اكتشفت أخيرا مشكلتي الحقيقية في موضوع الإرتباط و الجواز و الذي منه
أنا الحمد لله شايلة الموضوع من بالي تماما من مارس اللي فات
ادركت تماما إنه مجرد قضاء و قدر و إن فيه حد مكتوبلي أتجوزه من قبل ما أتولد
قبل مارس اللي فات كنت نوعا ما عندي أمل في قصة حب حلوة تنتهي نهاية افلام الكرتون الرومانسية اللي بحبها
مع إني برضه مش مقتنعة بموضوع الإرتباط الغير رسمي
قناعتي بتقول إن الواحد ممكن يحب في النور دايما
المهم السؤال اللي كان دايما بيطرح نفسه أنا ليه دايما موعودة بالعاهات ؟
الغشاش و الكداب و المريض النفسي و الأهبل و العبيط و اللئيم و السيس
ليه دايما اللي ييجي يكلمني بيبقا مقرف لدرجة إني أقضي اليوم عياط عشان بسئل نفسي إزاي ده كلمني أصلا
و ليه دايما حتى الكويسين فيهم و اللي بياخدوا الموضوع بشكل جدي و عائلي بيطلعوا مقلب في الآخر
حصل معايا موقف فسرلي كتيـــــــــــــــــــــــــــر قوي
كان معايا شاب في كليتي
ولد كويس , اجتماعي , نوعا ما عارف ربنا , طموح
معرفش عنه كتير بصراحة , بس مبدئيا هو بني أدم محترم
اتفاجئت من شهرين بسؤاله ليا إذا كنت مرتبطة أو لا
فكان ردي عليه تتنيحة طويلة الأبعاد , جا وراها " لا أنا مش برتبط و مش بعترف بالإرتباط من أصله "
سئلني ليه فجاوبته " أنا ماليش خلق نظام أجيبلوا عصير و يجيبلي ساندويتش و تعالي يلا في الكافيتيريا و يلا بينا نخرج نلعب صلح ورا الشجرة و تلفونات للصبح في كلام فاضي و بحبك و بتحبني و بموت فيك يا حبيبي "
لقيته بيضحك و بيقولي ده إنتي نظرتك للحب و العلاقات ضايعة خالص
رديت " مش حكاية ضايعة بس أنا مش صغيرة و ما عملتهاش و أنا مراهقة مش حعملها و أنا عندي 22 , اللي عايزني بيتنا مفتوح و البواب بتاعنا ظريف مش بيعض "
قام مكمل ضحك و لقيته بيقولي انتي باينك نكتة و اتكلمنا دقيقتين كمان و كل واحد طلع محاضرته و انتهى الموقف
خلال الشهرين اللي فاتوا طورنا علاقة صداقة أخوية , ده على الأقل من ناحييتي
ما تصورتش إنه حاططني في باله خالص , معرفش ده طيابة مني زي ما سمعت و لا هبل إني ما فهمتش إن سؤاله كان تلميح ليا
كان الكلام لا يزيد عن المحاضرات و الدكتور فلان و حاجات كده كل كام يوم لكام دقيقة
اتفاجئت بعد الإمتحانات انه عايز يتقدملي
في البداية أنا ارتبكت جامد , لأني رسميا معرفش عنه حاجة
نفسيا مش حاسة ناحيته بحاجة
المهم بقا سكتت فقام مكمل كلام و قايلي
" بس لازم تعرفي حاجة عشان أكون صريح معاكي "
قلتله اتفضل
قام رد " أنا بصراحة مش بطلب منك أكلم أهلك على أساس قلبي , لأ الكلام ده نابع من عقلي "
لثواني كده أنا تنحت و بعدين قلتله " مش فاهمة "
فكان رده " يعني أنا مش حاسس ناحيتك بحاجة "
عارفين فجأة لما الجني الشرير يطلع على كتفك الشمال و يقول " نععععععععععععم يا خويااااااااااا ؟ " إديله في بطنه
و النفس الطيبة تتطلع على كتفك اليمين " لا معلش يا نانسي استحملي , ما تقوليش حاجة خالص "
في اللحظة دي كنت بميل إني أسمع كلام الجني الشرير نياهاهاهاهاها , فكرت في كل وسائل التعذيب اللي ممكن استخدمها ضده
بس نفسي الطيبة غلبتني و قلته " ايه اللي يجبر حد يتقدم لحد مش حاسس ناحيته بحاجة ؟ "
فكان رده فيه مفتاح الحل لكل اللي شفته قبل كده
" أصل أنا قلت لنفسي حرام بجد , هو كل يوم بتشوف واحدة زي نانسي
