27 april

يميني , شمالي

مشكلة البنات الرئيسية هي العاطفة الجياشة الزيادة اللي عندهم

لو فيه شركة و كل مجلس إدارتها سيدات

و جم فجأة كلهم اللي حبيبها مزعلها و اللي شافت فيلم حزين و اللي نفسيتها تعبانة 

بتلاقي المؤسسة بتنهار

ما كنتش بتصور أبدا ان ممكن العاطفة عند البنات تكون سبب في فشلهم أو سبب في سقوط المشاريع اللي بيشتغلوا فيها

عشان كده دايما لازم يكون فيه توازن

ما بقتش فاهمة نفسي خالص بقالي فترة 

فجأة زعلانة 

فجأة فرحانة 

فجأة مش عارفة

أحيانا مش بلاقي مبرر حتى أقوله لو حد سئلني مالك ؟؟

لأن أنا نفسي معرفش مالي 

ببقا مش فاهمة حتى أنا وشي مرسوم عليه ايه ؟؟

ببقا مش حاسه بحزن لكن تقريبا وشي , عنيا بيقولوا حاجة تانية

اكتشفت اني في الفترة الأخيرة ممكن أغير المود بتاعي بسهولة عن طريق اني أشغل أغنية 

أسمع موسيقى , أتفرج على حاجة , حسب بقا عايزة أيقى حزينة , مبسوطة 

ممكن أنكد على نفسي بكل سهولة و ممكن أبسط نفسي كمان

بس الحقيقة اني أنا نفسي ما بقاش عارفة أنا عايزة ايه أصلا ...

على راي الأغنية الهابطة

احساس غريب معرفش مالي

ما بقتش عارف يميني من شمالي

زمان و أنا صغير

فاكرين زمان و إحنا صغيرين ؟؟

كان حجر أي حد كبير ممكن يبقى سرير لينا

الدبدوب ممكن يبقا مخدة

الفراشة كانت لعبة نجري وراها

ورق الشجر , الورد , الاصداف , كانت كلها سلاسل و غوايش و اكسسوار

كنا بنعرف نتبسط قوي

نقعد على الرملة في البحر و نرسم كل حاجة نفسنا فيها

قصر كبير

حبيب , صديق , أب , أم , أخ , أخت , حد قريب حد بعيد

العاب و ورد و شوكولاته و حصان بيطير

ما كناش بنزعل من بعض أبدا

لو حد خاصم التاني مفيش دقيقتين و تلاقينا نرجع  نلعب سوا و نتخاصم مرة و اتنين و تلاتة

بس بنام و احنا بنحب بعض و ممكن في نفس السرير كمان , حاضنين نفس الدبدوب

ما كناش بنخاف من حاجة

و لو خفنا كنا بنلاقي حضن نجري عليه و نعيط

حد يطبب علينا , يحبنا , يغطينا بحنانه

عمرنا ما كنا بنغير من بعض و لا بنعتبر بعض أهداف و لا مصادر تهديد

كانت علاقتنا ببعض حلوة , بنتصاحب مش عشان لونا و لا شغلنا و لا اهتمامتنا

كنا بنتصاحب عشان ضحكة اللي قدامنا حلوة و عشان عايزين نجري ورا بعض طول النهار و نفرح

ما كانش حد بيشيل من حد و لا حد يفضح حد و لا حد يذل حد

كل واحد في ملكوت عامله لنفسه مع أوراقه و ألوانه بيرسم اللي نفسه فيه

ما كناش بناخد بالنا احنا لابسين ايه ؟ و لا شكلنا ايه ؟

تلاقي نفسك متصور بفوطة و لا و انت فطسان من الضحك على شكل باباك و هو ماسك الكاميرا

