صاحب المدونة دايما على حق

يا ترى لو بتابع بلوج

بتدخله كام مرة في الشهر ؟؟

عن نفسي على حسب

ساعات كل كام يوم و ساعات مرتين مثلا في الشهر بالكتير

بتبسط لما ناس بتبعتلي كتابتها عشان أقولهم رأيي ,

و الله يا جماعة بجد مش عارفة أقولكم ايه غير ربنا يخليكم ليا

بس في نفس الوقت

بتفاجئ بالناس اللي بدأت تتابع بلوجي بشكل يومي

و ييجوا يناقشوني

ها حصل ايه و ايه اللي كان مزعلك؟؟

و ايه اللي انتي كاتباه ده و عيب و ما يصحش

طب ما اللي مش عاجبه بيتعب نفسه و يدخل يقرى ليه ؟؟

البلوج باين من الأول ان فيه بعض الكلمات مش بتناسب الناس المؤدبة موووت

و اللي عايز يعلق ما عنده الكومنتات يكتب فيها اللي هو عايز يكتبه

بس اللي عايز يفتح حوار بقا و يجر كلام بقوله أنا فاهماك

البنت دي شافت في دنيتها كتير , صعب حد يضحك عليا من الآخر

صحيح شكلي أهبل و مش بتكلم إلا نادر و هادية

لكن من الآخر كده سووووووووسة و بعترف بهذه الحقيقة المرة

يعني جددوا الأسلوب و النبي , الرومانسية انعدمت خلاااااااص ؟؟؟!!

طيب المتابع الحقيقي أبو نية صافية و قلب خساية يعمل ايه ؟؟

يعمل أكاونت و يرد زي ما باقي الناس بترد

يعلق فيس تو فيس بس من غير تجريح و تدخل في اللي مالوش فيه

حاجة مش عاجباه يناقش بأسلوب محترم

و إدرك في الآخر

 إن صاحب المدونة دايما على حق

لأنه مش بيفرض عليك رأيه ,

هو كاتب اللي بيفكر فيه و إنت اللي بمزاجك داخل تقرأ

و في الآخر بقول لكل صحابي ,

  بحبكم . ربنا يخليكم ليا على دعمكم المعنوي الدائم

و زي ما بقول في الفيس بوك دايما

مواااااااااااااااااااااا

فرفش , اضحك , أوعى تكشر

كل ما حد من صحابي يتصل بيا يلاقيني في سان استيفانو

كل ما أقول خرجت يقولولي فين أقول سان استيفانو

كأن اللي عمروا اسكندرية ما عملوش غير سان استيفانو

كل ما أبقى عاوزة أبقى لوحدي تلاقيني

" تاكـــــــــــــــــسي "

سان استيفانو لو سمحت

لدرجة واحد من صحابي بيقولي النهاردة

" نانسي ما ينفعش كده كل ما تدايقي تروحي هناك "

