السلام عليكم :)
إزيكم ؟ وحشتوني على فكرة
بقالي كتير قوي مكتبتش حاجة جديدة
مش بس الشهرين اللي فاتوا , لأ أنا بقالي شهور طويلة حتى لما كنت بكتب كنت بكتب من ورى قلبي
بحاول أقول أي حاجة و خلاص في المدونة أنسى بيها همومي و أسليكم
و أحير أي حد كان مصمم يقرأ المدونة عشان يتابع أخباري
و هما للأسف مش واحد و لا اتنين ..
اتعودت دايما لما أتدايق أرمي همومي بالكتابة
بالكلام
الكتابة دايما كانت بتريحني و بتزيح عني
بس حتى الكتابة في الآخر بقت بتزعجني و ده اللي بعدني فترة عن المدونة
احساس ان الواحد متحاصر بدايرة أشخاص متكررة و مستمرة
و متحاصر بدايرة أحداث بتكرر
استغراب
مودة
ثقة
استغراب
خيانة
و ما يروحش مخكم لبعيد , مش بتكلم عن الحب
أنا خلاص عرفت إن ماليش في الحب نصيب
أو يمكن شخصيتي أغبى من إنها تتحب بجد
أنا بعترف إن فيا عيوب
عصبية شوية
بتكلم كتير
هبلة و بغلط و مش بحس ساعات
عندية بشكل مستفز
بس عادي يعني , أكيد فيا حاجة كويسة
أصعب حاجة عدت عليا الشهور اللي فاتت هيا تمثيل السعادة
أنا فعلا تعبت من كتر ما بمثل إني أراجوز مبسوط
الموضوع بدأ بإني قلت لنفسي لو عملت نفسي مبسوطة
أكيد عقلي الباطن فيمرحلة ما حيصدق و يتبسط بجد و ينسى كل اللي وجعه
و حصل فعلا إني كنت بتخدر لأيام و ادي نفسي فرص جديدة
و أرجع انتكس
مبقتش قادرة أثق في حكمي على الناس
أي حد يقرب مني بفترض فيه الغدر مقدما
بقيت بقول أعذار غريبة عشان أتهرب من الدخول في أي علاقة حيكون نهايتها ألم
حاسة إني في دوامة من الفشل
مش على المستوى العملي و الحمد لله على المستوى العملي اتخرجت بإمتياز و اشتغلت الشهر ده
باركولي صحيح , اشتغلت في إدارة المنشآت التربوية و الهندسية لوزارة التربية
بس دوامة من الفشل الإجتماعي
على الرغم من كتر أصدقائي أنا مبقتش أرتاح في الكلام غير مع اتنين بس
و الباقي كلهم بتهرب من الكلام معاهم
في بداية 2013 كنت قررت قرار حلو و الحمد لله ربنا قدرني عليه
كنت قررت أصالح أي حد زعلني أو زعلته من يوم ما ربنا خلقني
في الأول كنت خايفة قوي أسمع من الناس دي كلام ما يعجبنيش
و على الرغم ان كتير منهم غلطان في حقي قررت أسامح
و تعددت الشخصيات بين صديقة قديمة و حد كان بيحبني و اديته استمارة ستة
و زميل دراسة و جارة و دكتور في الجامعة و غيرهم
ناس كتير قوي , بغض النظر مين فينا الغلطان قررت أبدأ الصلح
و النتيجة كانت مبهرة فعلا و غير متوقعة , مفيش حد رفض طلبي أو ردني
و كتير منهم اعتذر مني كمان على أي غلط عملوه في حقي
فضل تلات أشخاص فقط محاولتش معاهم
شخص معرفتش أوصله
و شخص ما ينفعش أوصله لأنه حيفهمني غلط
و شخص ربنا معاه وجودي بعيد أحسنله
فرحت قوي إني عملت اللي عليا قدام ربنا و حسيت قد ايه البشر جواهم كويس
بس رغم كل ده مقدرتش اثق في حد تاني
كل الموضوع إني كنت حابة أبتدي بداية جديدة بعيد عن أي وجع أو مشكلة قديمة
بس للأسف اكتشفت ان حتى لو صالحت اللي وجعوك و حتى لو كل شيء حواليك اتصلح
اللي اتكسر جواك مش سهل يرجع بريء و طاهر و نقي زي زمان
زي الإزازة كده اللي لما تتكسر و تلزقها و تزينها بشرايط لونها حلو
لما تعدي عليها صوابع حتحس بالحتت المكسورة بتلمسها
ممكن ما تشوفش الوجع بس كل ما تقرب من حاجة شبهه تفتكره و تحس بيه .
