كعادتي في نهاية كل سنة بقعد مع نفسي
أرجع ل اللستة اللي كتبتها في نهاية العام السابق
و أشوف عملت منها قد إيه
لما عملت كده السنة اللي فاتت الحمد لله كانت المحصلة حلوة جدا
اللستة اللي كتبتها نجحت بنسبة تفوق ال90%
كنت واضحة مع نفسي و عملت كل اللي كنت عايزاه
لكن
بالرجوع للستة للي كتبتها على أمل اني أعملها في 2011
جالي احباط شديد جدا , معظم اللي كتبته معملتوش
معظم اللي كنت عايزاه ما اتحققش
1- للأسف معرفتش أنمي علاقتي بربنا غير في الأيام الأخيرة من السنة
و مش للدرجة اللي كنت عايزاها , 366 يوم راحوا كده على الفاضي
2-معهد دراسات السلام اتقفل بسبب الثورة و ما أخدتش أي كورسات فيه ههههههههههه
3-معدلي في الكلية ثابت , رفعت التيرم اللي فات من معدل التيرم لكن التوتال ثابت
4- الحمد لله ربنا وفقني في نقطة مامتي فأنا ما زعلتهاش السنة اللي فاتت خالص
5- أنا فعلا خسيت و مشيت على دايت و بقيت رفيعة زيادة عن اللزوم كمان هههههههههه
6- الحمد لله اتعلمت سواقة و سقت خلاص
7- للأسف معملتش أي حاجة في الشغل التطوعي و لا كأني كنت بعمله زمان
8- موضوع السيوف ده معملتوش مع اني كنت معاهدة نفسي أعمله :(
9- ما اتعملتش أسباني معرفش ليه
10-ما أخدتش التويفل
11-و طبعا ما قريتش غير كتاب واحد من أصل 12 كتاب
يعني من أصل 11 حاجة كنت عايزاها معملتش غير تلات حاجات
و للأسف عملت الحاجات التافهه اللي مش فارقة في حياة البني آدم من أصله
قفلت من نفسي خالص بكل صراحة
أصل حرام سنة كاملة تروح كده بلا أي فايدة
في حاجات كتير فيا اتطورت كشخص
و تجارب اتعلمتها و ناس عرفتها على حقيقتها
بس المهم اللي انا كنت حاطاه لحياتي
مش اللي الناس بتفرضه عليا
حابة اكتب لسته جديدة ان شاء الله للسنة الجاية
و ربنا يقدرني و أعملها
انتم بقا قولولي حساب 2011 اخباره ايه معاكم ؟
الاول كل سنه وانتى طيبه يا نانسى
ردحذفانا للاسف مش بعرف اعمل ويش ليست او حاجات لازم اعملها فى السنه
عشان مش اكتئب لما اجى احاسب نفسى فى الاخر والاقينى مش عملت حاجه
بس انا متاكده انى لو كنت عملتها كنت هلاقينى مش عملت الا حاجتين والا تلاته من الحاجات اللى عايزاها بردو :)
سنه سعيده عليكى وتحققى كل اللى بتتمنيه السنادى ان شاء الله
و إنتي طيبة يا قلبي
ردحذفلأ ليه الإحباط ده بس ؟
أنا رغم الإحباط اللي جالي قررت مع نفسي كده
إن ده حافز لعدم تكرار الغلط تاني و سنة جديدة تضيع مني
جربي كده و إن شاء الله تنجحي و ربنا يوفقك فيها
كل سنة وانتى طيبة يا جميل
ردحذفمش حجات عظيمة اوى يعنى
بس يعنى ممكن ابقى عرفت بدايات حجات كتير كويسة ممكن تتعمل وده شئ مهم جدا بالنسبة ليا ومبسوطة بيه جدا
:)ان شاء الله السنة دى تحققى كل اللى متحققش السنة اللى فاتت
تحيتى
انا حصلت لي حاجة كويسة قوي السنة اللي فاتت..
ردحذفبجد..
ومش مجاملة..
اني عرفت مدونتك..
ولو اني مش باظهر كتير..
بس لما باجي (للامانة) انت وعدد قليل من الناس..
باحس اني خسرت في الوقت اللي مش كنت موجود فيه.
عجبني البوست قوي
وعجبني اكتر عنوانه.
ميرسي على الكلام الجميل ده يا أستاذ تامر
ردحذفأنا اللي سعيدة إن ليا متابعين زي حضرتك
شرفني مرورك و تعليقك اللطيف