اعلانات

إزيكم؟؟؟؟؟؟؟؟

واحد عايزة أقول اني مبسوطة موووووووووت الحمد لله

استقراري النفسي رجعلي أخيرا

مفيش امتحانات , و لا احاسيس غريبة 

الحمد لله

المهم امبارح كنت قاعدة كافية خيري شري

قلت أعمل ما الناس اللذوذة بيعملوا  في الصيف

كوباية عصير برتقال ساقعة

مع شوية تلج لزوم التناكة و العِياءة

فاتحة التكييف

ماسكة العصير في ايد و الريموت في الإيد التانية و قاعدة أقلب في القنوات

إووووو مخيف أوي

اع اكشن أوي

اعلانات

أخبار متفبركة

كرتون شفته 300000 مرة

فيلم جديد بس القناة معلقة

همم مسلسل اسماعيل ياسين

شفته مرتين قبل كده بس

يلا أشوف كمان مرة

5 دقايق مسلسل بعدين فقرة الإعلانات

طيب مش مشكلة

" هل تعاني من الدوالي ؟؟ 

هل بشرتك زرقاء ؟؟

هل أرجلك منتفخة مقززة الشكل ؟؟

هل تعبت من علاج الدوالي و الشرايين ؟؟ "

و كمية صور مقرفة لا تطاق

رجل مسلوخة

رجل منفوخة

عروق زرقا و خضرا و حمرا

اععععععععععع

كام اعلان لبطانيات في عز الحر

و يرجع المسلسل خمس دقايق كمان

ثم 

فقرة الإعلانات

" هل انت مدمن سجاير ؟

هل تعبت من عدم القدرة عن التوقف عن التدخين ؟؟

هل رئتك تبدو كالفحمة ؟؟

هل تشبه الهيكل العظمي ؟

الحل مع معرفش ايه "

و كمية صور تخليك تجيب اللي في بطنك كله

قلب محروق

رئة منفجرة

واحد ميت

سنان بايظة

كفاااااااااااااااااااااااااية

و يرجع المسلسل

لأ مش خمس دقايق المرة دي

عشر دقايق عشان نلحق ننسى القرف الي شفناه

نرجع تاني لفقرة الإعلانات

الله اعلان حلة ستانلس 

قلبي ارتاح

ياااا جمال اعلان البطانية الصوف و احنا في شهر يوليو

و فجأة

ترا را را

فار قد الحلة و البطانية كمان يطلع في نص الشاشة

" هل تعاني من القوارض ؟؟

هل منزلك مليء بالحشرات ؟؟

هل مللت الحلول التقليدية ؟

هل في بيتكم فار أكبر من الفار في سلاحف النينجا ؟؟

إذا تفضل الحل "

صورة فار

صورة جرذ

صووووووووور كتير لصراصير و تعابين و ديدان

خلااااااااااااااااااااااااااااااص كفاية 

ايه القرف ده ؟؟؟

أنا بتفرج على مسلسل و لا على فقرة اوجع بطنك من القرف ؟؟؟؟؟؟؟

ما يراعوا شوية ان فيه بني آدمين بيتفرجوا على التلفزيون

حد قالهم اني محتاجة أطلع اللي في معدتي و أنا لسه متغدية ؟؟

بجد ربنا يشفينا

كل العالم بيعمل اعلاناته بطريقة متحضرة , نظيفة و جميلة

توصل الفكرة بأقل حاجة

و احنا لازم ندعم اعلاناتنا بصور مقرفة

عبارات هبلة

مليون " هل ؟؟؟ " " هل ؟؟؟؟ "

غير كمان الصور المتجابة من النت و مبكسلة و مش واضحة

حرمت أجيب قناة عربي تاني 

خالد و حقائق جديدة

الدنيا مقلوبة على الإنترنت
في الفيس بوك
في التويتر


بس لا حياة لمن تنادي في أي مكان تاني و لا أي حد  ممكن يعرف حاجة إلا لو :
1- عنده حساب في الفيس بوك
2- عنده حد في عيلته عنده حساب فيس بوك و قاعد يحكي لعيلته


دي آخر الأخبار مقتبسة من الشروق :




كشفت السيدة ليلى مرزوق والدة خالد محمد سعيد (شهيد الطوارئ) للشروق، الأسباب الحقيقية وراء مقتل ابنها على يد ضابط شرطة ومخبرين اثنين، وقالت إنه "حصل على فيديو يحتوي على لقطات لأحد ضباط قسم سيدي جابر والمخبرين، وهم يقومون بالاتجار في الحشيش وقام بنشر الفيديو بين أصدقائه وذلك منذ حوالي شهر، وقال إنه سوف يدشن مدونة لفضح الضابط والمخبرين"، وتتابع والدة خالد "قمت بتحذيره أكثر من مره من نشر هذا الفيديو حتى لا يقوموا بإيذائه"، وأبدت دهشتها لأنهم "لم يهددوه قبل يوم الحادث إلا أنهم دخلوا عليه فجأة وانهالوا عليه ضربا".