عمرنا ما كنا نضحك في وش حد نفاق أو عشان عايزين منه حاجة , اللي عاجبنا عاجبنا

و اللي مش عاجبنا مش حنبصله أصلا و لا نضطر نتعامل معاه

يا ريتنا فضلنا صغيرين طول عمرنا

على الأقل كنا عمرنا ما عرفنا نحب إلا الناس اللي بتحبنا

على الأقل كنا فضلنا بنضحك على طول مفيش حاجة تخلينا نعيط إلا عشان عايزين ناكل

على الاقل كنا لقينا حد يغطينا كل يوم لما الغطا يقع من علينا

على الأقل لما حد يضحك علينا كنا حنام و ننسى اللي حصل

على الأقل كنا فضلنا كلنا صحاب و أكبر همنا " هو دبدوبي راح فين ؟؟ "

افتكرت الأغنية دي و أنا عمالة أفكر في كل اللي بيحصل

زمان وانا صغير كنت بحلم ابقى كبير تعب القلب واتحير م الدنيا وم المشاوير

الحلم كان برىء مفروش بالورود والقلب كان جرىء مليان بالوعود

ولما كبرت قولت يا ريت ما كنت حلمت ولا اتمنيت قولت يا ربتنى فضلت صغير زى زمان

انا من صغر سنى حاسس بشىء جوايا

وحلمت زمان اغنى والكون يسمع غنايا

غنيت غنيت وفى وسط الغنوة بكيت

ولقيت الكون كله بيتغير قولت يا ريتنى فضلت صغير

حلمت زمان ببيت وبقلب يكون معايا

وم الاحلام صحيت على جرح ملوش نهاية

وداريت وداريت الجرح فى قلبى داريت

ولقيت العمر يا دنيا قصير قلت يا ريتنى فضلت صغير

الدنيا ربيـــع

الدنيا ربيع و الجو بديع

قفلي على كل المواضيع

قفل قفل قفل قفل

مفيناش كاني مفيناش ماني

كاني ماني ايه

دا الدنيا ربيع

الدنيا ربيع الدنيا ربيع

الشجر الناشف بقا ورور

و الطير بقا لعبي و متهور

واحنا هنفرفش امتى امال

دلوقتي والا في سبتمبر

قالك قالك قالك ايه

قالك اه

قالك قالك قالك ايه

قالك اه

قالك فرفشة اليومي

متأجلهاش للغد

و اللي هنظبته مهموم

راح نزعل منه بجد

الدنيا ربيع و الجو بديع

قفلي على كل المواضيع

قفل قفل قفل قفل

مفيناش كاني مفيناش ماني

كاني ماني ايه دا الدنيا ربيع

الدنيا ربيع الدنيا ربيع

يلا مباراة يلا مسابقة

مين اشطر في الضحكة الرايقة

ابو دم خفيف

طبعاً يكسب

و ابو دم تقيل

طبعاً لأ

الورد مفتح شوفوا شوفوا

بيرقص و يداري كسوفه

واللي يحب النبي ياخوانا

عالواحده يصقف بكفوفه

لالالاه لاه لا لا

لالالا لا ولا لا

قالك قالك قالك ايه

قالك اه

قالك قالك قالك ايه

قالك اه

قالك وصفة بلدية

للصحة و طولة العمر

خد شمس و هوا على ميا

بلا دوا بلا عيا بلامر

والدنيا ربيع و الجو بديع

قفلي على كل المواضيع

قفل قفل قفل قفل

مفيناش كاني مفيناش ماني

كاني ماني ايه دا الدنيا ربيع

الدنيا ربيع الدنيا ربيع

كلمات .. مجرد .. كلمات

دي الكلمات اللي كتبتها من سنة تقريبا عشان مجلة كنت بكتب فيها
حبيت أعرضها عليكم عشان عجبت كتير من صحابي
علما بإنها مجرد تأليف و تخريف ,
 ياريت أصلا يبقى فيه حد ممكن تحس بالحاجات دي ناحيته

حبيبي قد تخونني الكلمات في التعبير عن حبي لك

 

بسيطة أنا في نظراتي , تعرفني و تعرف قلة حيلتي

احترت في عشقك , هل هو مستمر أم إلى القاع منتهي

 

