأ شكرا

جاتلي قلتلها ميرسي

لقيتها بصتلنا تقولنا انتم مصريين ؟؟

قلنالها آه

قالت آآآآآآه عشان كده و بصتلنا بقرف و مشت

أنا تنحت حبة كده , يعني مش للدرجة دي

لما يكون طفلة في السن ده مزروع في دماغها انها تنصب على الأجانب و تتجنب التعامل مع أهل بلدها

يبقى الوضع عامل إزاي ؟؟

المشكلة بقا ان صاحبتي باربي شعرها أصفر

و أنا لبسي طريقته خليجي شوية على مصري شيك

و معانا واحد صاحبنا فلسطيني

و اتنين صحابنا كوايتة

و غمازة حبيبتي مصرية

فشكلنا للأسف مغري للنصب جدا

اللي بييجي فاكر ان باربي أجنبية

و اللي بيجيني فاكرني هبلة من الخليج

و اللي بييجي لأبو طويلة نخلة و ينصب عليه فعلا

بجد ضغطي ارتفع

واحد فجأة طلعلنا  " أصورك يا باشا ؟؟

هات الكاميرا و حصورك يا باشا

طب يا باشا تجرب اللفة الفلسطيني يا باشا ؟؟

طب جربها ما تشتريهاش , جرب بس

تعالى حصورك و انت بتبوس أبو الهول يا باشا

يا باشا اقف هنا , لأ هناك يا باشا

باشا معاك موبايل بدل الكاميرا ؟؟

باشا تحب أصوركتاني يا باشا "

و مسك جو صاحبنا ساعة يصور فيه و يربط راسه غصب باللفة العربي القديمة

و بعدين مسك نخلة ساعة كمان و احنا قاعدين بنسيح

و تديله فلوس ما تديلوش هو لازق , خد منهم بتاع 50 جنيه و برضه لسه لازق خنقنا

و ما سبناش غير لما هربنا منه فعلا

و طول النهار على كده , سواء في الهرم في الحسين في اي حتة

بجد اتدايقت قوي

مفيش عربية تيجي تشيل الناس دي كلها تحدفهم في أي حتة ؟؟

مشوهين السياحة و مشوهين البلد

طب الحكومة , البوليس , هيئة الأثار , أي حد مسؤول

عاجبهم المنظر ؟؟

مفيش حد منهم حاول يستمتع قبل كده بمعالم بلده و معرفش ؟؟

أو حس انه مش عارف ياخد راحته و يتبسط ؟؟

بجد حالة صعبة

ظروف أمنية في المكتبة

امبارح كنت رايحة مع صحابي ندوة عن التدوين

كنت مبسوووووووووطة مووووووووت إني حشوف قدوتي الأولى في التدوين

دكتورة غادة عبد العال

صاحبة مدونة و كتاب " عايزة أتجوز "

بصراحة الندوة كانت مسخرة جدا . بس بشكل حلو

الأزمة من مكتبة إسكندرية لو كانوا وفروا دعاية كويسة و قاعة كويسة ما كانش حصل الي حصل

أنا ليا صحاب بالعشرات حيموتوا و يشوفوا الناس دي في اسكندرية

بس للأسف ما عرفوش غير بعد ما الموضوع انتهى

اللي حصل بقا ان المكتبة موفرة قاعة في أرض كوتة للمعارض

و القاعة دي عبارة عن خيمة

و الخيمة عبارة عن شوية قماش مقطع

و القماش المقطع بيسمح لناس غريبة بالدخول

لو قلنا الخيمة كان فيها 100 بني آدم

فممكن نقسم على الشكل التالي

10 من المثقفين و الأولاد بتوع التنمية و اللي يعرفوا يعني ايه تدوين

 و صحاب الموديريتور بتاع الندوة , اللي أنا منهم طبعا , كلنا جايين نعمل ظهر لصاحبنا

40 من اللي ميعرفوش يعني ايه تدوين و ما يعرفوش الناس اللي قاعدة و ما يعرفوش هم قاعدين ليه

