الثلاثاء، 12 يناير 2010

عشر دقايق بس


من عادتي إني بكون ضابطة المنبه على ستة الصبح عشان أقوم ألبس و أجهز للكلية
و أرجع أضبطه على الساعة سبعة و 8 دقايق عشان أنزل أمشي لمحطة الباص
اللي بييجي سبعة و ربع بالضبط

محدش يسئلني اشمعنى 8 دقايق , أنا حسيتها موزونة كده
لا ببقا متأخرة و لا واقفة ملطوعة لوحدي لغاية ما ييجي

النهاردة على الساعة سبعة إلا ربع كده مقدرتش أفضل قاعدة قلت أنزل و خلاص
كان الجو جميل قوي في الساعة دي

لا نور قوي و لا ظلمة قوي
هدوء غريب في الشارع رغم زحمته
روايح بشمها كل يوم جاية من ناحية جاد
و عم معرفش مين اللي واقف بعربية الفول
و واحد تاني واقف بطربيزة كبده قبل النفق

بس فيه ريحة تانية شاماها مش باخد بالي منها كل يوم
ريحة طينة مبلولة
أرض خضرا
ورد أحمر !!!

هو فيه ورد أحمر في منطقتنا أصلا ؟؟
سبحان الله أول مرة أخد بالي ان الميدان مليان ورد

وقفت ثواني أتفرج على الورد
كملت طريقي

واحدة شكلها طيب جدا و رزين جدا
كبيرة في السن
قاعدة على الأرض بتبيع مناديل
أنا بشوفها كل يوم
بس اشمعنى النهاردة حسيت إني نفسي أتكلم معاها ؟
الدقايق اللي ضفتها لنفسي قبل معاد الباص دي فرقت معايا قوي
صحيح ما كلمتهاش بس ما أنساش ابتسامتها الطيبة ليا و صباح الخير يا بنتي ربنا يوفقك
بعد ما شريت منها علبة مناديل واحدة

كملت طريقي

أول مرة أشوف الدنيا واسعة و خضرا كده
أول مرة أحس بريحة الهوا دي في صدري
أول مرة أمشي بهدوء مش بجري أحسن الباص يفوتني

كل حاجة رغم إني بمر عليها كل يوم قبل كده
كان ليها معنى تاني لما اختلف التوقيت الزمني عشر دقايق بس

حتى الأغاني في ودني كان لها طعم تاني
صوت الزمامير
صوت خطواتي على الأرض اللي عمري ما كنت بسمعه من الجري و الدوشة

