المذاكرة

بما إن الجميع أجمعوا إني لازم أفضح سر مذاكرتي و دح السنين اللي بيفتكروني باديحه

مش عارفه بادحه , بدحه , همممممم أنا كنت بنام في حصة العربي

المهم

قررت إني أقول بقى و خلاص و أخد ثواب في إخوانا الطلبة 

طيب الموضوع سهل جدا 

الخطوة الأولى :

نفتح الكتاب

الخطوة التانية :

نبص على الصفحة 

الخطوة التالتة :

نقفل الكتاب

بس و بكده نكون ذاكرنا 

و كل سنة و إنت طيبين 

و سعيكم مشكور

لا لا أنا بهزر ما تاخدوش على كلامي

بصوا أنا بذاكر بطريقة عجيبة حبتين بس الحمد لله ماشية معايا 

ممكن تمشي مع غيري و ممكن لأ

المهم

1- لازم أحضر المكان اللي حذاكر فيه و ده لوحده له طقوس و قوانين

أولا لازم يكون مكان غير مريح زي الأرض مثلا , كنبة ناشفة , كرسي بيوجع

بس أحلى حاجة الأرض , إيه يا تري السبب في عدم الراحة ؟ 

إن لما بتقعد على الأرض بتبعد عن الموبيل , النت , التلفزيون , أي حاجة

و خلاص بتكسل تقوم بقا غير لما تخلص مذاكرة

2- لازم أجيب المية و الكلينكس و كل الأقلام و الورق و مخدة احضنها و أي حاجة ممكن أستعملها أو احتاجها خلال الساعة الجاية

احم آه ساعة محدش له دعوة بيا , كل واحد حر في مذاكرته 

3- الموبيل طبعا قلنا بعيد , بس معلش نبقا أذكية شوية و يبقا سايلنت عشان مش كل رنة و لا مسج و لا بتاع نقوم نبص

4- نظام الكمية , ده بتحدد كمية حسب انت وراك قد ايه تذاكره , مثلا 100 صفحة , يبقا مثلا بين كل 10 صفحات فيه استراحة

طبعا الإستراحة دي مش معناها إنك تقوم ترقص و لا تفتح النت و لا تفتح التلفزيون لأن دي ساعتها مش راحة دي حتبقى استهبال

يبقا نرتاح إزاي ؟

أنا عن نفسي كل عشر دقايق بعمل حاجة , مرة أقوم أسرح شعري أو أغير اللي لابساه أرجع

أقوم أجيب عصير من التلاجة و في الراحة اللي وراها أشربه

أقوم أصلي و أرجع

أقوم أعمل 8 ضغط و لا 8 بطن و لا ألف الشقة 

أقوم أحط زبدة كاكاو أو أرتب سراحتي على السريع كده

ممكن لو ولد يقوم يعمل شاي , يقف في الشباك حبة , يعمل رياضة 

الموضوع ده بقا بيثبت الحبة اللي ذاكرتهم , بدل ما تفضل ساعتين مكبوب على الكتاب و في الآخر مش فاهم حاجة

5- أوعد نفسي إني لو خلصت المادة حقوم ألعب على الفيس بوك , فا أحترم نفسي و أذاكر عشان المكافأة المجزية دي

بس و هكذا أكون لخصتلكم سر المذاكرة النوناوية 

ابقوا قابلوني لو حد نجح