و العجيبة إني ما أديش حد أمارة في المكان

كل ما أروح أتوه و أفضل ألف و ألف و ألف

بتبسط جدا

الخروج و التمشي يبسطني

إتعلمت إني أفرق بين حاجتين

لما أكون متدايقة و محتاجة صديق أشكيله

و لما أكون متدايقة و محتاجة أشتكي نفسي لنفسي

أنا عارفة ان محدش بيحب يقرى كلام نكد كده

و كل واحد عنده همه مش ناقص يقرى شوية هبل و غم و صداع

بس استحملوني للآخر معلش

حاجات تعملها عشان تتبسط

و هنا حقتبس من بلوج بهججة لصاحبه بهـــــظ شوية حاجات

بجد البلوج ده تحفة ما شاء الله و صاحبه انسان مبدع و قدوة

 البوست ده فادني في حياتي جدا و الله

سعيد ؟؟!! اضغط هنا , بهججة

و بحب أزود عليها شوية حاجات من تجربتي

1

اتغدى بره لوحدك

حتلاقي انك بتاكل براحتك

أول مرة في حياتك تخلص طبقك

مش مضطر تسمع لك و حداويت من اللي قدامك

مش مضطر تسيب أكلك يبرد عشان ترد أو تناقش اللي معاك في حاجة

حتاكل وجبة سخنة و لذيذة و إنت بتتفرج على الناس و تتبسط

2

ادخل محل ألعاب

أحلى حاجة تدخل محل ألعاب من الكبار

و تقعد تمسك في الدباديب

و تتفرج على الحاجة

ساعات بتقول يا ولاد المحظوظة الألعاب دي ما كانتش موجود على أيامنا

و عايز تتجن أكتر ؟؟

إشتريلك لعبة و إنت ماشي

3

اطبخ

الطبخ من الحاجات اللي بتلاقي نفسك فيها جدا

لو بتعرف تطبخ بتتحدى نفسك إنك تطلع الأكلة تجنن

لو مش بتعرف حتديها ضحك للصبح من اللي بتعمله

و من الطباق اللي بتتكسر و الأكل اللي بيتحرق

و منظر العجينة معدومة الملامح اللي طلعت على أساس انها كانت رز و لا طبق مكرونة

4

رزل على واحد من البياعين

مش رزالة رزالة بجد

لا عشان ما يطلعش على عيالك بعد كده

ادخل محل , مكتبة , أي حتة بس تكون فاضية عشان ما تشغلش الواد أو البنت على الفاضي

ابتدي اسئل و شوف مية اللي قدامك

لقيته رزل سيبه و امشي

لقيته لطيف اقعد حكي معاه عشر دقايق , ربع ساعة

حتبقى قضيت وقت لطيف مع حد ما تعرفوش

طلعت اللي جواك

انبسطت

و يمكن بسطت اللي قدامك كمان

( بصراحة عملتها امبارح مع واحد من مكتبة الشروق كان لطيف قوي و رجعت مبسوطة لا أعرفه و لا يعرفني )

