حملة مش عايزة أتجوز

كلها حلقتين تلاتة و المسلسل اللي فجع البنات و نفش ريش الولاد

و جنن كل الأمهات قرب خلاص على نهايته

ما انكرش اني حبيت المسلسل جدا و كنت بتفرج عليه حلقة بحلقة و يمكن أكتر من مرة

لأنه مسلسل كوميدي بجد و الأفشات و المواقف فيه مضحكة درجة أولى

لكن اللي حصل في بيوت المصريين و الله أعلم بالبيوت بره مصر كمان

انها اتحولت لساحة حرب

مامتي : نانسي انتي فاضل كام شهر و تكملي 22 سنة ؟؟

أنا بكل براءة مش عارفة مش كتير يعني 

ماما : طب يا تلحقي نفسك يا حتنتهي زي علا

أنا : هااا ؟؟ يالهوي

أنا كنت بفتكر مامتي اتأثرت من المسلسل زيادة

أو ان عشان أن بنتها الكبيرة بقا و عايزة تفرح بعد التعب اللي  شافته طول حياتها

بس اتضحلي ان مش مامتي بس

على الأقل مامتي كلمتني مش أكتر من كده

أما بقية أمهات فتيات الشعب المصري كله شغلوا قانون الطوارئ

و ماشيين يعتبروا كل ولد هدف أو تارجت زي ما بيقولوا

المسلسل لينا كبنات معظمنا كان بيتفرج عشان يضحك

أو عشان كان بيحب الكتاب

أو عشان بنحب غادة و حربها ضد العرسان اللي الدستة بجنيه و الكسر

أما المسلسل للأهالي كان تحذير و اعلان لحرب نايمة بقالها كتير

سمعتها بودني ولد بيقول و أنا آخوت نفسي و اتجوز ليه ما البنات أكتر من الهم على القلب

أعيش حياتي و أكبر و لما أكبر أبقى أخلي ماما تجيبلي واحدة صالونات

نعم ؟
يعني إنتم فاكرين إن الواحد ممكن يتوفق في جوازة لو كانت دي نيته ؟

هو ده حالنا أول ما شفنا مسلسل مسكنا فيه كأنه الدستور و قررنا نمشي عليه ؟

طب ياريتنا حاربنا الفكرة اللي المسلسل بيحاربها و هيا العنوسة و العرسان اللي مش كويسة 

لأ ده احنا شفنا الوحش في المسلسل و قلنا نعمل زيه

كبنت عايشة لوحدها بقالي كام يوم بشوف حاجات غريبة 

بنات و شباب واقفين في البلكونات

مع ان سبحان الله المنطقة اللي أنا ساكنة فيها أفتكر آخر مرة اتفتح شباك

كانت أيام خالتي و جوزها مخطوبين و بيشاوروا لبعض من عشر سنين عشان مفيش موبايل

أطلع أنشر الغسيل ألاقي تلات ولاد في وشي

كل واحد بيبصلي كأني علا اللي بتسقي الزرع عشان تلفت نظر الشباب

أمشي لابسة فستان حلو أخدلي شوية كلام زي الفل ما شاء الله بجد على الأخلاق في نهار رمضان

أودي لجارتي كنافة و لا جاتوه ألاقيها تقولي ربنا يرزقك بإبن الحلال يا بنتي

مع انها نفس الجارة اللي بقالي سنتين بسلم عليها و أشوفها عمرها ما قالتلي حاجة زي دي 

طب عايزين تضحكوا بجد ؟؟

المسحراتي

أيوة المسحراتي اللي طوول رمضان كل يوم يدعيلي كمية دعاوي ما شاء الله جميلة جدا

فجأة من كام يوم لقيته بيدعيلي بالذرية الصالحة و ابن الحلال !!!!!!

يا ناس أنا واحدة بتتعلم و حتكمل تعليمها العالي ان شاء الله

لا فاضية لجواز و لا عايزاه

و من اللي شفته في حياتي سجلتها قاعدة

قعدة الحزانى و لا جوازة الندامة 

هو قرف و خلاص ؟؟

 هي نكد الوحدة مش أرحم من نكد الحياة مع حد تحس بوجوده انك وحيد ؟؟؟

جا حد كويس كان بها ان شاء الله و الجواز فوايده الدينية و الدنيوية و المعنوية كتير

و الحياة بين اتنين بيحبوا بعض طول عمرها كويسة
ما ينفعش أبدا أبدا أبدا
توافقوا على جوازة من غير مشاعر و حب
اللي بيعمل كده يبقى بيضحك على نفسه بجد 
و بيدمر حياته
مش قصدي حبوا و امشوا على البحر ماسكين ايد بعض
و قلة الأدب دي
قصدي تتقوا ربنا و هو حيرزقكم باللي يحبم و يصونكم 
و يخاف عليكم
و ده حتعرفوه و تحسوه 
حتى لو مكنتوش تعرفوا العريس أو الشخص ده قبل كده

ما حصلش نصيب يبقى الحمد لله الواحد حقق أحلامه و عمل كل اللي عايزة و أثبت ذاته في دنيته و آخرته ان شاء الله

أما للي رافعين راية قانون الطوارئ في بيوتهم بقولوهم

فوقواااااااا

يعني لو كان المسلسل اسمه عايزة أنتحر و كل حلقة اتنين تلاتة بينتحروا

حتروحوا تنتحروا و تقعدوا لعيالكم القعدة اللي انتم قاعدينها دي ؟؟

في الآخر بقول بطلوا تدوروا على المعنى الوحش في الحاجة

لأن ردة فعل الشعب دي ان دلت على حاجة فإنها بتدل اننا حنفضل زي ما احنا ورى

ناخد المعنى الوحش و نسيب الفايدة و المعنى الحلو

نقلد الغلط و نسيب الصح

نتصيد لغيرنا أخطاؤهم و نعيب فيهم

نروح نعيب في نفسنا الأول