أحيانا الواحد بيحس إن التاريخ بيعيد نفسه بطريقة مبالغ فيها
يعني ما تفهمش إزاي و ليه و عشان ايه ؟
كأن مسرحية كبيرة بتحصل و إنت مجرد ديكور تروح و تيجي فيها
و الغريب ان اللي كنت بتعتبره قبل كده غلطة و عدت
تحس انك ممكن تغلطها تاني و مستعد تتحمل عواقبها
رغم انك شاكك بنسبة 99 في المية من فشل اللي بتفكر فيه
لأن اللي معرفش قيمتك مرة أكيد مش حيعرفها تاني
بس ترجع تفكر , الهم يركبك من فوقك لتحتك و تحس بخنقة
بين صراع بين أجرب و ما أجربش
بين احساسين , احساس غريب مش فاهمة و احساس بيقولك خليك بعيد
قلبك أصلا ما بقاش فاضل فيه اللي ممكن يستحمل تجارب
تحس ان مهما الزمن مر عليك
مهما ضحكت و بكيت و عدت عليك لحظات حلوة و ذكريات وحشة
و عشت و نسيت و جربت تاني و تالت
الزمن بيجي يقولك فجأة , أوقف عندك , بص قدامك
و تلاقي نفسك في موقف مكنتش متوقعه
موقف رسمته في خيالك خمسيت مرة
في الأول توقعت انك أصلا حتعامل اللي قدامك بشكل وحش كأنك ما تعرفوش
و مع مرور الوقت توقعت انك حتمسك نفسك و تتعامل عادي و خلاص
و في النهاية بعد مرور وقت طويل توقعت انك حتضحك و تاخد الموضوع عادي
لكن تتصدم بالحقيقة , إنك لما اتحطيت في الموقف بقيت عايز الأرض تتشق و تبلعك
بقيت مش فاهم انت عايز تضحك و لا تعيط و لا تنجز و تجري
بالعربي كده تنحت و سقعت و ما بقتش عارف تعمل ايه
خلاصة القول اننا لعبة القدر , مكتوبلنا حاجات غريبة تحصلنا
أكيد وراها حكمة معينة , يمكن مش عارفينها بس أكيد مسيرها تبان قدام
يمكن أكون حاسة اني لازم أعمل حاجة
بس كل اللي عملته قبل كده جا على دماغي , عشان كده قررت ما أعملش حاجة
و أسيب الناس هي اللي تعمل
و في النهاية اللي ربنا عايزة حيكون
ليست هناك تعليقات:
إرسال تعليق