الجزء التاني من سلسلة هو فعلا وصل أخيرا
عارفة اتأخرت عليكم و فيه مواضيع كتير لازم أتكلم فيها
في السلسلة دي
بس استحملوني لازم السؤال ده يتسئل الأول
سؤالي النهاردة هو فعلا إحنا توابع ؟؟
ما بنعرفش ناخد قرار و لا يهمنا ناخده من الأساس ؟
بنعمل زي غيرنا و خلاص حتى في أصغر الحاجات في حياتنا ؟
و مش قصدي بغيرنا الغرب ؟ ده موضوع منتهي من زمان
أنا بتكلم هو فعلا احنا توابع لبعضنا في البلد اللي احنا عايشين فيها دي
النهاردة كان أول يوم كلية في سنة تالتة
اللي حاصل معايا ان سنة تالتة في النظام الجديد هي سنة التخصص
فكان لازم مع تسجيل المواد في الكلية اني أختار واحد من تلات أقسام:
1- سلاسل امداد supply chain
2- نقل دولي international transport
3-تجارة خارجية ( دولية ) international trade
منين ما طالب يسئل معيد أو دكتور أو حتى واحد ماشي في الشارع و يقول " لو سمحت تفتكر أي قسم حيكون أحسن ؟ "
يلاقي الرد بكل ثقة و بلا تردد أو تلعثم في الكلام ( حلوة تلعثم دي أصلي كنت بجيب درجة كاملة في العربي ) " سلاسل إمداد طبعاااااا "
و تلاقي طبعا دي طالعة من قلبهم و هم بيردوا
سنة بحالها لغاية ما دفعتي و الدفعة اللي أكبر مني ( اللي على وش تخرج ) اتغسلت دماغهم و كله سجل سلاسل امداد
أنا قضيت الصيف بقرأ في التخصصات التلاتة و عجبني جدا قسم التجارة الخارجية
و لقيته مناسب ليا و مواده لطيفة و ماشي مع الخطة اللي أنا رسماها لحياتي ان شاء الله
و أنا بسجل لقيت صعوبة في تسجيل المواد مفهمتش ليه مع اني عارفة ان الدفعة حسب توقعي معظمها راح سلاسل امداد
المهم سجلت
رايحة الصبح المحاضرة اللي هي معادها 8:30 و داخلة قبلها بربع ساعة و قاعدة في أول صف قال يعني الطالبة النجيبة
و الفصل فاضي مفيهوش غيري قاعدة لوحدي فيه
الساعة بقت 8:30
8:45
9
دخل الدكتور , بصلي بصة شذرمانية كأني شبه مرات أبوه
قالي " انتي المعيدة ؟؟ "
" لأ حضرتك أنا طالبة "
" طيب "
و لقيته بيبص في الفراغ بتاع الكلاس و يسئلني هو كام طالب مسجل في المادة ؟
رديت بإني معرفش
لقيته بيطلع ورق و كتب و لاب توب و داتا شو
قلت ده باينه ناوي يشرحلي لوحدي بجد و لا ايه !!!!!!
استني ربع ساعة كمان و أنا قاعدة متوترة و هو بيبصلي كأني عروسة بتمر بفحص الهيئة اللي بيحصل لعرايس الصالونات
و أنا في مكاني بسيح نفسي حد يدخل الفصل يقعد جنبي
الباب اتفتح أخيراااااااااااااا
دخلت بنوتة كده قلت أحمدك يا رب أخيرا طالبة تانية
طلعت المعيدة
وااااا مصيباتاه
الراجل ابتدى يزعق و يهزأ بإنه مش بيحب التأخير
و ان ده مش نظام
و ان ليه مفيش طلبه
و ايه التهريج ده
و قال زعلان انه دخل الساعة تسعة ما لقاش حد
يا راجل يا ضلالي ابقى زعق لو انت داخل في معادك من أصله
و زعق لو الطلبة اللي إتأخروا وصلوا
مش تزعق في الغلبانة المزروعة بقالها ساعة قاعد تبرئلها كأنها قتلت والدتك
بدأ يشرح بعدها و هو باصيصلي و يسئلني و مركز معايا مهو باقي الفصل كراسي و ديسكات بس
خلصت المحاضرة طلعت أجري و أنا مرعوبة
مش معقول الرعب ده حيستمر لأخر التيرم , مش معقول محدش مسجل في القسم غيري
مش معقول انهم في الكلية لما التسجيل كان معصلج معايا كان عشان متوقعين ان محدش حيدخل القسم فا مش مخصصنله دكاترة
و أنا راجعة البيت قعدت أفكر
للدرجة دي احنا شعب غلبان
الأقسام فتحت كلها من سنتين , يعني الحكم على مين أحسن و مين أسوأ حكم مبدئي ما اثبتتوش تجارب لسه
فا الموضوع كله فتاوي و توقعات مش أكتر
بس مش للدرجة دي ,
ما تقولوليش ان محدش في الدفعة كلها فكر يقرأ أو يبحث في الأقسام التلاتة في الأجازة الطويلة العريضة اللي عدت دي
يعني هو عشان يشاع ان سلاسل الإمداد أحسن يبقا هي مناسبة لميول 99.9% من الطلبة ؟؟
الأقسام اتعملت عشان الناس تتقسم فيها حسب ميولها مش عشان يتكدسوا كلهم في قسم واحد لأنه هو الأحسن !!
تعرفوا لما كنت بسجل و قلت حسجل تجارة خارجية لقيت ايه في وش اللي بيسجلي ؟؟
علامة تعجب كبيرة و نظرة و بعدين مقولة مشهورة " يا عيني يا بنتي ؟ ليه كده ؟؟ سلاسل الإمداد أحسن "
أنا مش بقول مين أحسن و لا مين أوحش
و لا أنا صح و الدفعة و الناس غلط
بس مش طبيعي أبدا إن كل الناس دي تتفق على حاجة واحدة
و لما الموضوع يتعلق بتخصصات فالواحد يبحث و يشوف ميوله مناسبة لإيه
مش زي ما الناس بتعمل أعمل !
ما الطب يعتبر أحسن كلية , هل هو مناسب لكل الناس ؟؟
طب لو كان الطب بيدخلوه من 50% و كان بيتقال عليه أحسن كلية
كانت الناس كلها دخلته ؟؟؟؟؟
طبعا لأ
كل اللي عايزة أقوله
ابقوا نفسكم , فكروا و احلموا و اعملوا اللي انتوا عايزينه
ما تسيبوش حد يحلم بدالكم أو يغير مسيرة حياتكم عشان هو فاكر ان ده أحسنلكم
و خليكم دايما فاكرين
لو أخدتم قرار و طلع غلط فده دايما حيكون أحسن بمليون مرة من انكم تسمعوا كلام حد و تفضلوا توابع لغيركم
احلم و عيش
لأن حياتك دي انت أحق بيها
