و أنا قاعدة بفتكر الطيارة و الكويت و مصر
و حياتي اللي قضيتها بتنطط بين البلدين دول
و الطيارة اللي ركبتها فوق السبعين مرة
و أهلي المتقسمين هنا و هناك
افتكرت منظر كان حلو قوي
ترجملي كل حاجة حصلت في حياتي
و كل حاجة حتحصل بعد كده
بصيت من شباك الطيارة
لقيت الشمس بتغرب
كلنا عارفين جمال منظر غروب الشمس
لكن ما تتصوروش سبحان الله المنظر ده لما بتكون في السما طاير شكله عامل ايه
حاجة سبحان الخالق المبدع
الشمس مش بتغرب بالاحمر و البرتقالي و الألوان دي
لأ بتغرب بكل ألوان الطيف كلها
اشعاعات ملونة غريبة عمرك ما تشوفها و انت على الأرض
كان نفسي أصورها بجد بس الموبايل ممنوع في الطيارة
قعدت بصيت كده و بقول أنا ركبت طيارة مليون مرة قبل كده عمري ما شفت المنظر ده
يمكن لأن في حياتك ممكن تعدي على نفس المكان كل يوم و ما تاخدش بالك من الورد الجميل اللي فيه ؟
يمكن لأنك ساعات بتكلم شخص كل يوم و ما تتصورش انه ممكن يغير حياتك بكلمة ؟
ممكن لأنك تعيش ملايين المواقف لكن موقف واحد يخليك تنكسر و تضعف ؟
حياتنا بالضبط عاملة زي الشمس و هي بتغرب
ساعات بتغرب بلونين بس
و ساعات بتغرب بألوان الطيف
ليست هناك تعليقات:
إرسال تعليق