مش عيب

مش عيب إنك تتعشى لوحدك

مش عيب انك تحب

مش عيب انك تحلم

مش عيب انك تنسى

مش عيب انك تحب نفسك ساعات

مش عيب انك تعيط

مش عيب انك تتمنى

مش عيب انك تعترض

مش عيب انك تعيش وحيد

مش عيب انك تبقى نفسك

مش عيب انك تستغرب

مش عيب انك تستنى

العيب

إنك تفتكر ان كل اللي بيحصلك ده لعيب فيك أو تفقد إيمانك بنفسك و قدراتك

الباص

الصبح صحيت متنكدة

كنت عاوزة أنام

في مثلث ماسلو للإحتياجات الإنسانية

بتلاقي في قاعه الحاجات الفسيولوجية من ضمنها النوم و الأكل مثلا

( قاعه دي يعني الأرضية بتاعته للي عمره ما نزل حاله للقاع و الحضيض )

و طبعا أنا بشرحلكم مثلث ماسلو اكمني مثقفة جدا بدون أدنى شك كفاية بعرف أفك الخط

المهم

اكتشفت ان عندي امتحانين انجلش ليسنينج و أي سي دي ال

الإنجلش بيس أوف كيك ( عشان تعرفوا نجحت إزاي , مثقفة خاااااالص )

أما الأي سي دي ال فقلت أدخل و أمري لله الإمتحان

باص الكلية بياخد من ساعة لساعة و نص لغاية ما يوصل من سموحة لأبو قير

أصله بيخاف يكسر البيض تحتيه

حقه مالناش فيه

سندت راسي على الشباك المليان جراثيم و قلت أرتاح

بدأت أتخيل نفسي في اللجنة

سؤال

سؤال

سؤال

الله الواد ده مزة , عيب يا بت نرجع للإمتحان

ساقطة

ناجحة

ساقطة

ناجحة

يع شعره ملزق , اععععععععع

يخربيتك ركزي وراكي امتحان

أفتح الكتاب و أبص بصة للكتاب و بصة للشارع

الكتاب

الشارع

الكتاب

الشارع

الله ده عمو اللي بيزعقلنا في مكتبة اسكندرية لما نطلع صوت

نياهاهاهاهاهاها

شكله حران و مش طايق نفسه

أحسن و من أعمالكم سلط عليكم

بت مش وقت شماته , لمي نفسك

نركز

الكتاب

الكتاب

الكتاب

يختي كميلة القطة النونو الله !!!!!!!!

يا عيني الست دي مش قادرة تمشي محدش بيساعدها ليه ؟؟

الواد ده بيبص للبت دي بطريقة زبالة !!