5

اتصل بصحابك اللي ما كلمتوهمش من شهر , شهرين أو أكتر

امبارح اتصلت بكل صحابي اللي بقالي اسبوع , اسبوعين ما كلمتهمش

و النهاردة اتصلت بناس ما كلمتهمش من بتاع شهرين كده

و الله بتتبسط جدا من رد فعل الناس لما يعرفوا انك متصل بس تسئل عليهم

شعور الرضا اللي جواك بيبقا صعب يتوصف

عايز تتجن أكتر ؟؟

اتصل بناس يادوب ممكن يفتكروك بالعافية

اسئلهم عن صحتهم , أخبارهم , اتطمن عليهم و اقفل

ما تتصورش قد ايه بتكون مبسوط

و في الآخر كل واحد من حقه يعمل اللي هو عايزة عشان ينبسط

طالما مش بيدايق حد و لا بيعمل حاجة ضد معتقداته

بس كده

حيرة

بتحس بالألم لما ما تبقاش عارف اللي قدامك ده صديقك و لا عدوك ؟؟

 بيخاف منك و لا بيخاف عليك ؟؟

 بيحبك و لا بيكرهك ؟؟

 بيعتبرك قريب منه زي ما إنت بتعتبره أفضل أصدقائك و لا بعيد ؟؟

 بيستظرف و لا قاصد ما يراعيش مشاعرك ؟؟

 بيحطمك و عايز يرجعك لورى و لا بيفرح بتقدمك و يبقى فخور بيك ؟؟

 عايز يمسح دموعك و لا عايز يشوفها نازلة من عينيك ؟؟

 بتتألم لما ما تبقاش عارف هو عايز ايه بالضبط

حبيبي

حبيبي

رغم بعدك عني فإني أشعر بك و بوجودك

أحس بنبضات قلبك تمتزج مع نبضاتي

أشعر بشفتيك تلامسان شفتاي

يداك على خصري

تراقصني بهدوء

تنظر إلي كأنك لم ترني من قبل

حبيبي

قد تكون موجودا في مخيلتي فقط

ربما أنت مجرد وهم

ربما أنت أمامي و لم ألحظك قبلا

أو ربما لم يحن وقت اللقاء حتى الآن

حبيبي

ظهرت الآن أو لم تظهر

قررت التحدث أو لم تأتك الشجاعة

ولدت أم لم تولد بعد

أعلم أنك في يوم من الأيام ستكون ملكي

ستكون أمامي

تضمني و تقول لي

أحبك

مدارس الحب عند البنات

للبنات مناهج و  مدارس بتبعوها لما بيحبوا

أو لما يعجبوا بحد

و لا لما يكونوا عايزين يصطادوا فرصة ب مش أكتر لا حب و لا بتاع

من اللي شفته في حياتي و أعرفه عن بنات جنسي اللطيف الخفيف

فالمدارس تنقسم إلى

المدرسة الكلاسيكية ( القديمة )

سعاد تشوف لولو يعجبها

سعاد مكسوفة

البنت المكسوفة شيء نادر اصلا

بس سعاد فريدة من نوعها

البت راضعة الأدب

و مامتها محفظاها كلمة و البت مصدقاها

" أوعي , إياكي إياكي إياكي تطاوعي ولد في كلمة , ده أكيد بيختبرك "

فالبت ولد يهزر معاها تديله بالقلم

ولد يحاول يجر معاها كلام تشتمته

ولد يعجب بيها تقوله عيب معنديش الكلام ده

و تصحى في يوم من الايام تكتشف إنها خدت قفا محترم من مامتها

معلش يا سعاد

المدرسة التانية

مدرسة أخنق الولد لغاية ما يحبني غصب

سهى معجبة بمرتضى

سهى بتجيب الغدا لمرتضى

سهى واقفة جنب مرتضى

سهى بتزق أي بنت واقفة جنب مرتضى

سهى قاعدة في حجر مرتضى

سهى بقالها خمس شهور بتملح لمرتضى

سهى قربت تتقدم رسمي لمرتضى

سهى خنقت مرتضى

مرتضى خطب لولو

سهى انتحرت

المدرسة التالتة

مدرسة اعملي مكسوفة

شيماء بنت فاهمة في كل حاجة

سوسة و عارفة اللي المفروض البنات تعرفه و اللي مش المفروض

يمكن كمان عندها تجارب أو يمكن البت شريفة بس سوسة و معلوماتها زيادة عن احتياجها مش أكتر