وأضافت لم يصدر حتى الآن تقرير الطبيب الشرعي، ولكن ما صدر هو تقرير الإسعاف الذي قالوا فيه إن خالد انتحر نتيجة بلعه قطعة حشيش، وأن به عدة كدمات نتيجة عراكه مع المخبرين، وأشارت "المخبرين وبعض الشهود قالوا إنه عندما شاهد المخبرين قام ببلع قطعه حشيش واستنجد بالناس، وقام المخبرون بضربه، ولكن التقرير نفى أن تكون الوفاة نتيجة الضرب"، وتتابع بمرارة "خالد كان يجلس إمام الإنترنت 24 ساعة، فالإنترنت حياته وكان يجلس ساعات عديدة في النت كافيه".

من جانب آخر، تحدث جيران شهيد الطوارئ بالإسكندرية عن خالد سعيد، وأكدوا أنه كان مثالا للشاب المحترم، وأنه كان يعشق الموسيقى ولم تكن له علاقة بأي من أنواع المخدرات، وأضافوا أنه ينتمي لعائلة محترمة وميسورة الحال.

وروى صاحب مقهى الإنترنت الذي شهد الحادث تفاصيل سحل خالد، وأكد أن شهيد الطوارئ دخل المقهى كعادته إلى صديقه نبيل الذي كان يمارس نشاطه على الإنترنت، حيث فوجئ الجميع، بكل مخبر يدخل من باب مختلف للمقهى بحيث حاصراه ومنعا الخروج منه، ثم قاما بتكبيل خالد وأوسعاه ضربا، وحين حاول مقاومتهما ضربا رأسه برخام المحل، حاول صاحب المقهى التدخل لطرد المخبرين ظنا أنهما يحاولان اعتقاله، فسحبا خالد معهما للخارج بينما كان غائبا عن الوعي، وظلا يضربان رأسه بالبوابة الحديدة المجاورة لمقهى الإنترنت حتى لفظ أنفاسه الأخيرة، فألقيا به في سيارة الشرطة وابتعدوا لمدة عشر دقائق، قبل أن تعود السيارة محملة بعدد من أفراد الشرطة وتلقي المجني عليه في الشارع.

وأضاف شهود العيان أن سيارة إسعاف وصلت بعد قليل وحملت الجثة، لتكتب تقريرا تدعي فيه أن خالد سعيد توفي نتيجة جرعة مخدر زائدة، وأكد الشهود أن عدداً من معاوني الشرطة شددوا على أصحاب المقاهي المجاورة بعدم تقديم أي شهادة لوسيلة إعلامية، وإلا تعرضوا للاعتقال والتعذيب.




حسبي الله و نعم الوكيل في كل ظالم مفتري

بلطجة

صراحة مصدومة و مش عارفة أقول ايه ؟؟!!

كل اللي حصل ده جنب بيتي و أنا محستش غير لما دخلت الفيس بوك ؟؟

مظاهرات و ناس بتتقتل و بلطجة و تعذيب و اجرام ما بيحصلش حتى في المعتقلات

و بعد كل ده افترى كمان و كذب ؟؟

المكان

اسكندرية - سيدي جابر -كليوبترا-سابير نت كافيه

المجني عليه

خالد محمد سعيد

28 سنة

ثانوية عامة

صاحب مكتب استيراد و تصدير

شاب من اسرة محترمة كل ذنبه انه كان بيمارس حياته زي أي مواطن عادي

المجرمين

المجرمين كتير معرفش نذكر مين و لا مين ؟؟

رئيس الجمهروية حسني مبارك لسكوته على اللي بيحصل و تعيينه لأشباه الوزراء دول

العادلي : وزير الداخلية اللي لا منه و لا كفاية شره

بدل ما يقبضوا على مافيات التجارة في الأعضاء و المخدرات و قتالين القتلة

بيتسلوا على الشباب الغلبان

المجرم الكبير و الحقيقي و اللي ربنا ينتقم منه ضابط المباحث : أحمد عثمان

و أخيرا شوية الرعاع اللي لا شهادة و لا تعليم و لا أي حاجة غير انهم معاهم لقب مخبر شرطة :

عوض و محمود الفلاح

القصة :

تلات شباب زي الورد واقفين في حالهم في سايبر

ضباط شرطة بيدوروا على واحد معاه بودرة مخدرات

يبتدوا يفتشوا في الناس

خالد كل ذنبه إنه قال انتم بتفتشونا ليه ؟؟

غلطة حياته سؤال !!!!!!

و بعد كده يفتروا ويقولوا ان دمه فيه مخدر !!

