اختبار حب صغيور قوي
محتار في حد و مش عارف تصدقه و لا لأ
جرب كده إزبله و ما تعبروش و ترفضه
لقيته فضل جنبك لو حتى بصيغة أخ أو صديق
يبقى فعلا بيحبك
لقيته ما صدق و بدأ يرمي عليك الإتهامات
يبقى الموضوع مش أكتر من طفل حيموت على لعبة
أول ما كان حياخدها كان حيرميها
الراجل تعرفه من خوفه على اللي قدامه
و حنيته و تصميمه
و شبه الراجل تعرفه من استسلامه و تهديده و كلامه الفارغ
الموقف اللي اتحطيت فيه النهاردة اتعرضتله مرة قبل كده
بس الفرق كان واضح قوي
شبه الرجل بدأ يزعق و يقول كلام غير مترابط و يرمي اتهامات كأني مغصوبة أحبه و غلط و حرام أرفضه
و إما أوافق عليه كحبيب يا إما أنا شريرة و وحشة و قلبي إسود
أما الرجل الحقيقي كان رده " اعتبريني أخ ليكي و صديق و أنا مش حدايقك و لا حتصل بيكي تاني , لكن أمانة عليكي لو في يوم احتاجتيني أو وقعتي في مشكلة تتصلي بيا و تقوليلي , حتى لو بعد سنين حتى لو إحنا كل واحد بقا ليه أسرة و بيت , أنا أخوكي و عمري ما أحب أخسر حد حسيت ناحيته بحاجة و يفضل الإحترام بينا طول العمر "
و فعلا أنا و البني آدم ده أصدقاء في الخير و حاليا حيخطب ان شاء الله و أنا ساعدته في خطوبته دي
عشان دي تصرفات البني آدمين الناضجين فعلا
أما الأطفال و أشباه الرجال اتضحلي ان مفيش أمل منهم , حيفضلوا أطفال و أشباه رجال مهما الزمن عمل فيهم
أنا مبسوطة جدا باللي حصل عشان كده ربنا أثبتلي إني صح من الأول خااااالص
