مش عارفة ايه الفكرة في الحكاية اللي منتشرة جديد بين الكابلز و الخاطبين
و بتبقى زايدة عن حدها قوووووووووي بين المتجوزين فعلا
موضوع الكتابة لبعض على الفيس بوك
تلاقي واحدة متجوزة كاتبة الستيتس بتاعتها النهاردة
" أنا متجوزة أجمل واحد في الدنيا "
و يدخل هو يعملها لايك و يرد عليها
" معرفش من غيرك كنت حعمل ايه في الدنيا ؟ "
و بعدين تلاقي 21 كومنت كاتبينهم لبعض
و لو اتصلت بيهم على البيت حتلاقيهم قاعدين جنب بعض !!
مش عايزة أقول كلام عيب , بس ما إنتم قاعدين في بيت واحد
الموضوع سهل مش محتاج الإعلانات اللي انتم عاملينها دي !!
الخاطبين بقا
تلاقيها كاتبة
" حبيبي فاكر اليوم ده ؟ 13 -4-2000"
و كل اللي عندها في الفريندز من كتر ما هيا قرفتهم بقصة حبها ليه
عارفين انهم شافوا بعض في اليوم ده
و كل داخل يقولهم كل سنة و انتم طيبين
في بقا فئة مريضة جدا
" يا عالم أنا و حمادة حنبقا تلاتة , أنا حاااااااااااااااااااااامل "
و تلاقي صحباتها داخلين يزغروطوا
و هيا ترد على كل البنات بكلمة واحدة " عقبالكم "
يعني أنا مش فاهمة خالص , حتى لو مفيش حياء
على الأقل يبقا فيه دم أو حتى خوف من الحسد
ده جدتي لما كانت بتبقى حامل محدش كان يعرف غير و هيا بتولد
عشان مكسوفة تقول
فيه بقا نوع متميز قوي و غريب
الكابلز اللي لسه ما اتخطبوش و المفروض إن محدش يعرف انهم مرتبطين
بس لما تقعد شهرين كل يوم فوق ال 20 كومنت و 5 أغاني و 400 بوست بينك و بين حبيبتك
أكيد كل الناس حيعرفوا ان بينكم حاجة وش !!
لا و تلاقيهم مسميين بعض أسامي عجيبة
تدخل تكتبله : زيزو الثنائي
يرد عليها: مارو الفولاذية
و يعدوا يهبلوا طول النهار قدام الناس
طب ما شركات الإتصالات و خطوط التلفون و النت و المسنجر و الرسايل موجودة
هبلوا فيها زي ما انتم عايزين !!
فيه فئة أنا مش فاهماها بصراحة
تبقى مخطوبة أو مكتوب كتابها
و كل الناس عارفينه و عارفينها
و تلاقيها تكتب
" أنا امرأة لا يكسرني رجل و لا يهمني شيء في الحياة " !!
نعم ؟؟؟؟
أو تلاقيها كاتبة
" اغرب عن وجههي فلست أنت الرجل الذي يرضي غروري "
و هو داخل عامل لايك
و تاني يوم قاعدين سوى عادي
المشكلة أنا عارفة كويس ان علاقتهم كويسة ببعض
و ان الكلام اللي بتكتبه من باب الهبل بس
طب ليه بتكتبه أصلا ؟
أنا بجد اتفقعت مرارتي من الناس دي
يعني أنا عندي واحدة صحبتي ما شاء الله عليها
قرأت فاتحتها من كذا شهر و اتخطبت من يومين تقريبا
محدش شافلها صورة وحشة على الفيس بوك
و لا حد حس بيها و خطيبها كذلك شخص محترم و هادي
أصل فعلا مالوش لازمة " الهيجان " اللي على الفيس بوك و قدام الناس ده
و سوري على لفظ " هيجان " بس هو الوحيد اللي تفسر بيه اللي بيحصل
ما أنكرش اني لو اتخطبت ممكن أحط صورتي بفستان الخطوبة لو كانت مختلطة عشان أكيد حكون محجبة فيها
أما لو عملته اسلامي ( غير مختلط) فأكيد مش حلبس الحجاب و ساعتها أكيد مش ححط صور خالص
ما انكرش اني أكيد حبقا فرحانة و حكتب حاجات ليها علاقة بإني أقول للناس اني اتخطبت و استقبل مباركاتهم
بس أكيد مش حعمل العمايل دي
أصل ليه ؟
ما أنا لو بحب حد و مخطوباله
أعبرله عن حبي بكل الطرق بيني و بينه في حدود المشروع
علاقة الحب دي علاقة طاهرة جدا
علاقة المفروض تتسم بالخجل و الأخلاق و البراءة
حاجة خاصة جدا بين اتنين
أصل ايه الفرق بين الحيوان و الإنسان ؟
إن الحيوان ممكن تلاقيه بيتجوز قدامك , أما البشر بيتزوجوا في غرف مغلقة
دي الطبيعة البشرية الخجولة الحقيقية