ترتجف مشاعري و تختبأ حين تراك خوفا من أن تشعر بها أو أن تصلك رغما عني

 

أختبئ في ثياب من لا تهتم بك حتى أريحك و أرتاح

 

سعادتك أكبر همي , فرؤية الإبتسامة على وجهك هو ما ينير بقية يومي

 

تتراكم الهموم و المشاكل فلا تراني سوى سعيدة و مبتسمة حتى لا تحزن لأجلي أو أشغل بالك

أدعو خالقي أن يهديك إلى طريق السعادة فتقترب منه و تشرب من ينابيعه

اطمئن على أحوالك دون أن أشعرك فلا تدرك ما قصتي معك و ما حالي

 

يتوقف فؤادي عن النبض لثواني إذا شعرت أن مكروها أصابك

 

و لا أرتاح حتى أسمع الخير عنك فتقر عيني و تهدأ

إذا أغمضتها رأيتك تبتسم , تضحك , تتضايق هذا و تداعب ذاك

 

فلا تغيب صورتك عن خيالي

 

إذا استسلمت للنوم فإنك لا تفارقني في احلامي

 

فأدرك أن ما تجاهلته في الصباح لن أهرب منه في نومي

 

لكني عندما أستيقظ أعود لأرض الواقع و أدرك أن ما هدمته يداي لن يصلحه الزمن

 

و أنه مهما بلغ حبي و عشقي لك فإنه لا يساوي شيئا مقابل محاولاتك معي و صدي المستمر لك

تدرك طبيعتي و خجلي فتستحي مني و تبتعد

و أدرك الخير بداخلك و طيبة قلبك و صفاء نيتك فتجدني منك أقترب

تتلاعب بنا الأقدار و الأيام فلا نعود نعلم ما يحدث لنا

 

و نستيقظ فجأة و قد اختفى أحدنا من حياة الآخر ربما للأبد و ربما لا

لكن الحقيقة أن شيئا بداخلنا قد يكون مصيره الموت

 

فلا سبيل لإعادته إلا بكلمة قد تقال و قد لا تقال

أسرار

فيه ناس حياتها مليانة بالأسرار بشكل مش طبيعي

ليهم حدود في خصوصيتهم واضحة ما ينفعش تعديها

من كام يوم شفت واحد كده من الناس اللي اتعرفت عليها جديد

كان مشغل خاصية البصمة على اللاب توب بتاعه

بصراحة استغربت , يعني معتقدش جوا اللاب الملفات الوزارية يعني ؟؟ و لا ايه ؟؟

بالنسبة ليا عمري ما حطيت باسوورد حتى على اللاب توب بتاعي

معنديش مانع إن أي حد يعرف أي حاجة من حياتي

مش شايفة في الموضوع مشكلة من الآخر

عندي واحدة صاحبتي متجوزة من كذا شهر

شفتها بمسك موبايلها لقيت عليه باسوورد فقلتلها يا روقانك حاطة ليه ؟ ايه الشلل ده ؟؟

قالتلي عادي أنا متعودة على كده

قلتلها و جوزك عارف الباسوورد طبعا

قالت لأ طبعا

أنا قلتلها و ساكت ؟ عادي عنده ؟؟

قالت آه احنا موافقين ان كل واحد يكون له الخصوصيات بتاعته

فكرت كده مع نفسي

حسيت إن الموضوع مش خصوصيات , أنا حسيته له علاقه بالثقة أكتر

أنا برمي الموبايل في إيد صحابي عادي , و لا عليه باسوورد و لا بطيخ

بسيب اللاب توب بره في المكتبة معاهم و ادخل عادي

حتى من يومين قلت لواحده صاحبتي تاخد اللاب معاها و هي مسافرة إذا ملحقتش تشتري واحد قبل ما تروح