إدي لنفسك عشر دقايق بعيد عن الدنيا
حتفرق معاك كتير

سيب همومك على ربنا و اتوكل عليه
و قول الحمد لله

الأربعاء، 6 يناير 2010

كلاكيع


في حياة كل بني آدم منا نماذج بيشوفها حوليه

أصدقائه مثلا بيبقى فيهم المرح و اللي شايل طاجن سته دايما و اللي نايم على طول

يعني صفات محددة بنبقى عارفينها في صحابنا

و ساعات الصفات دي كمان مش بتبقى عاجبانا

بنتقسم في الرد عليها كأشخاص لنوعين

نوع و لا حعبر أهلك

و دول بيقرروا ما يصاحبوش الناس اللي مش بيحبوا صفاتهم

و نوع تعالا يا حبيبي في حضني

و دول بيشوفوا ان الإختلاف مفيش منه ضرر

و كل النوعين عايشين و كله مبسوط و بياكل و يشرب و ينام

طيب هل فكرنا مرة احنا الناس بتصنفنا إزاي ؟؟

بتاخدنا بالحضن و لا مش بتعبرنا ؟؟

طب جربت مرة تكلم حد و يكون فيه مراية قدامك ؟؟

و اتفاجئت بطريقة ابتسامتك و ضحكتك و شكلك ؟؟

حصلت معايا كذا مرة

و اتضحلي ان شكل التعابير عندي مختلف تماما عن اللي عقلي راسمهولي

و أكيد ده بيحصل مع كله

عشان كده ساعات صورنا مش بتعجبنا

طب هل لو اكتشفت ان تعابير وشي مش عاجباني أقدر أغيرها ؟؟

و لا كل اللي لازم أغيره عدم تقبلي ليها ؟؟

هل دخلت أنا كده في إني بصنف نفسي إلى فئة تعالا يا حبيبي و فئة و لا حعبرك ؟؟

قررت إني أتقبل نفسي , فتعابير وشي حاجة لا إرادية ماليش فيها

اللي عاجبه عاجبه و اللي مش عاجبه براحته

بس المشكلة لما مشكلة تخليك تفكرك في انها سبب لمشكلة تانية

ساعتها بتتلخبط

و بتبقى مش عارف تعمل ايه ؟

الأولانية مالهاش حل

و التانية انت فاكرها بسبب الأولانية

الحل انك تتقبل اللي بيحصل حواليك ؟

و لا تعمل حاجة ضده ؟

أحسن حاجة

أشرب كوباية لبن و أدخل أنام

أحسن البوست كل ما مدى بيتنيل بمليون نيلة

الصباح رباح ححاول أكتب حاجة مفهومة عن كده

بس في الآخر

خليك سيد نفسك

الثلاثاء، 5 يناير 2010

تدريب في **** الجزء الثاني



و أخيرا بعد طول إنتظار
و لهفة و شوق و أحضان
و استباق للأحداث و تخيل المصايب

نزل الجزء التاني من التدريب في****
ّ تم حذف الإسم عشان مصلحة البلد بس  ّ

أنا عارفة محدش كان مستنيه أصلا
بس لازم أدخل دخلة درامية كده بس من باب الواجب

عشان تقرأوا الجزء التاني لازم تكونوا قرأتم الجزء الأول


انتهينا المرة اللي فاتت من فضايح التكنولوجيا في قسم اللوجيستيكس
و عرفنا ليه الشركات عندنا متقدمة جدا و حاجة عال العال و الصحة تمام

بينما كنا قاعدين في حالنا مستنيين الفرج ينزل من عند أم فرج
لقيت واحدة من الموظفات بتبصلنا و تقول مين فيكم خطه حلو ؟؟

بما إن غمازة خطها زي نبش الفراخ
رديت أنا و قلتلها خطي حلو

جا في بالي انها عايزاني أكتبلها ورقة
أوردر طلبات تبع الشغل
تمليني حاجة مثلا
تخليني أكتب أي حاجة ليها علاقة بالشغل من أصله

لقيتها بتطلع أجندتين
واحدة قديمة
واحدة جديدة

بتقولي " بصي "

أبص أنا و عنيا فيهم علامات تعجب

" انقلي الأجندة القديمة في الجديدة , أصل خلاص القديمة دي بقت متقطعة خالص و مش نافعة "

أستمر أنا في الحملقة في وجهها البهيج

و أفوق على ضحكة من غمازة و هي بتقولي

" مش انتي خطك حلو , اشربي بقا نياهاهاها "

أنا برضه لسه مش مستوعبة قلتلها

" أنقل الحبة دول هنا ؟؟ " و بشاور على حرف الألف

قالتلي " لأ كل الأجندة "

أبص ألاقيها أجندتها الشخصية

بجد ما كنتش عارفة أقولها ايه ؟؟

هل أنا جاية من معهد سيكرتارية أتدرب ؟؟

و لا من كلية نقل دولي و لوجيستيكس محترمة ؟؟

هل أنا الخدامة اللي بابي جابهالها ؟؟

و لا بنت فاكرة ان ممكن أكسب خبرة من تدريب في شركة ؟؟

مسكت البتاعة و قعدت أكتب رغم كل استغرابي
عبال ما خلصت تلات صفحات حرف الألف كانت ايدي اتشلت
و عيني راحت من خطها المقرف

حرف الباء

حرف التاء

بعدين قمت سايباها و ماشية

بجد كنت جبت آخري

قاعدة اعد كام حرف ناقص في الأبجدية كل شوية !!!

فكرتني بأيام الثانوية العامة و أنا كل ما أخلص صفحة من الكتاب أعد باقي الصفحات

لو وفرت وقت عد الصفحات كان زماني من الأوائل

يلا ما علينا

قررت بقا أهرب

مسكت شنطتي , لبست البالطو

و صاحبتي كذلك

مين بقا شافنا ؟؟

مديرة القسم اللي هي مسؤولة عن تدريبنا

قالت انتم رايحين فين ؟؟

أنا : " و لا حاجة التويليت "

اممممممممم

غمازة " بناخد بريك "

امممممممم

أنا " جعانين حناكل "

واضح سنة أولى كدب و مش عارفين نكدب

قامت خدت شنطنا و حطتهم عندها في الخزنة الخشب و قفلت عليهم بالمفتاح

!!!!!!!!!!!!!!!!!

آن آن آه ه ه ه ه

و بتقولها في وشنا بكل استظراف

محدش حيمشي قبل أربعة و نص و خلي الشنط هنا عندي عشان أضمن انكم ما تمشوش

احنا بقينا مستعجبين

قعدنا نفكر و حاولنا نشتغل , نعمل أي حاجة في أم اليوم المهبب اللي مش فايت ده

أعدي جنب طنط أجندة ألاقيها تقولي لو زهقتي كمليها المرة الجاية

و أنا في عقل بالي أحلقلك شعري لو شفتي وشي تاني , شوفي بقا مين حيكملك الأجندة

قرررنا بقا اننا لازم نهرب و نهرب بجد


على الساعة تلاتة إلا ربع كنا حننفجر رسمي

اتجمعنا احنا التلاتة نراقب أوضة المديرة

قولنا أكيد حتخرج تروح تويليت , تروح تصلي , تروح تاكل , تروح تموت أكيد حتخرج

و حانت الفرصة

و فجأة أسمع موسيقى تصويرية أكشن في دماغي

" غماااازة راقبي الطريق "

" نخلة الحقني لو جت "

" يا جماعة أنا حضحي عشانا كلنا , يموت الفرد و تحيا الجماعة "

