مش عارفة ايه الفكرة في الحكاية اللي منتشرة جديد بين الكابلز و الخاطبين
و بتبقى زايدة عن حدها قوووووووووي بين المتجوزين فعلا
موضوع الكتابة لبعض على الفيس بوك
تلاقي واحدة متجوزة كاتبة الستيتس بتاعتها النهاردة
" أنا متجوزة أجمل واحد في الدنيا "
و يدخل هو يعملها لايك و يرد عليها
" معرفش من غيرك كنت حعمل ايه في الدنيا ؟ "
و بعدين تلاقي 21 كومنت كاتبينهم لبعض
و لو اتصلت بيهم على البيت حتلاقيهم قاعدين جنب بعض !!
مش عايزة أقول كلام عيب , بس ما إنتم قاعدين في بيت واحد
الموضوع سهل مش محتاج الإعلانات اللي انتم عاملينها دي !!
الخاطبين بقا
تلاقيها كاتبة
" حبيبي فاكر اليوم ده ؟ 13 -4-2000"
و كل اللي عندها في الفريندز من كتر ما هيا قرفتهم بقصة حبها ليه
عارفين انهم شافوا بعض في اليوم ده
و كل داخل يقولهم كل سنة و انتم طيبين
في بقا فئة مريضة جدا
" يا عالم أنا و حمادة حنبقا تلاتة , أنا حاااااااااااااااااااااامل "
و تلاقي صحباتها داخلين يزغروطوا
و هيا ترد على كل البنات بكلمة واحدة " عقبالكم "
يعني أنا مش فاهمة خالص , حتى لو مفيش حياء
على الأقل يبقا فيه دم أو حتى خوف من الحسد
ده جدتي لما كانت بتبقى حامل محدش كان يعرف غير و هيا بتولد
عشان مكسوفة تقول
فيه بقا نوع متميز قوي و غريب
الكابلز اللي لسه ما اتخطبوش و المفروض إن محدش يعرف انهم مرتبطين
بس لما تقعد شهرين كل يوم فوق ال 20 كومنت و 5 أغاني و 400 بوست بينك و بين حبيبتك
أكيد كل الناس حيعرفوا ان بينكم حاجة وش !!
لا و تلاقيهم مسميين بعض أسامي عجيبة
تدخل تكتبله : زيزو الثنائي
يرد عليها: مارو الفولاذية
و يعدوا يهبلوا طول النهار قدام الناس
طب ما شركات الإتصالات و خطوط التلفون و النت و المسنجر و الرسايل موجودة
هبلوا فيها زي ما انتم عايزين !!
فيه فئة أنا مش فاهماها بصراحة
تبقى مخطوبة أو مكتوب كتابها
و كل الناس عارفينه و عارفينها
و تلاقيها تكتب
" أنا امرأة لا يكسرني رجل و لا يهمني شيء في الحياة " !!
نعم ؟؟؟؟
أو تلاقيها كاتبة
" اغرب عن وجههي فلست أنت الرجل الذي يرضي غروري "
و هو داخل عامل لايك
و تاني يوم قاعدين سوى عادي
المشكلة أنا عارفة كويس ان علاقتهم كويسة ببعض
و ان الكلام اللي بتكتبه من باب الهبل بس
طب ليه بتكتبه أصلا ؟
أنا بجد اتفقعت مرارتي من الناس دي
يعني أنا عندي واحدة صحبتي ما شاء الله عليها
قرأت فاتحتها من كذا شهر و اتخطبت من يومين تقريبا
محدش شافلها صورة وحشة على الفيس بوك
و لا حد حس بيها و خطيبها كذلك شخص محترم و هادي
أصل فعلا مالوش لازمة " الهيجان " اللي على الفيس بوك و قدام الناس ده
و سوري على لفظ " هيجان " بس هو الوحيد اللي تفسر بيه اللي بيحصل
ما أنكرش اني لو اتخطبت ممكن أحط صورتي بفستان الخطوبة لو كانت مختلطة عشان أكيد حكون محجبة فيها
أما لو عملته اسلامي ( غير مختلط) فأكيد مش حلبس الحجاب و ساعتها أكيد مش ححط صور خالص
ما انكرش اني أكيد حبقا فرحانة و حكتب حاجات ليها علاقة بإني أقول للناس اني اتخطبت و استقبل مباركاتهم
بس أكيد مش حعمل العمايل دي
أصل ليه ؟
ما أنا لو بحب حد و مخطوباله
أعبرله عن حبي بكل الطرق بيني و بينه في حدود المشروع
علاقة الحب دي علاقة طاهرة جدا
علاقة المفروض تتسم بالخجل و الأخلاق و البراءة
حاجة خاصة جدا بين اتنين
أصل ايه الفرق بين الحيوان و الإنسان ؟
إن الحيوان ممكن تلاقيه بيتجوز قدامك , أما البشر بيتزوجوا في غرف مغلقة
دي الطبيعة البشرية الخجولة الحقيقية
ههههههههه
ردحذفمرحبا نانسي
هدي اعصابك مدام هما كده مبسوطين
خليهم علي راحتهم
في مثل عنا بيقول ما جمع الا وفق
والف مبروك لزيزو الثنائي
و مارو الفولاذية
:)
انتى شخص واضح عليه العقد بسم الله حولك وحواليكى
ردحذفههههههههه
ردحذفلا ما اعتقد
بس يمكن نانسي تعصبت شوية
لوجهة نظرها
تشاك , لا أنا مش متعصبة أنا مستغربة مش أكتر :)
ردحذفالأستاذ غير معرف : و الله الشخص المعقد اللي يتعب نفسه و يكتب تعليق على حاجة مش عاجباه و كمان مش كاتب إسمه من كتر عقده
ممكن اكون في الاول متغاظ منك عشان قولتي كل الكلام اللي كان نفسي اقوله عن العلاقات الفيسبوكية ومش عارف اعبر عنها زيك..
ردحذفبس مبسوط لاني مهما كتبت ماكونتش ها اعرف اقولها بالشكل ده :)
المفروض فعلا ان علاقة الحب علاقة خاصة جداا ولغة مشتركة بين اتنين مفيش حد تالت ممكن يفهم ابجدياتها..!!
والا..ها تبقى لغة (عامة) :)
كل سنة وانت طيبة نانسي :)
اه..
برضه انا..
Timo
آسف على الازعاج
تيمو
ردحذفههههههههههههههههههه
لا ما تتغاظش و لا حاجة , اعتبرني قلتها بدالك , ابعت اللينك بتاع الموضوع لأي حد فاقع مرارتك P:
هو فعلا الموضوع بقا غريب و بقيت أحسه منافسه بين البنات و بيغيظوا بعض مش أكتر , يعني كل واحدة فرحانة ما صدقت لقت واحد
مع إن العلاقة دي أطهر من اللي بيعملوه ده :(