النهاردة كنت بتفرج على برنامج اسمه صبايا
أول مرة أتفرج عليه بصراحة مع ان شكله برنامج مشهور
الموضوع أثر فيا فحبيت إني أساعد حتى لو بنشره
كانوا بيتكلموا عن عملية زرع القوقعة في الأذن
العملية دي بتساعد الأطفال الصم و البكم عشان يعرفوا يسمعوا و بالتالي يتكلموا
تخيلت منظر طفل صامت
مش عارف يقول ماما
مش قادر يقول بابا
زعلان , متدايق
كل اللي يقدر يعمله انه يصرخ و يصرخ عشان الناس تعرف انه عايز حاجة
البرنامج جمع 49 حالة من الأطفال من مختلف الأعمار عشان يعملهم العملية
العملية مشكلتها تكلفتها العالية , 170 الف جنيه للحالة الواحدة
فالحالات كلها محتاجة 8 مليون جنيه
اللي استغربته ان اتضحلي ان الحملة بدأت قبل رمضان
و لغاية دلوقتي مش عارفين يجمعوا المبلغ ده !!!!!!!
يعني بينما فيه مشاريع في البلد زي مدينتي كلفت 99 مليار جنيه
و في ملايين البشر في البلد , أكتر من 80 مليون بني آدم
مش عارفين يجمعوا 8 مليون جنيه ؟؟
ده أي مصنع ممكن يرميهم في شوية اعلانات على الطاير كده
يعني للدرجة دي احنا ما بنصرفش فلوسنا غير في التفاهة
أما لو الفلوس حتروح لطفل عشان يقدر ينادي أمه لما يحتاجها
فلأ بنتبع السبل الإقتصادية و نعمل نفسنا مش شايفينه
عموما
أنا حابة أقول ان اللي بيعمل خير بيقعدله
و دايما في يوم حتلاقي خيرك رجعلك
و حتشوفه قدامك
للتبرع
و بأي مبلغ
و الله ما تتكسفوش من أي مبلغ , العملية اللي اتعملت كانت معظمها من تبرعات 100 جنيه و أقل
و حتى لو عايز تتبرع بأقل من كده جمع عشرة جنيه من عندك على عشرة من كل واحد من صحابك و روح البنك و حطهم
يعني ساعد حتى لو بنشر الموضوع أو تجميع التبرعات الصغيرة
للتبرع
التوجه لبنك بيريوس
حساب رقم 30026 للدولار
حساب رقم 30073 بالجنيه المصري
الأفرع في الإسكندرية
سموحة : 38 شارع توت عنخ آمون ، سموحة - الإسكندرية.
العطارين : 15 شارع محمود عزمى ، العطارين - الإسكندرية.
المنتزه : 746 شارع الجيش - الإسكندرية.
لوران : 477 شارع الجيش ، الكورنيش ، لوران - الإسكندرية.
النبي دانيال : 29 شارع النبى دانيال ، العطارين - الإسكندرية.
و افتكر دايما ان مفيش حاجة بتروح كده , اللي يعمل خير أكيد حيشوفه في صحته و عياله و مستقبله إن شاء الله
ليست هناك تعليقات:
إرسال تعليق