كل ما صفوان يقرب منها تبص في الأرض

كل ما صفوان يهزر تضحك و ايديها على بقها

كل ما صفوان يكلمها تقعد تفرك في الكرسي و تجنب اي أي كونتاكت معاه

كل ما صفوان يقولها كلمة حلوة تقوله بس كفاية بتكسف

صفوان يقع لشوشته , يتجوزها , فجأة بطلت تتكسف , صفوان اتدبس

المدرسة الرابعة

مدرسة اديله عى دماغه

كاريمان بنت لذيذة و طبيعية مع كل صحابها

كاريمان معجبة بسليمان

كاريمان عنيفة قوي مع سليمان

هزارها كله بالإيد

كلامها كله شتايم معاه

كاريمان : سليمان يا عبيط

سليمان بطل تخلف

سليمان يا متخلف

سليمان يا زبالة يا حيوان

كاريمان طيبة طيابة مع كل الناس

ييجي سليمان تتحول للإنسانة الخارقة و تتشطر عليه

سليمان في يوم يروح راقعها قلم لما تزودها معاه و تشتمه شتيمة وحشة قدام صحابه

كاريمان تقعد تعيط و تشتم في حظها

المدرسة الخامسة

مدرسة ادلعي يا دوسة

سالي بنت محزقة ملزقة

البنطلون الجينز بتاعها تشك انها اتوتلد فيه و قاعدة تكبر فيه من يوميها

سالي مش وحشة قوي

بس يوم ما عجبها كريم زودتها قوي

سالي دايما بتهزر معاه بإيدها هزار مش لطيف و ايديها دايما يا في شعره يا عند ودنه

سالي دايما قاعدة رجلها بتخبط في رجله

سالي بتوطي قدامه تجيب اللي وقع منها و ناسية بنطلونها اللي واقع ورى

سالي مسجات و دلع

سالي رغم ان صوتها من السجاير رايح و أعلى من صوت ساعة بج بن

إلا إنها قدامه عصفورة , بتتكلم كأنها ....................... احم... مالوش لزوم 

سالي معندهاش مانع في أي حاجة المهم تتجوزه في الآخر

كريم رغم غلطاته في حياته إلا انه بيدور على الخضرة الشريفة

سالي تتجن و تكرر الغلط مع حد غيره و لا بتتعلم و لا بتفهم

المدرسة الخامسة

مدرسه اعملي نفسك مش واخدة بالك و اتقلي على الرز يستوي

لوزة بنت جميلة

بس تقيلة جدا

لوزة تلاحظ ان فطيم معجب بيها و هي معجبة بيه

لوزة تعمل مش واخدة بالها

فطيم يجيب للوزة هدية

لوزة تقوله ميرسي و خلاص على كده

فطيم يبعت للوزة مسج

لوزة ما تردش

فطيم يتصل بلوزة

لوزة ما تردش

فطيم يتصل تاني

ما تردش

فطيم يتصل تالت

لوزة ترد

إزيك يا فطيم معلش ناسية التلفون سايلنت و لا كنت نايمة و لا كنت بساعد ماما في المطبخ

فطيم يتشعلق أكتر

فطيم يلمح تلميحات قوية جدا

لوزة و لا الهوى

فطيم يفتكر انها مش معجبة بيه و يقرر يبعد

لوزة تفتكره بيتقل عليها

تقول مسيره يرجع

هم الرجالة زي طابع البوصطة , كل ما تتفي عليهم يلزقوا أكتر

لوزة تكتشف انه بعد مدة دخل في علاقة جديدة

لوزة يجيلها اكتئاب

المدرسة السادسة

مدرسة حسسيه انك محتاجاله

صفاء بنت كويسة

معجبة بعلاء

تعيطله في التلفون انها اتسرقت

ييجي علاء على ملا وشه يشوف مالها

تتصل في نص الليل تعيط عندها اكتئاب

علاء يهديها كده و يكلمها لغاية ما تبقى أحسن

صفاء تروح لعلاء الشغل تحكيله على مشكلة حصلت معاها

علاء يسيب الشغل و يساعدها

صفاء يوميا تخترع مشكلة و تخلي علاء يحلاهالها

علاء في فترة ما كان اعجب بيها لأنه شافها كميلة كده و محسساه برجولته

لكن فجأة ابتدى يحس بضعفها الزيادة و قال صفاء دي مش نافعة مش حتعرف تفتح بيت و لا تعتمد على نفسها