العيال الصغيرة دي كانت حتتداس , مفيش رحمة ؟؟

ما بقتش قادرة أركز أكتر من كده في الكتاب

مسرحيات بتحصل قدامي كل يوم في الطريق للكلية

الفرن ده سايب العيش للدبان كده ليه ؟؟

و الناس بتشتري منه ليه ؟؟

الزبالة دي محدش ناوي يلمها ؟؟

العيال ماشيين بكمامات مقطعة و متربة شكلها لوحده يجيب المرض

يعني أهاليهم مش هاين عليهم يجيبولهم كمامات جديدة ؟؟

بيسكتوا المدرسة و خلاص بالكمامات اللي عندهم ؟

وصلنا فرع ميامي اللي الباص بيقف فيه دقيقتين الأول

الله ايه العيال المزز دي ؟؟

عايزة أنام

و عايزة أذاكر

لأ أتفرج أحسن

و يكمل الباص رحلته

نفس الشوارع كل يوم

محدش ناوي ينظفها ؟؟

نفس الوقفة عند المزلقان كل يوم

نفس الزحمة

محدش ناوي يعمل حل لمشاكل المزلقانات في اسكندرية ؟؟

نفس عمو بتاع المرور كل يوم

قاعد بكوباية شاي و جنبه واحد شكله غريب

و هاتك يا ضحك

محدش ناوي يشتغل بضمير في أم البلد دي ؟؟

بيأس بعد المزلقان و دايما بنام لأن باقي الطريق لا فيه محلات و لا مناظر

و لا أي شيء غير التراب و الزبالة و السكة الواقفة

تصحيني صحبتي وصلنا

أنزل و يبدأ اليوم الدراسي البهيج

و تتكرر دورة حياة طالب مطحون تاني

للي بيسئل عملت ايه في امتحان الأي سي دي ال

ما امتحنتش عشان نسيت الباسبور

و دفعت غرامة كمان عشان الإمتحان يتكرر

و اللي نجحوا فيه كانوا تلاتة من 180

و كل الباقي دفعوا غرامة برضه عشان يعيدوا الإمتحان

صباح الفل , صباح النصب

ريحة التيشيرت

دايما كنت بشوف في الأفلام لما البطل يمسك حاجة لحبيبته و يقعد يشمها

و لا البطلة تلبس قميص حبيبها واو قال من حبها فيه

نفسيا ما كنتش مقتنعة بالفكرة

شايفة انها سخيفة و مالهاش معنى خالص

كنت لابسة بيجامة شتوي و حسيت بالحر

رحت على هدومي لقيت اني شلت معظم الصيفي

و أنا عايزة ألبس حاجة صيفي بجد مش طايقة نفسي

تقريبا الزكام اللي عندي خلاني اتصور ان الشتا جا

خدت تي شيرت قطن لماما من اللي سابتهم في الدولاب و سافرت

لبسته

ريحته كانت حلوة جدا و دافية

ريحة البودرة و البيرفيوم بتاع ماما

قلعته و قعدت أشم فيه

مش تخلف و الله و لا أنا قطة سيامي قاعدة تشم في الهدوم

بس ريحة التيشيرت كانت مريحة جدا بالنسبة ليا

فهمت ساعتها ليه بنرتاح لما بنشم ريحة بني آدم بنحبه

دمعتين نزلوا على التيشيرت

بنشف دموعي بالتيشيرت برضه

لاااااااااااااااااااااااااا

التيشرت لأ

حرام ريحته حتروح منه

اهيء اهيء اهيء

يلا مش مشكلة الدولاب مليان هدوم أشم فيها للسنة الجاية يم يم :)

ضعف و لا رخصة للنهب ؟؟

بما ان الجو غريب لا هو حر و لا برد و لا باين هو ايه أصلا
و بما اني ابتديت استعبط و البس شتوي عشان فرحانة بالكام بوت الجداد اللي جبتهم و عايزة ألبسهم و خلاص
فده معناه ان موسم الأنفلونزا و البرد ابتدى
بقالي اسبوع تقريبا عندي برد بشششششع
بكل ما للكلمة من معنى
المهم مش موضوعنا
الحكاية بقا و اللي قاهرني
ان كل ما اتكلم مع حد أو أشد معاه في الكلام يكون رده
" معلش أنا مش حرد عليكي بس عشان عيانة "
آن آن آن آآآآآآآآآآآآآآآآه
و الله لا ما تردوا
اللي عنده حاجة يرد و يقول و يخلصني
مشكلتنا اننا لما بنتزنق في الكلام بنجري على طول على أول شماعة و حجة قدامنا
زي مش حرد عليكي عشان انتي بنت
أو مش حرد عشان احنا في وسط الناس
أو بلاش أحسن حتزعلي
أنا مش بتكلم عن نفسي , أنا الحمد لله من النوع المسالم اللي ما بيتكلمش غير لما يضطر
لكن بتغاظ جدا لما تبقى الحجة الوحيدة اللي تخلي حد يهرب من النقاش معاك نوعك , جنسك أو حالتك الصحية مثلا
ده غباء حواري بالدرجة الأولى و ممكن برضه يكون نوع من العجز
في حاجة تانية بتحصل و الواحد عيان
النصب عليه
يا سلام أحلى وقت الناس تنصب عليك و انت عيان
أونكل ممكن كرت موبينيل بخمسة و عشرين ؟؟
وكل براءة في وشي و جراثيم في ايدي و مناديل في كل حتة
اتفضلي يا مزمازيل
و يرجع خمسة و عشرين جنيه
أونكل أنا اديتك مية مش خمسين
و الله ؟؟ طب ركزي كده يا مزمازيل
لا أنا ما كانش في محفظتي غير مية
و يديني حتة بصة كأني بنصب عليه و يرمي الخمسين الباقية في وشي
و يتكرر الموقف عند أكتر من حد و في أكتر من مكان
مش معنى ان الواحد بمنديل انه حمار و مش عارف معاه كام
طب ده حصلي و أنا معايا شوية زكام
الغلابة و المكفوفين و المرضى و المعاقين و كبار السن
هل أصحاب المحلات بيستبيحوا دمهم و فلوسهم كده برضه ؟؟
هل ضعف الإنسان رخصة للنصب عليه ؟؟
هل احنا بقينا زبالة لدرجة دي بدل ما نساعد الأضعف منا ننصب عليهم ؟؟