إذا البني آدم واثق في اللي حواليه حيعيش مرتاح , مبسوط

بس لما كل واحد يحطلي بصمة , و باسوورد و بعد كده حتبقا بصمة العين و الصوت بالمرة

يبقى راحت فين الثقة بين الناس ؟؟ راحت فين الصداقة ؟؟ راح فين الحب ؟؟

لما يبقى اتنين متجوزين عايشين كده يبقا ايه اللي عيالهم حيتربوا عليه ؟ ايه اللي حيكبر في دماغهم ؟؟

طب مش الممنوع مرغوب ؟؟

ليه نسيب اللي قدامنا يفكروا فينا بشكل غلط و لو لثانية ؟؟

قبل ما تمنع حد يدخل حياتك

اسئل نفسك

ايه اللي انت مخبيه ؟؟

ايه اللي البنات عايزاه ؟

من كام يوم حصل موقف غريب شوية

واحد من صحابي اللي زي خواتي جدا سئلني : " ايه ده !!!! حصل ايه ؟؟؟ "

أنا لثواني سهمت كده و بعدين لقيته بيبص لظفري المكسور

فقلتله ده من الحفلة اتكسر , فاكر كنت حاطة بلاستر عليه

لقيته فاكر

استغربت شوية و في نفس الوقت عجبني الموقف

أفتكر قبل كده ان إيدي كانت مفكوكة و كنت حاطة دعامة عليها لمدة اسبوعين ,

كانت بتوجعني , لما كان أي حد بيشوفها كان بيقولي سلامتك و خلاص

بس لما حد معين افتكرته حياخد ساعتها ما أخدش باله منها خالص , كأنه مش شايفها

مفهمتش ليه

بالتفكير في الموقفين مع بعض فكرت

ايه اللي البنات عايزاه ؟؟

البنات عايزة حد ياخد بالها منه

عايزة حد يقولها كلتي ؟ شربتي ؟؟ عاملة ايه ؟؟

عايزة حد يواسيها و هي عيانة , يزعقلها لما ما تاخدش الدوا , يغلس عليها كل شوية لغاية ما تخف

عايزة حد يسئلها عملت ايه في شغلها , حد يتطمن عليها لما تطلع من الإمتحان أو من انترفيو

عايزة حد يجيبلها سلسلة هدية قلب تحط صورتهم فيها و
 تفضل لابساها قريبة من قلبها تفتكره بيها

عايزة تفتح شنطتها تلاقي وردة حمرا , رسالة صغننة مكتوب فيها أربع حروف بحبك

عايزة تنام و هي مستريحة انها مش حتموت من غير ما حد يحس بيه لأن فيه دايما حد بيتصل يتطمن عليها

عايزة حد يقولها خدي بالك من نفسك , تصبحي على خير , صباح الخير , صباحك سكر و عسل و قشطة كمان

عايزة حد مش بيشوف غيرها , حد بيحس نفسه و لا حاجة من غيرها , حد شاريها , حد بيعتبرها كل حاجة في حياته

عايزة حد تكون اختارته زي ما اختارها

حد يهتم بالتفاصيل الصغيرة في حياتها 


راجل معاها , يفتحلها باب , يعديها قبله ,
 ما سيبهاش تتعب و لا تشيل حاجة و هو جنبها


حد يتقي ربنا فيها و يساعدها في علاقتها مع ربنا

يصلي بيها , يدعيلها و يتابعها دايما

حد ما يخنقهاش و لا يقرفها


حد يغير عليها و يخاف بجد 


حد يحب اهتمامها مهما كان ممكن يعتبرها تافهه


حد يعتبرها بنته ساعات فيجبلها لعب و دباديب


و أخته ساعات فيطبب عليها


و أمه ساعات فيحترمها


و زوجته و حبيبته فيحافظ عليها

حد يكون بيحب يتكلم معاها , يشتكيلها همومه و تشكيله همومها

عايزة حد يحضنها بكلامه , بإهتمامه , بنظراته

عايزة حد يعرف يعتذرلها لو غلط , و يسامحها لما تغلط

يمكن تكون عايزة كتير

بس كل واحد من حقه يحلم

يعيش

يحب