صفاء تاخد بومبة

-----

دي تقريبا المدارس اللي شوفتها

فيه أشكال و أنواع و مناهج في الموضوع ده

و اللي شفته ان معظمهم أثبت فشله

 الحب بالذات قسمة و نصيب

و مش بيتعمل بالتخطيط

يعني أحسن حاجة الواحة يعملها هي

العفوية و التلقائية و الشفافية

خليك صريح مع نفسك و مع اللي قدامك

لف و دوران و قصص مالهاش لازمة يبقى مش بس بتضر نفسك

لا كمان بتضر الإنسان اللي بتحبه

و اتفكروا دايما ان له نصيب في حاجة حياخدها لو حصل ايه بالذي

في الكافيتيريا

الصبح كل يوم بوصل الكلية على الساعة تمانية و ربع كده

طبعا ده لأني صاحية من ستة

لما دخلت كلية في أبوقير تقريبا كنت فاكرة نفسي كتكوت

ماله المجمع زي الفل

كبده هوهو بره و عبده نتانة و ابو بديع الفظيع

يلا ظروف بقا

قدامي 15 دقيقة

يا أجري على المحاضرة عشان دكتور رزالة ما يفطرش بيا

أو استهبل و أخد كوباية نسكافيه في السكة و اقعد أشربها قدامه

عمدة عمدة , صباح الخير عامل ايه ؟؟

تمام يا جميل واحشاني مش باينة ليه ؟؟

امتحانات و ظروف يا عماد

طلباتك يا قمر

كوباية نسكافيه

حواري مع عماد مش بيتغير يوميا

كل يوم ازيك يا جميل , كل يوم واحشاني ,

كل يوم عندي امتحانات و ظروف و كل يوم عايزة النسكافيه

لدرجة مرة انه قالي انتي غيرتي هدومك امتى ؟؟ انتي مش لسه كنتي لابسة أحمر ؟؟

لا يا عماد كنت لابسة أحمر امبارح صباااااااااح الخير

نروح المحاضرات اليائسة و نرجع تاني للكافيتريا و ينحصر الحوار المرة دي على عندك ايه ؟

عندي بانيه و حواوشي و سوسيس و برجر

عندي كل حاجة يا جميل

امممممممم

امممممممم

و اقعد أفكر كأني مش كل يوم بقف الوقفة دي

حواوشي جبنة يا عماد

و أقعد

تبص على الطرابيزات

تستغرب

دايما فيه ولد لابس اسود شعره ملولو ناعم كده و اسود قاعد متنرفز

بقالي أكتر من سنة بشوفه

قاعد يهز رجله

يضرب في الأرض

لوحده

طيب ليه ؟؟

يا ابني ايه اللي مزعلك ؟؟

حد يزعل قمر زي ده ؟؟

بت لمي نفسك ده شكله معقد لفي وشك بقا خلي عندك ذرة حيا

تلاقي برضه طربيزة مليانة مساطر و مثلثات و حرف التي و شنط سودة كبيرة

بتاعت الجماعة بتوع العمارة

اللي قرفونا بحاجتهم و لوحهم و النماذج بتاعتهم

كل واحد ماشي ماسك النموذج شايله فوق دماغه خايف عليه

بس على مين

أول ما نحاول ندخل باص الكلية

مش النموذج بس اللي بيتهرس

الواد نفسه اللي عمل النموذج مش بنلاقيه

دايما لازم كام فقيد و شهيد يطلعوا من عملية دخول الباص دي

المهم نرجع للكافيتيريا

تلاقي برضه طرابيزة البنات

أو الراهبات بمعنى أدق

دي بتكون طربيزة عليها من ست لعشر بنات

رافضين تماما فكرة ان المجتمع مكون من ولد و بنت

و مش مقتنعين ان أبدا أبدا ان عشان تخلف و تنتج

فلازم كروموسوم اكس يمتزج مع كروموسوم اكس أو واي

معرفش ايه وجهة نظرهم بالضبط في الحياة

لو قرب ولد ظريف لطيف يختي عليه ... احم احم

ممكن كرسي ؟؟

يدوله نظرة كلهم كأنه شتمهم

الكـــــــــرسي محــــــــــــــــجوز

الولد يجري من الخوف

يا فكيــــــك

و تلاقي طرابيزة السايبر

رغم ان عندنا سايبر في الكلية نت و طباعة و بلي ستيشن

إلا انهم رغم كل الظروف و المعوقات و الروائح المقززة و الدخان و قلة الكراسي و الازعاج

فهما مصممين انهم حيلعبوا في الكافيتريا و يعملوا زحمة

و آخر حاجة طرابيزة اللي بيلعبوا صلح و اكس أو

و آه يا قفا آه يا قفا آه ه ه ه ياااااا قفا

مش معناها ان مفيش طرابيزات طبيعية

حاش و كلا طبعا

كفاية الطرابيزة بتاعتي

ست بنات , تلات ولاد , اتنين لسه مش عارفين هم ايه بالضبط احم ....