طب حتى لو الولد تاجر مخدرات و لا زعيم مافيا

و لا قتال قتلة

يحاكموه همه ليه ؟؟

مفيش محاكم ؟؟

مفيش قانون ؟؟

ده يرضي حد يا ناس ؟؟

يتقتل

يتعذب

جمجمته تتكسر

وشه يتدمر

يتشوه

يترمي قدام باب بيتهم ميت !!

أهله يتدبحوا من الحزن عليه

اسكندرية كلها في حالة تحفز

بس عشان سؤال !!!

يعني الواحد يمشي حاطط وشه في الأرض عشان ما يتقتلش ؟؟

لما نشوف افترى بعد كده نسكت بقا عشان خايفين لو اتكلمنا نتعذب ؟؟

لما يحصل الغلط قدامنا نجري بقا أحسن شوية كلاب لا معاهم شهادة و لا يعرفوا يعني ايه انسان ممكن يشربوا من دمنا ؟؟

طب حنعمل ايه بعد كده ؟؟

معتقدش ان الحياة قبل خالد حتكون زي الحياة بعد خالد أبدا 

الشباب ذنبه ايه في كل اللي بيحصل ده ؟؟

ده أمريكا ما عملتش كده في معتقلين جوانتانامو

و المصيبة إزاي الناس ساكتة

ليه قنوات الإعلام و لا كأن حاجة حصلت ؟؟

و لا احنا بقا كل همنا كأس العالم و الكورة ؟؟

جايبين خبر في التلفزيون عن التيشيرتات المقلدة اللي صادروها بتباع وقت كاس العالم

و مش مكلفين خاطرهم يجيبوا خبر عن الغلبان اللي اتدبح في وسط الناس و اتعذب ؟؟

احنا بقينا تافهين للدرجة دي ؟؟

اتعودنا نتظلم ؟؟

و لا خايفين نتكلم لا نلاقي نفسنا معمول بإسمنا جروب بيترحموا علينا فيه !!!!!!!!

دور جواك

إزيــــــــــــــــــــــــــــــــكم ؟

وحشتوني موووووووووووووووووت

الحمد لله خلصت الأربع امتحانات الصعبين و فاضل اتنين الأسبوع ده ان شاء الله سهلين

مبسوطة خالص و مزاجي رايق الحمد لله

حاسه اتحررت من حاجات كتير

عاملة زي العصفورة كده عايشة براحتي

مش بفكر في حاجة و لا بفكر في حد

احساس ما حسيتوش من زمااااااااااااااااااااان

قررت ان شاء الله الأسبوع ده أول ما أخلص أروح اشتري ستاند للرسم و ألوان و كل الأدوات

و قررت أتصالح مع الجيتار اللي جالي في عيد ميلادي و ابتدي أتعلم عليه بدل ما هو متعلق على الحيطة كأنه برواز

قعدت كده مع نفسي بكتب هواياتي

القديمة و الجديدة

اكتشفت حاجات غريبة قوي

أنا كنت برسم كوميكس !!!!!!!!!!

أنا ؟؟

ده امتى ؟

و إزاي ما كنتش فاكرة ؟؟

ده كمان كنت بترجم قصص المانجا اليابانية

و اللي ما يعرفش يعني ايه مانجا فدي الكوميكس الياباني

بس الإختلاف بينه و بين الأمريكي ان المانجا أبيض و اسود

و بتترسم بأدوات خاصة

و بتتكلم عن أي حاجة مش بس الأبطال و قصص الرعب و الكلام ده

معظم الكرتون الياباني , الإنيمي زي

Maroko

one peace

peach girl

Digimon

Dragon Ball

كل دول كانو مانجا في الأصل و بعدين بقوا حلقات انيمي بعدين فيلم

طبعا أنا ما كنتش بترجم النسخة الياباني , كنت بترجم النسخة الإنجليزي , اللي بني آدم قبلي ترجمها من ياباني لإنجلش

دي كانت بدايتي مع برنامج الفوتوشوب أصلا من 11 سنة !!!!!!!!

نسيت اني كنت مصممة فوتوشوب و انيميشن

نسيت إني كنت برسم

بترجم

بغني

أنا لعبت تلات سنين اسكواش !!! المضرب لسه عندي

ياه كنت بعمل حاجات كتيـــــــــــــــــــــــــــــــــــــــــــر

ناوية ان شاء الله الصيف ده أعمل حاجات كتيرة بإذن الله

مش حسيب جزء مني يضيع عشان نسيت و لا الدنيا شغلتني

حتعلم حاجات كتير ان شاء الله

و انتم كمان

افتحوا الدولاب

بصوا في حاجاتكم القديمة , صوركم , ذكرياتكم

أو دوروا على حاجة جديدة تعملوها

بلاش الصيف ده يكون نوم لغاية أربعة و خمسة العصر

و سهر لغاية سبعة الصبح على الفيس بوك