تا تا را تا تا را تا تا را تا تا را تا

أجري على أوضتها أحاول أفتح الخزنة مفيش قافلها بالمفتاح بنت اللذينه

أجري على مكتبها مرعوبة و أدور على المفتاح

طاخ طيخ , طاخ طيخ

" لقيــــــــــــــته "

مجموعة مفاتيح

" لأ مش ده , أيوة هو ده "

" شنطننننننننننا "

أخد الشنط و أقفل و ارجع المفتاح مكانه

و أجري

" يلا يا نخلة , يلا يا غمازة أجروااااااااااااااااااااا "

و جرينا بسرعة رهيبة

نخلة وقف عند الأسانسير

" يلا يا بابا مش وقته السلالم أضمن "

و و نجري و نجري

نخلة يبص وراه

" دي حتشوفناااااا "

" اجري يا نخلة , إجري ما تبوصش وراااااااااااااااااااااااااااااااااك "

" انفدوا بجلدكممممممممممممممممممممم "

و فضلنا نجري لغاية ما وصلنا للطريق الصحراوي
ركبنا أوتو و روحنا

كان يوم مقرف و صعب و عجيب
مستوى التدريب و العقليات هنا حاجة تفلق بجد
يلا علقة تفوت و لا حد يمووووت

السبت، 2 يناير 2010

2010

السنة الجديدة بدأت أخيرا

كل واحد متصور ان السنة اللي فاتت كانت زي القطران

و كله واقف للسنة الجديدة بالساطور بيقولها أحسنلك تبقي أحسن من اللي عدت قبليكي

عن نفسي الحمد لله 2009 كانت بنت حلال و مؤدبة و اهلها عرفوا يربوها

2010 اللي لسه معرفش أخلاقها ايه معايا خالص

خايفة تطلع بنت ***** و تطلع عيني

بتخيل حاجات كتير ممكن تحصل

و بتصور حاجات ممكن ما تحصلش

السنة لسه في أولها و أنا بشوف فاضل كام شهر و تخلص

و بحسب فاضل قد ايه على عيد ميلادي اللي لسه في آخر ابريل

و بحسب فاضل قد ايه على الصيف

يعني من أولها كده و أنا مش مستأمنة السنة على نفسي

حتى السنة اللي لا هي مذكر و لا مؤنث مش واثقة فيها

يادي أم النيلة المنيلة بستين نيلة

أمال فين كنت بقول لنفسي السنة دي حخلي عندي ايمان و ثقة أكبر بالأحداث و الأشخاص حواليا ؟؟

قلت لنفسي أكتب بالضبط أنا عايزة ايه ان شاء الله

عشان لو ربنا أراد و عشت للسنة الجاية أعرف قد ايه اتطورت و قد ايه التزمت باللي عايزاه

الفكرة مش فكرتي بصراحة

أنا شفتها عند أكتر من حد عندي في الفيس بوك و عجبتني جدا

فقلت أنا كمان حنزل مجموعة من القرارات يا رب اقدر ألتزم بيها كلها ان شاء الله

1
حخلي عندي ثقة أكبر بالناس

2
مش حخلي حد يوقع على عريضة الأمان و الأخوة
و محدش يسئلني هي ايه , اللي وقع عليها خلاص معلش حظه و نصيبه
و اللي ما وقعش مالوش نصيب يعرف هي كانت ايه مواهاهاهاها
مع العلم اللي عاوز ينسحب منها مفيش مانع

3
ححاول أخد قراراتي لوحدي خالص
بدون أدنى تدخل من حد
أنا من النوع اللي بيحب يستشير غيره
بس اعتقد اني بدأت أميز كويس الحاجة دي صح و لا غلط لوحدي

4
حبتدي أناقش مشاكلي فيس تو فيس بدل ما أخاف و لا أسكت و لا أبعت مسج و لا ايميل و لا تلميح

5
حفكر كويس قبل ما اخد قرار التخصص في الكلية بداية السنة الجاية

6
حكبر في شغلي ان شاء الله و أبقى محل ثقة بشكل أكبر و أحسن

7
ححسن المحادثة بالإنجلش عندي أحسن أنا رغم ان اللغة ممتازة عندي بخاف أتكلم

8
ححاول أفتح عنيا على اللي قدامي و استوعب بسرعة و أخد قرارات و أفكر بشكل اسرع
لأني من النوع اللي تفكيره بطيء بشكل غبي

9
لو حصل نصيب و لقيت حد مناسب للإرتباط مش حخاف و لا حهرب زي ما بعمل دايما

10
ححاول أبقى مدبرة أكتر و أخد بالي من فلوسي أحسن أن مسرفة بغباء و مش بعرف دايما جيبي فيه كام

11
حبتدي أعامل كل واحد باللي يستاهله , فيه ناس بجد ما تستاهلش ربع المعاملة اللي بعاملهم بيها

12
حخفف الحساسيةبتاعتي على قد ما أقدر

فيه حاجات تانية كتير بس ده أكتر اللي بيشغل دماغي دلوقتي

إن شاء الله أقدر أعمل كل اللي فات

و إن شاء الله تكون سنة سعيدة على الكل

كل سنة و إنتم طيبين