مش عارفة النهاردة الحمد لله حاسه إني مبسوطة قوي ليه ؟
حاسه كده بنوع من أنواع الرضا بالنفس
سكينة و هدووووووووء كنت مفتقداهم من زمان
بقالي كتير ما مسكتش سماعة التلفون أتطمن على كل صحابي
كنت قرفانة قوي من كل الناس و مش عايزة أكلم حد و لا أعرف حد
يعني كان كذا حاجة حصلت ورى بعض ورى بعض خليتني مش متوازنة كده و مش عارفة راسي من رجلي
واحد من صحابي كان بيقولي :
" انت مشكلتك عايزة الناس تتعامل معاكي زي ما بتتعاملي معاهم و عقلك بيروح بعيد قوي لطموحاتك في الناس ,
عمرك ما حتلاقي حد زيك و ما ينفعش تستغربي كل ما حد عمل حاجة وحشة في حقك "
فكرت فيه كلامه كتير قوي و لقيت انه ممكن يكون صح جدا
أنا بتجرح قوي لما صحابي ما يسئلوش عني
و بتدايق لما أتعب و ما ألاقيش حد حواليا
و اتقهر لما أئتمن حد على مشاعري و ما ألاقيش غير الأذية و الظلم
و حاجات من دي كتير
لأن اللي بيجي في بالي ساعتها " هو ليه الناس كده "
اللي اكتشفته
ان ما ينفعش تستغرب لما الناس " تندل " معاك و لا يبيعوك و لا يتعاملوا معاك على إنك أهبل
المفروض تستغرب لما تلاقي حد يسئل عليك و يحبك و يخاف عليك
حبيب , صديق , آخ
لأن الشخص اللي يكون كل همه سعادتك و بيهتم بيك ده
هو الوحيد الجدير بإهتمامك و وقتك
و هو اللي لازم تشيله في عينك
ما بتكلمش عن قصة حب رومانسية و لا عن فيلم
أنا بتكلم عن أشخاص موجودين حوالينا بس نادرين قوي
ممكن يكون واحد صاحبك , بنت زميلتك , حد من عيلتك , و مش عيب برضه لو كان حبيبك و لا حبيبتك :)
لأن الشخصيات اللي من النوعية دي بقت عملة نادرة قوي لازم الواحد يحافظ عليها و ياخد باله منها
أنا تقريبا عندي تلات أشخاص صحاب بحس إن هم دول بس اللي يستاهلوا يتحطوا في عنيا
بنتين و ولد
البنتين دول كانوا جنبي في كل حاجة مهما اتورطوا معايا في مشاكل و لا قرفتهم بمواضيعي السخيفة و لا صدعتهم بعياطي
و لا غتت عليهم في نص الليل عشان زهقانة و لا عشان خايفة و لا شايفة كابوس
و الولد احنا ممكن نكون نعرف بعض من فترة بس قربنا من بعض كصحاب من شهرين تلاتة مش أكتر , بس فعلا مستجدعاه قوي و حاسه انه من الناس القليلة اللي بتكلم عليهم دول
يعني الفكرة اللي وصلتلها في الآخر
ما ينفعش نتوقع من الناس حاجات كتير لأن ربنا ما خلقناش زي بعض
و في نفس الوقت ما ينفعش ننقطع عن الناس عشان قرفانين منهم أو مش عارفين نتعامل معاهم
و ما ينفعش برضه نعامل الناس زي ما بيعاملونا
زي ما غاندي قال قبل كده " مبدأ العين بالعين يجعل العالم كله أعمى "
و لما نلاقي حد يخاف علينا بجد نمسك فيه بإيدينا و سنانا
لأن الناس الكويسة دي رزق من ربنا
بيبعتهولنا عشان ما نفضلش لوحدنا
أنا مبسوطة الحمد لله إني رجعت لطبيعتي النهاردة
و ربنا يقدرني و أحافظ على كل صحابي و أشيلهم في عنيا
و أفضل في عينيهم نفس البنت اللي أمنوها على أسرارهم من أول ما شاوفوها
بحب العبارة اللي بتقول :
" a friend is someone who knows all about you , and still loves you "
ليست هناك تعليقات:
إرسال تعليق