من كتر ما أنا مبهورة بالحلقة
مش قادرة استنى لما تخلص عشان أكتب عنها
عمالة أنط في كل اعلان أكتب سطرين
حلقة هشام 1 من مسلسل عايزة اتجوز
كسرت بكل المقاييس توقعات كل الناس
حتى و انت بتتفرج كل ما تتوقع مشهد ما يحصلش
و قاعد مترقب و مستني اللي حيحصل
بعد 28 حلقة من الإستفزاز و الضحك
و مش بقصد الإستفزاز الوحش لأ الإستفزاز بالتركيز على السلبيات زي ما قلت في البوست الي قبل كده
الحلقة أثبتت حاجة ان غادة عبد العال مش واحدة مش بتعرف تكتب
و لا واحدة عمالة تكتب في مسخرة من باب الهبل و خلاص
و لا واحدة زي ما الناس بتقول بتخرب المجتمع و تدمره
لأ دي فنانة و كاتبة محترمة
حلقة واحدة و أنا قاعدة أتفرج أحس بمليون احساس ؟؟
أعيط
و بعدين أضحك
و بعدين أكمل الحلقة و الإبتسامة خلاص حتتقطع من وشي
اللي يعمل كده في واحد من المشاهدين يبقى كاتب محترم عارف بيعمل ايه كويس
أنا لسه كنت كاتبة امبارح بشتكي من اللي عمالة أسمعه و أشوفه من الناس بعد المسلسل
ألاقيها النهاردة بترد على تساؤلاتي كأنها قرأت دماغي و عارفة ان الناس تفكيرها حيحصله كده على آخر رمضان
حتى اولاد اللي امبارح كانت بيشتموا و يقولوا هو البنات بس اللي تعبانين ؟؟
جابتلهم مثال ولد متبهدل في البيوت هو كمان
طب الناس اللي اتأثرت من المسلسل و ابتدوا يطبقوه بالعكس دول
هل لما يشوفوا الحلقتين الجبارتين ( أنا بتكلم لأني شامة ريحة حلقة جنان بكرة ان شاء الله كمان ههههههه ) دول حيبان عليهم انهم شافوهم ؟؟
و حيعرفوا ان كل شيء قسمة و نصيب ؟؟
و حيسلموا ان الجواز محدش له ايد فيه ؟؟
و لا زي ما قلت قبل كده احنا بنختار الغلط و نعلق عليه ؟؟
و الحلو نعمل نفسنا ما شفناهوش من أصله !!!!!
غادة عبد العال أنا بحترمك
و بحترم كل واحد دافع عن وجهة نظره مهما اتحارب و مهما اتهان و مهما الناس اتكلمت عليه
شكرا يا غادة
رغم ان مشاكلي بعيدة عن المشكلة المطروحة في المسلسل و من نوعية تانية خالص
لكنك علمتيني اني أدافع عن حقي
أكمل في اللي أنا عايزاه
أثبت نفسي
و مهما سمعت من الناس أو شفت
طالما أنا واثقة اني مش بعمل حاجة تغضب ربنا فأنا حرة نفسي
و مهما الكلاب و الشخصيات المريضة زادت حوالين البني آدم
فكل اللي لازم يعمله هو انه يعمل نفسه مش شايفهم و لا سامعهم و يكمل طريقه
شكرا ليكي جدا على البوست الجميل
ردحذفمش عايزة أقولك إن كانت في عينيا دموع و أنا بقراه
لأني إستحملت ناس كتير قوي من أول رمضان عشان عارفة إن الحلقتين الأخيرتين هيفهموا فيهم حاجات كتير يمكن ماكانتش واضحة من الأول
فضلت ساكتة و صابرة ..و الحمدلله البوست ده أكدلي إن صبري كان هو الإختيار الصحيح
سعيدة جدا إن المسلسل عجبك ..و سعيدة طبعا برأيك في كتابتي و شخصي المتواضع ..و كل اللي باتمناه إن أي حاجة اكتبها في المستقبل ترضي و تسعد ناس كتير
عيد سعيد :)
أنا مبسووووووووووطة جدا بتعليقك يا دكتورة بجد
ردحذفأول ما شوفت الكومنت بقول غادة مين ؟؟ لأني مش بيجيلي كومنتات غير كل فين و فين و آخر حاجة أتوقعها إن حضرتك قريتي البوست فعلااااااا
أنا بجد فرحانة إنك مبسوطة و فرحانة إني عرفت أوصلك وجهة نظر الناس اللي حواليا في المسلسل
و معلش هو احنا الشعب هنا كده دايما مستعجلين و دايما عايزين نحكم على الناس و خلاص من باب التسالي
لو تعرفي انتي غيرتي في حياة بنات كتير إزاي بجد
أقرب مثال امبارح واحدة صاحبة ماما من الطفولة كده زي طنط حشرية بس هي النسخة المعدلة الطيبة منها هههههه عمالة تزن إني أوافق يشوفولي عريس
كنت شوية و حخنقها بصراحة لأني دايما كنت بوافق و أقول جوايا حقولهم مش عاجبني و خلاص عشان يسكتوا
المرة دي أنا دافعت عن نفسي و من الأول رفضت انه يدخل البيت من أساسه
و ده مثال من عشرات الأمثلة اللي بتحصل مع صحابي
احنا رفعنا شعار احنا مش سلعة و أهم حاجة نبقى راضيين عن نفسنا لأن محدش حينفعنا غيرها و النصيب مش بينسى صاحبه
ربنا يوفقك في حياتك يا دكتور و من نجاح لنجاح ان شااااااء الله :)
ان شاء الله يكون عيد سعيد عليكي يا رب