أنا

البنت اللي قريب بدل البؤبؤ في عينيها حيطلع قلب حب

البنت المكتئبة على طول و جايبالنا النكد

البنت تيتة الحجة اللي عيب و حرام و لماذا و كيف

البنت اللي مأنتمة مع عمرو دياب من تحت و مع عمرو خالد من فوق

البنت اللزقة

الولد اللزقة

الولد اللزقة التاني

الولد اللي لازق للولدين اللزقة

صداع

صداع عارفة جالكم صداع

يعني عشان بس أكمل خيري عليكم

و محدش يقول قريت كل القصة التافهه دي من غير ما استفيد

لأ معنديش أنا الكلام ده

احنا في عالم الاختلافات

زي ما الناس متقبلاك

اتعلم تتقبل اختلافهم

احترم خصوصياتهم

افهم تصرفاتهم

و في النهاية ما تحرمش نفسك من فرصة صداقة

مهمها كان اللي قدامك ده بعيد عنك في التفكير و الأسلوب

أكيد في يوم من الأيام حتلاقي حاجة مشتركة

قميص أحمر , قميص أزرق

خدت بالي دلوقتي اني دخلت في شهري التاني للبلوج

يعني يعتبر انجاز بالنسبة ليا اني اتحملت اكتب كل ده

في العادة أكتب كام حاجة و اقفله

بس قررت أكتب و ما يهمنيش

و الحمد لله صحابي حبوا البلوج جدا و أتمنى انه يكبر و يزيد عدد المتابعين له

ححكيلكم قصة هبلة كده حصلتلي في العيد

واقفة قدام المراية ببص لنفسي

استعدادا للخروجة البهية اللي حخرجها أنا و ماما

رايحين نزور واحدة صاحبتها من ابتدائي

ما شاء الله أكتر حاجة بتعجبني في ماما

ان عندها تلاتة صحاب من ابتدائي

تروح , تسافر , ترجع , تغيب

التلاتة ما شاء الله عليهم بيحبوا بعض جدا

المهم

ببص للميك آب

يوووه بقا هو أنا رايحة اتخطب مش حاطه

أبص للبيرفيوم

امممممم

طيب بلاش نتانة ححط منك ما تبصليش كده يا عم ازازة انت

أبص للمراية تاني

قمر يا خواتي ميك آب ايه بس

بضحك على نفسي عشان مكسلة أحط

ماما ورايا

حطي حاجة في وشك يا نانسي

كحلة و بودرة , أي حاجة كده

ألف و أبصلها و تقريبا فهمت قصدها

و أسل السؤال بكل براءة

ماما هو ولاد اختها حياكلوا معانا ؟؟

معرفش يا نانسي , انتي و أسئلتك الغريبة دي , حطي حاجة في وشك يلا

و مفيش لبس أديق من كده شوية ؟؟

يا ماما أنا رايحة فين بس ؟؟

اتأخرنا يلا بينا مفيش فايدة

روحنا و معانا تورتاية حلوة كده من كلاسيك عشان العيد

طلعت السلم و ببص لماما مستنياها تقف جنبي قبل ما أخبط

ماما خبطي يلا و هي لسه في نص السلم

حاضر يا ماما

أرن الجرس

تررررن تررررن

و يفتحلي شاب عريض المنكبين , طويل الساقين و ابتسامة براقة

أنا في عقل بالي : آه منك يا ماما و يا طنط , كنت حاسة انه كمين !!!

