النهاردة في الكلية كنا قاعدين قعدة بنات كده من بتوع الطفاسة و الكلام الفاضي
من باب ملئ الفرغ بين المحاضرات مش أكتر
المهم قررنا كل واحدة تقول على حاجة أو حركة عملتها مع ولد و رجعت ندمت عليها بعدين
فواحدة من صحابنا حكت عن ولد كان مهتم بيها جدا من سنتين و نص كده
حنان و عطف و طيابة
و غيرة مجنونة , ما تروحيش و حاسبي في ولاد بتعدي و خدي بالك و بلاش اللبس ده
و اتصالات و مكالمات
و كل ده بدون ما يطلب منها الإرتباط
الموضوع كان كأنهم ارتبطوا بدون كلام
لحد ما البنت بدأت هي كمان تعبره و تتعلق بيه
بد|أ بقا يتريق عليها في وسط الشلة
و ما يعبرهاش
و يهينها
و حركات زبالة كتير
و انتهى الموضوع
جا دوري إني أحكي
فحكيت على ولد من سنتين تقريبا
كان مهتم بيا اهتمام غريب
و أنا كنت بعتبره زي أخويا
لأنه أخو واحدة من صحباتي , يعني أتوماتيك أخويا
ده زي كود بين البنات كده عشان ما يخسروش بعض
المهم خلال أسبوع بالضبط حسيت إن مكالماته زايدة
و إن بيحاول يقرب بطريقة مريبة
ففهمت الفولة و إنه معجب بيا
و أنا سبحان الله
رغم إني اللي شايفاه منه دم خفيف و شكل كويس و وظيفة محترمة
ما حستش ناحيته بأي انجذاب
بل العكس تماما
نفووووووووور لأقصى الحدود
كنت ساعتها ضعيفة شوية معرفش أحرج حد في وشه
فغيرت نمرة تلفوني و ما بقتش أرد عليه في أي وسيلة تانية
لغاية ما تعب من الجري ورايا
و قرر إنه يطلب إيدي رسمي
و برضه تم رفض طلبه
معرفش ليه كنت رافضاه بالشكل ده
رغم إننا أصدقاء
خلاصة الموضوع الولد سافر كام شهر بعد ما جبتله اكتئاب رسمي
حسيت بذنب فظيع بعدها لأني ما اديتهوش فرصه و صعب عليا
بعد ما حكيت القصة صحبتي سئلتني مين ده ؟ حد أعرفه ؟
قلتلها آه
فقالتلي مين ؟
قلتلها قولي الأول مين الندل اللي عمل معاكي كده
و بعد كده أقولك أنا ندلت مع مين
فضلنا نتحاور حبة لغاية ما البنت اعترف
و سبحانك يا ربي
يطلع نفس الولد !!!!!!!!!
شفتم ربنا ؟؟
عشان هو بهدلها و تعبها و كسفها قدام صحابها
ربنا بعتله اللي تبهدله و اللي تخليه يحفى عشان يعرف يكلمها و اللي ترفضه و تبينله إنه ولا حاجة
شايفين ربنا خدلها حقها في قد ايه ؟ أقل من تيرم دراسي
عمل معاها كده و أنا كنت لسه بفكر حدخل كلية إيه
يادوب تيرم واحد و كان خد على دماغه مني بعد ما دخلت الكلية
أنا بجد بقيت مندهشة و بقول سبحان الله
اللي معاه مش بيضيع حق أبدا و مش بيتظلم حد أبدا
و هو ده الي مريحني ... ان العداله ربنا بيحققها .. و الي بوشين ربنا بيرزقه بناس اوحش منه .. و بيكشفه و بيكشف كدبه قدام صاحب الحق .. بطرقهو ما يتخيلهاش
ردحذفعشان كده انا عارف ان ربنا هياخدلي حقي .. لانه اعلم بالحق ...
كلام سليم :)
ردحذف