20 من اللي ما يعرفوش يعني ايه كمبيوتر و يعني ايه انترنت فما بالك يعني ايه تدوين بقا

10 من الوشوش المألوفة في الندوات و ناس ما تعرفش هي جاية ضد و لا مع التدوين و المدونين

ال20 الباقي تعبوا من اللف في الشاطبي و لقوا كراسي فاضية قالوا يرتاحوا عليها بالمرة

من ضمن الحاضرين كان سايس العربيات بره

و واحد كبير في السن غلبان في مخه

و واحد بصراحة معرفش جنسه ايه بالضبط

و واحد كائن هلامي لزج بيكره النساء جاي مع والدته

بصراحة اتدايقت ان ضيوف زي دكتوة غادة و هشام علاء و غيرهم يحضروا أخيرا و يتجمعوا عشان يتكلموا

و يلاقوا المنظر ده

بس العيب مش على الناس

العيب على المكتبة بصراحة

ملحوظة : امبارح كان فيه حفلة عمر خيرت , أنا شفته داخل بعربيته حاجة محترمة كده

قام السكيوريتي بيقوله : " ممنوووووع يا بيه "

فأنا ببص للراجل بتأكد عمر خيرت فعلا و لا لأ و فعلا هو

لقيته سكت و بص لبتاع الأمن جامد كده

فقاله اتفضل يا بيه اتفضل , معلش يا بيه

و مرة كان فيه مؤتمر كان صحابي بيبقوا جوه

و أنا مش بعرف أدخل

قمت جايبة أي دي شيك كده و معلقاه

حجمه أكبر من حجم أي دي المؤتمر بمرتين

و شكله مختلف تماما

و لون الشريطة موف بينما شريطة المؤتمر زرقة

لقيت السكيوريتي بيقولي حضرتك مسجلة جوه ؟؟

فأنا بصيتله و الخوف في عنيا

لقيته مسك الآي دي بإيده و قلت حيبلغ عني

لقيته آه يا فندم اتفضلي أنا أسف

يالهوي , يعني مش للدرجة دي

أنا حطيته على أساس يلمحه كد و يدخلني

مش لدرجة يمسكه في ايده و يقراه

بجد بتوع الأمن حاجة تفضح عندنا

أشوفكم على خير

الحب في المعدة

ماما زمان خدتني في حجرها كده و قالتلي

" حطي الكلمة دي حلقة في ودنك , الراجل سره في معدته , الطريق لقلبه هو الأكل "

كنت صغنتتة و مقططة كده و هي قاعدة تهزر معايا :)

كبرت و أنا معنديش ايمان بالفكرة دي خالص , أنا مدركة انها ممكنة بس مش قاعدة يعني

المهم

سئلت نفسي مرة من سنة كده تقريبا

هو الواحد امتى يعرف بجد انه بيحب ؟؟ أو معجب ؟؟ أو مذهول مش أكتر ؟؟

معرفتش , بس لما سئلت غيري جاتلي اجابات كتير

بتفكر كتير في بني آدم معين

بتتوقع انه هو-هي كل ما التلفون رن

بتحلم بيه -بيها كتير

بتحس بدوخة كده لما بتشوفه-تشوفها

و أكتر حاجة اقنتعتني و لاحظتها بجد

النغزة اللي في المعدة

آن آن آن آآآآآآآآآآآآآآآآآآآآآآآآآآآآآآآآآآآآآآآآآآآن

كل ما تشوفه-تشوفها , تحس برعشة في معدتك كده

طب هو مش معقول الحب أصله المعدة يعني و لا ايه ؟؟

مش عارفة , بس وفقا للملاحظات الحديثة من مدرسة المجانين التجريبية

فأنا بطالب بإقامة دراسة على الموضوع ده

بعد كده بدل ما الواحد يقول لحبيبته يا قلبي , حيقولها يا معدتي

آه معدتي بتتقطع كل ما أشوفك و هاتك يا قلش من هنا لبكرة

كل اللي أعرفه ان الحب رغم انه إحساس في القلب إلا إنه مجموعة من الهرمونات بتضرب مرة واحدة تلخبطلك كيانك

فخلي بالك