كلنا طبعا عارفين أيام الإمتحانات و اللي بتعمله في الواحد
بعادتي بتلكك بإني جعانة عشان أقوم من المذاكرة
و ياه بقا ما تشوفوش بعمل ايه !!
يا ريت بقوم أعمل سندويتش و أرجع
لأ اقعد ساعة أفكر حاكل ايه ؟
و بعدين اتصل بمطعم
أستنى الديليفيري يوصل
أخلص أكل
بعد كده أقوم أحن على الكتاب و أذاكر
بتكون راحت ساعتين و لا حاجة في الهجص كده
و استمرت الحالة دي اسبوعين الإمتحانات
لأن زي ما قلت قبل كده ان أهلي مش هنا
فمحدش حيطبخلي و لا المواعين حتقوم تحضرلي الغدا من نفسها
طبعا مع شوية سوء تغذية من الأول
و المظاهرات السلمية و الغير سلمية اللي بعملها قدام كوباية اللبن لما كنت صغيرة معرفش ليه
و مع عدم أكل أي شيء لونه أخضر
بصيت لوشي في المراية
و جت في دماغي الأغنية العجيبة بتاعت أنا مش عارفني
ببص لروحي فجأة
لقيتني كبرت فجأة
زعلت من المفاجأة
و نزلت دمعتي
بجد مش صحة حد ماشي في الواحد و عشرين أبدا
و مع التفرج على كام برنامج من نوعية
EAT YOUR SELF SEXY
BACK YOUR BODY CLOCK
كل اللي حطيته في بالي اني حموت منفوخة من الأكل
أو حقع من طولي و يحصلي حاجة فظيعة
بجد رعب و دراما عالية
و اللي يعرفني على الحقيقة يعرف إني بعيدة كل البعد عن اني أكون تخينة الحمد لله
بس برضه مش عشان جسمي كويس فده معناه ان صحتي دلوقتي أو بعدين حتفضل كويسة من الأكل ده
قررت قرار مهم
اني أكل خضار كتير
أطبخ كل يوم
و أكل بره أخليه بس لما أكون مع صحابي و خارجين
مش عمال على بطال
بس طبعا الكلام حاجة و التنفيذ حاجة تانية
مع واحدة بتكره الأكل
و تمقت اللحمة
و تقرف من السمك
و تكسل تطبخ الفراخ
و روح مامتها تطلع عشان تاكل الخضار
و التفاح يعفن قبل ما حد يحن عليه و ياكله
كان شيء صعب
و ما أقولش اني افتكرت اني حفشل بكل جدارة
بس قلت مش حينفع كده , حعتبره دوا و أكله
الخطوة الأولى كانت اني أملى التلاجة بالكلام ده
رحت مترو و المرة دي ما نطتش على قسم الخبز و بعدين قسم المتلجات و المقليات و بعدين الحلويات و المنظفات و طلعت
لأ دخلت على قسم الخضار و الفواكه
و قعدت أبص للحاجة و أقول طعمها مش حيكون وحش للدرجة دي
جبت فلفل كبي , طماطم , خيار , جزر, بقدونس , نعناع , برتقال , تفاح , فراولة , بطاطس و لاحظوا بقا بطاطس طازة مش متلجة حاجة آخر تطور
بصيت و أنا مش مقتنعة اني حاكل الحاجات دي بس جبتها
العيش جبته بالحبوب و أسمر رغم اني مقتنعة تمام الإقتناع ان العيش البني ده طعمه مش حلو
بيض أورجانيك ,, جبنة ملح خفيف , تركي مدخن , حليب خالي الدسم و أبص للعلبة و أقول لما أشوف حشربك ازاي
عصاير بيور كتير , لأني مدمنة بيبسي بغباء و كليتي تعبت جامد منه , المشكلة مش بعرف أعيش من غيره
لدرجة اني وصلت اني ممكن معرفش أنام لو ما شربتوش و ريحته بتبقا حواليا كده
و صدور فراخ و ستيكات و برضه حاسه اني حركنهم في الفريزر زي العادة
مش فاكرة اشتريت ايه تاني بس كان كله يتمحور في حدود الأكل الصحي النظيف
و لقيت بعد كده طريقة كويسة
أعمل الأكل كله و أفرزنه و أخليه على التسخين ده بالنسبة للحوم و الخضار
و قبل ما أكل أي حاجة أكل قبلها خيارتين و فلفله كبية أو طماطمية , حسب المزاج
لأني لو خلصت أكل يستحيل أحط الحاجات دي في بقي بصراحة
فباكلهم و أنا جعانة , بقنع نفسي انهم ضريبة قبل الأكل
و فعلا لقيتها طريقة كويسة , لأني ببقا جعانة قوي و بحاول أخلص طبق الخضار ده قبل ما أبتدي أكل
صحيح طعم الخضار مش عاجبني بس مسيري أتعود عليه
العيش البني اكتشفت ان طعمه حلو , مش غبي و لا مقرف زي ما كنت فاكرة
و خبر حلو قوي أقولكم عليه , بقالي 8 أيام ما شربتش بيبسي و مش حاسه بإني عايزاه خالص زي الأول , ضبط كميات السكر اللي داخله في جسمي و شرب عصير كتير ومية عوض جسمي عن حاجته الفظيعة للكافيين و البيبسي
و تركيب الوجبات بإنك تحط فيها نوع من الفاكهة و الخضار و الللحوم و الكربوهيدرات في كل وجبة ابتدى يبقا ممتع بالنسبة ليا
كده كفاية لك
ادعولي استمر على الأكل النظيف كده و اني أتطور و أحبه أكتر و أتعلم أكلات أكتر
و انتم كمان ابتدوا اهتموا بصحتكم عشان جيلنا ده حيعجز و هو في التلاتين بجد من عفانة التغذية بتاعتنا