و فلاش باك على الميك آب اللي مرضيتش أحطه

الولد اتفضلي

و أنا فينك يا ميك آب بس

فوقي يا بت

و أدخل أحط التورتة على طربيزة و أنط على كنبة جوه

مفيش ثواني الولد دخل

هو

بس

مش

هو

اممممممممممم

يادي النيلة

هو لحق يغير قميصه امتى؟؟

و غيره ليه ؟؟

القميص كان أزرق

ايه اللي قلبه أحمر ؟؟

شكلي كده بخطرف من الكسفة

دخل القميص الأزرق ورا القميص الأحمر

يا حلاوة يا ولاد

دول بقوا اتنين

شكل الصنف كان معمول بمزاج المرة دي

و اكتشف انهم توأم لما طنط تقولي شايفة محمد و على يا نانسي

ولاد اختي

ما شاء الله عليهم

عندهم 25 سنة و متخرجين و لسه عاملين مشروع سوا

أنا أهلا و سهلا

و مرجان أحمد مرجان شغال في التلفزيون

أبص للفيلم كأني ما شوفتوش سبع تلات خمسوميت مرة

بحاول أشتت تفكيري اللي على يميني واحد و على شمالي واحد

يا مامي أنا خايفة

طيب أفهم بس

هما حيقسموني بالنص ؟؟

اممممممممممم

شكلها عيلة حبوبة كده و بيحبوا يحسسوا ضيوفهم انهم في بيتهم مش أكتر

يمكن أنا فهمت غلط من خبراتي الحياتية المفجعة في تاريخ العلاقات

مفيش ثواني

أنا بحاول أقنع نفسي بإن أنا اللي مخي مش لطيف

و هوبا القميص الأحمر اتكلم

انتي بتدرسي ايه ؟؟

أنا أوباااا أول سؤال من الأسئلة المقدسة اللي مالهاش معنى عند أي ولد

بدرس ادارة نقل دولي و لوجيستيكس

يا رب سترك

فجأة القميص الأزرق اتكلم

بتدرسي فين , أبوقير و لا ميامي ؟؟

أنا إرسولكم على بر

واحد بس اللي يسئل

أبو قير

القميص الأحمر : أنا درست في الأكاديمية كورسات كومبيوتر كتير

القميص الأزرق : و أنا كمان

أنا : آه مهو أنا باخد أي سي دي ال هناك في ميامي

الأحمر : و أنا خدتها من هناك

الأزرق و أنا كمان و خدت كذا من هناك

الأحمر : و أنا كمان

جالي صداع من صدى الصوت اللي في ودني

ما انتم توأم فهمت خلاص انكم فولة و اتقسمت نصين

طنط تدخل

اسئلها يا علي بتدرس ايه ؟؟

سئلناها خلاص

طنط : طيب كويس

مظاهر المؤامرة بتبان كل شوية

طب مين علي ؟؟

هي كانت بتكلم أي قميص فيهم

طيب ركزي يا بت

القميص الأزرق شكله ظريف

طب دول توأم ظريف ايه بس!!

الاحمر بيكلمني

لأ و النبي الأزرق فين

ساكت

آه الصنارة غمزت غلط

و يقعدوا ساعة يتغدوا

و ساعة يتكلموا على القطة بتاعتهم

و كده

و ابتديت أنام في مكاني

فعلا بتكلم جد

أنا بنام في مكاني في أي حتة

روحنا

و ماما شغلت إسطوانة شباب زي الفل

لو يجيلك ولد زي دول أوافق على طول

أنا بحب الشباب البيتوتي المحترم المتربي

مش بحب أزعل ماما

سبتها لأني عارفة ان الصنارة غمزت غلط و اني تجنبت أدي أي كونتاكت بأي وسيلة فضائية في الكون

رغم ان كان فيه أكتر من تلميح و أكتر من فرصة للكلام ده

لأني مش فريسة تتحط في كمين

لااااااااااا

مش أنااااااا

أو عشان بتلكك و بتحجج دايما على رأي واحد من صحابي

دي حدوتة العيد

كل فترة حصدعكم بواحدة من دول