إنتي يا نانسي فيكي مواصفات أي شاب يتمناها في مراته كذا و كذا و كذا و كذا و كذا ( قال حاجات كتير قوي لا داعي لذكرها عشان مش بحب أنفخ في نفسي ههههههههههههه ) "
كمل كلامه ب" إنتي بنت مناسبة جدا و فرصة لأي حد عايز يستقر و أنا قلت لنفسي نتخطب دلوقتي و يمكن أحس حاجة ناحييتك بعدين "
كنت نوعا ما عايزة أضربه و هو بيتكلم بس ساكتة
من معالم وشي أدرك إني مش موافقة خالص و سئلني عن السبب
كان ردي بإنه يعرفني من شهرين و لو كان حيحس ناحييتي بحاجة كان حس من زمان
قلتله " يا فلان الأحاسيس دي مش تحت أمرنا ,
انت في يوم من الأيام حتلاقي بنت دخلت من الباب قدامك
و إنت واقف في أي حتة ,
حتحس قلبك طلع من مكانه و حتلاقي نفسك بتقول هي دي مفيش غيرها "
قالي بس أنا مقتنع بيكي بجد ,
قلتله و أنا أستاهل حد يجيلي عشان بيحبني و بيحب الأرض اللي بمشي عليها
حد يبقا راحته النفسية في إنه يشوفني مبسوطة ,
حد يبقا شايفني من جوه قبل ما يكون شايف إني كويسة و ست بيت شاطرة و الكلام ده
حد فعلا حاسس إني حتة منه
قام ساكت و قالي زي ما تحبي و انتهى الموضوع على كده
حكيت لأكتر من حد على الموضوع من خارج وسط الكلية عشان كليتنا دي بيحبوا يتكلموا
فكان ردهم الموحد " عبيط ده و لا إيه ؟ "
أنا لما فكرت , قلت لنفسي على الأقل كان واضح معايا
بس أدركت بعدها حاجة مهمة
فعلا كل اللي كانوا عاملين فيها بيحبوني
و كل اللي اتقدمولي و كل العاهات و الصدمات اللي شفتها في حياتي
كان فيه شيء مشترك بينهم
و هو الصفات المشتركة بيني و بينهم اللي بالعبيط
و إنهم كلهم شايفيني بنت ما حصلتش و ممتازة
عشان أوضح الفكرة , هو كام مرة في حياة الولد ممكن يلاقي بنت
بتحب الإنمي ( الكرتون الياباني ) و الجيمز بأنواعها و متابعة الكورة و الماتشات
و بتلعب رياضة و في نفس الوقت كل لبسها بينك و صوتها واطي و بتسمع الكلام
و بتعرف تطبخ و من أوائل دفعتها و على رأيهم أخلاق و مالهاش خبرة أو بريئة زي ما بيقولولي
مش بنفخ في نفسي و الله ,
بس أنا عارفة إني مزيج صعب ,
بنت بجد بس و اهتماماتي بناتي
لكن في نفس الوقت ليا اهتمامات كتير خاصة بالولاد
للأسف العيب اللي اكتشفته في نفسي إني مش بكرهه حاجة ,
فالصفات اللي ممكن تظهر مشتركة بيني و بين أي حد
بالذات لو ولد حتبقا كتير قوي بشكل غير طبيعي
و غريزيا الولد لما يلاقي بنت بتحب كل اللي بيحبه
رغم إن اهتماماته دي صعب إن البنات يحبوها
أكيد شيء طبيعي إنه يتقرب منها حتى لو مش حاسس ناحيتها بحاجة
و تكتشفت كمان إن شكلي الطفولي ده عامل جذب بشكل مرضي
بالنسبة لراغبي الإرتباط و الجواز
معرفش ليه بس الولد بيحب البنت اللي شكلها طفولي
و بيفتكروا إن الشكل ده له علاقة بالمخ
الشكل حاجة و المخ حاجة تانية خالص و الله
, بس مين يصدق
, الشباب مخهم متركب على إن البرائة تبدأ في الوش
المهم بعد كل الكلام اللي كتبته ده مش عايزة أصدعكم
اللي عايزة أقوله إن لو الواحد فينا اتكرر معاه موقف معين
مرة و اتنين و تلاتة
و بقا كل ما يفتكر إنه خلاص لقا البني الآدم المناسب يروح واخد على دماغه
ده مش لعيب في الناس و بس
لأ ممكن العيب يكون مننا إحنا كمان
يعني أنا اكتشفت عيبي و هو إني بتعامل مع الناس بسذاجة زيادة
و بسمحلهم يعرفوا الحاجات اللي بحبها و اللي أي ولد ممكن يتعلق بيها
فلازم نحاول نعرف جذور المشكلة و نحلها
أو على الأقل ما نتصدمش لما تحصل تاني.