للأسف آه

السنة اللي فاتت في الشتا شفت واحد غلبان بيترعش في البرد و كان شكله معاق
المهم جريت لماما و ماما ادتني بطانية , اديتهاله
عديت تاني يوم لقيته على الأرض معاه غطا معفن و قاعد سقعان
الراجل كان في التلاتينات بس مريض
قربت بشويش و قلتله بطانيتك فين ؟؟
شاور على الأمن بتاع مستشفى البريطانية اللي في العمارة اللي في الشارع اللي قدام
رحت أنا قلت للأمن إنت خدت البطانية منه ؟؟
قالي لأ أنا شايلها عندي بس عشان ما تتوسخش
قلتله هو عشان مريض خدتها منه ؟؟ أنا اديتهاله عشان يتدفى بيها , يوسخها يحرقها هو حر
رجعاله عيب على سنك تسرقه
قام خاف و رجعها
عديت تالت يوم مالقتش الراجل و لا البطانية و لا الغطا المعفن
و نظرات بتاع الأمن كلها سخرية
بصيتله بقرف و مشيت
بعد كذا يوم لقيت الراجل بيلف معاه الغطا المعفن في منطقة بعيدة جدا عن بيتنا
صعب عليا قوي
محاولتي لإني أرجعه حقه خلته تتسرق منه البطانية تاني و يطرد كمان من المكان
كانت ماما سافرت خلاص و أنا معرفتش أتصرف إزاي
غير اني أقول حسبي الله و نعم الوكيل في اللي بيستغل ضعف الغلابة

يلا بينا

امممممم

عايزة أتكلم عن مليون حاجة في مليون بطيخة و مش عارفة أبتدي منين

كنت بحب أكتب في الفيس بوك لكن التعليقات و نظام اللي على راسه بطحة و كل حد يفهم الكلام عليه ما بقاش جايب همه خالص

و قريت مدونات جميلة جدا عجبتني و قررت أكتب تاني مع إن مدونتي القديمة باءت بالفشل بعد ما خدت تعليق مش حلو من حد من صحابي خلاني يجيلي حالة انحباط استحباط حاجة كده ... المهم فضلت فترة ما اكتبش لغاية ما نسيت اسم المدونة بتاعتي

و قررت أدخل المرة دي أكتب و لا يهمني , حكتب عن حاجة شخصية , حاجة في البلد , حاجة في العالم كل واحد حر في اللي بيكتبه و على رأي واحد من صحابي

" اللي بيأكلني يقطع الأكل عني و اللي بيصرف عليا يخلي فلوسه في جيبه "

:)