النهاردة كان عندي إجتماع في المكتبة
خلصنا على 7 بليل كده
كانت المكتبة فاضية خالص
قعدت على طربيزة في مؤمن نص ساعة كده بتكلم في التلفون
و بعدين قلت أخد أكل و أروح أكله في بيتنا
قاعدة مستنية الأوردر يخلص
شفتها
واقفة ورى الكرسي بتبصلي بكسوف خالص
صغنتتة شعرها بني مفلفل و مكلبزة كده
بنوتة جميلة تقريبا عندها تلات سنين على ما أعتقد
مامتها قاعدة بتتكلم مع صاحبتها
سئلتها اسمك ايه ؟؟
قالتلي : نور
ضحكت عشان اسمها قريب من اسمي الحقيقي
طبعا عارفيني عبيطة شنطتي بيكون فيها لعب صغيرة و أقلام عليها دباديب هههههه
البنت اتشدت ليا على طول أول ما طلعت قلم فيه وردة و ميدالية دبدوب كريستال
عذبتها حبة كده و بعدين شلت الحاجة فالبنت جرت ورى المطعم فقلت لمامتها حجيبها ما تخافيش
جريت وراها
مسكتها قعدت تضحك بصوت عالي
وديتها عند مامتها جرت تاني
و جريت وراها
و ضحكت تاني
و فضلنا على الحالة دي بتاع عشر دقايق تجري و أجري وراها و تضحك
و أزغزغها و أعملها طيارة و جري و هبالة
لغاية ما تعبت أنا و هي لسه بتضحك و تبصلي بعنيها الحلوة
اتبسطت قوي
صوت ضحكتها فرق معايا
مهو لما طفل غريب عنك يبقى مطمنلك و بيجري و يلعب معاك يبقى أكيد إنت حد كويس
رجعتها لمامتها اللي قعدت تعتذر مني و أنا بقولها عادي و الله أنا اللي بلعب مش هيا :)
بصيتلي كده و تقولي و الله إنتي جميلة قوي
و بصت لبنتها و هيا بتقولها يلا يا ملك سيبي طنط في حالها
قلتلها دي بتقولي ان اسمها نور
قالتلي ابن خالتلها اسمه نور و هي مصممة تقول لكل الناس كده
ضحكت أنا قوي
مشيوا و البنت فضلت تعملي باي باي لغاية ما اختفوا خالص
خدت أكلي و روحت
بس من جوايا كان فيه حاجة جميلة
طفل صغير بيضحك
كل اللي أنا محتاجاه في الفترة دي إني أنسى كل القرف اللي شفته قبل كده
و أرجع الطفل اللي قرب يموت جوايا بسبب الوساوس و الخوف و اللي بشوفه
ضحكة طفلة بريئة فكرتني بضحكتي اللي مش لازم أنساها مهما حصل
جميله قووووووووووووووووووووووووووووووووووووووووووووى يا جنزورى
ردحذف