الاثنين، 15 مارس 2010

نظرة نوعية

جالسة أمام شاشة اللاب توب منذ الصباح كلما كتبت شيئا أجد نفسي أضغط

Ctrl + A >> delete

لا أعرف لما كلما كتبت شيئا تخوفت و مسحته ثانية

أرى في موضوعاتي الكثير من الجرأة أحيانا و في آخرى أرى فيها الكثير من الخجل

الكثير من الإنفتاح و الإنغلاق في الآن نفسه

أخاف من حكم الناس علي من خلال كلماتي

أتسائل , هل فعلا يمكن أن تحكم على أحدهم من خلال ثيابه ؟؟ نظراته ؟؟ كلماته ؟؟ كتابته ؟؟

قالت لي صديقة لي ذات مرة

رغم أنك متمسكة بالكثير من التقاليد القديمة و العادات إلا إني اكتشفت من خلال حديث واحد معك إنك انسانة متفتحة بشكل لا يصدق

ابتسمت و لم أزد على ذلك في ردي و حاولت تغيير الموضوع

أدركت أن الإنسان بحاجة إلى أن يتكلم حتى يفهممه الآخرون

منذ سنوات قالت لي معلمتي كلمات أثرت فيا كثير

" صمت الشخص دليل على أحد هذان الشيئان : إما أن الشخص الصامت إنسان حكيم جدا , أو شخص أبله "

تناقشت معها يومها و تجادلت كثيرا , و لم نصل إلى نتيجة محققة

من خلال تعاملي مع الناس خلال تلك السنوات وجدت نسبة من الصحة في كلامها

أعاود و أسئل السؤال نفسه , هل الحكم على الإنسان من خلال أمر واحد ظاهر عليه أمر فيه من الصواب من شيء ؟؟

إجابتي أن هذا من أكبر الأخطاء التي يمكن أن يرتكبها الإنسان في حق نفسه

لأنك قد تضيع صداقات من أجمل الصداقات في حياتك بسبب نظرك لشكل من يتحدث إليك أو ثيابه أو شعره

يمكن أن تضيع حبا قد يكون حب العمر كله بسبب حكمك على انسان من خلال نظراته , طوله , ابتسامته

يمكن أن تضيع في حياتك فرصا لتعلم الجديد بسبب حكمك على أحدهم من خلال كتابته أو كلماته

أرى الحل دوما أن نعامل الناس بشكل عادل تماما

فتقسيمهم على أساس جنسهم أو طريقتهم في الحديث أو شكلهم فيه الكثير من الظلم

لماذا أحيانا نرى اثنان يحبان بعضهما لدرجة العشق رغم أن أحدهما لا يقارن شكلا بالآخر ؟؟

لأنهم تجاهلوا هذا الأمر و أدركوا تماما أن المهم هو ما في الداخل و الجوهر

لماذا أحيانا نرى صديقان من جنسان مختلفان يتعاملان مع بعضهما كأنهما من جنس واحد و كالإخوة و يخدمان بعضهما و يقفان لبعض في أحلك المواقف ؟؟

لأنهم تجاهلوا الحواجز اللذي يضعها المجتمع و احترموا الحدود التي بينهم

النظرة النوعية من المشاكل التي تواجهننا في حياتنا

أن ينظر إلينا أحدنا على أساس الجنس , الجنسية , الشكل , الكلام , الميول و الإتجاهات , حتى الثياب

من الأمور التي تثير الشفقة على صاحبها

دوما ما أتمنى أن أرى المجتمع خالي من تلك الفروق التي حلت محل التفرقة العرقية

أن تفرق بين الناس في عقلك أمر أسوء من ان تفرق بينهم على أساس العرق أو الدين

تذكر عندما ترى شخصا في المرة القادمة أنه انسان مثلك ,

فلا تضيع على نفسك فرصة التعرف عليه فقد يكون السبب في حياة أفضل و أجمل لك

دي مش رقابة دي خيبة

حاصل اليومين دول إن اللي بيستخدم الإنترنت بالموبيل مودم مش بيقدر يفتح برنامج سكايب

كل الناس فاكرة ان الموضوع مشكلة عندهم , أو حاجة تقنية خلاص

و اللي اكتشفوه إن الشركات منعت الموضوع ده !!!!!!!

احنا عايشين فين بالضبط عايزة أعرف ؟؟

لما يمنعوا وسيلة تواصل زي سكايب بين الناس ؟؟

بالذات ان الشعب المصري لازم بتلاقي في كل كام عيلة حد مهاجر و حد مسافر و حد بيدرس بره

يعني محتاجين كل طرق التواصل الممكنة بين البشر

و اللي كان برنامج زي ده بيوفرها ببساطة و يريح الناس من تكلفة المكالمات الدولية العالية

أما بقا اللي بيسئل عن السبب فاللي عرفته إنه عشان الإنتخابات و الرقابة عليها

و ان فيه تحركات و أحزاب و ناس كتيرة بتعمل شبكات سياسية و نقاشية على الإنترنت

و لما لقوا سياسة الإستخدام العادل مش نافعة و إن الناس بتقعد برضه و بتدفع و ما بيهماش

قرروا يحدوا من الموضوع بإنهم يراقبوا و يخففوا من قعدة الناس على اليو اس بي مودم

طيب ناويين بعد كده على ايه ؟؟

يقفلوا الفيس بوك و التويتر بالمرة ؟؟

و لا يقطعوا كابل الإنترنت كله و يريحوا نفسهم ؟؟

يلا بقا نرجع للقرون الوسطى و للحمام الزاجل عشان يرتاحوا

و الله لو عملوا ايه بالذي , الناس برضه بتعرف تتواصل و اللي عايز يعمل حاجة غلط بيعرف يعملها

ارحمونا بقا دي حاجة تخنق

السبت، 13 مارس 2010

السياحة

كنت في رحلة يومين للقاهرة
الرحلة التقليدية اللي كلنا بنروحها بدل المرة عشرة
نلف على الاهرامات , نتغدى , نروح الحسين بلا بلا بلا بلا

و أنا في أهرامات جات بنت صغيرة كده و محجبة بتحاول تبيع لصاحبتي ورق بردي من البايظ ده
فصاحبتي قالتلها لأ شكرا
جاتلي قلتلها ميرسي
لقيتها بصتلنا تقولنا انتم مصريين ؟؟
قلنالها آه
قالت آآآآآآه عشان كده و بصتلنا بقرف و مشت

أنا تنحت حبة كده , يعني مش للدرجة دي
لما يكون طفلة في السن ده مزروع في دماغها انها تنصب على الأجانب و تتجنب التعامل مع أهل بلدها
يبقى الوضع عامل إزاي ؟؟

المشكلة بقا ان صاحبتي باربي شعرها أصفر
و أنا لبسي طريقته خليجي شوية على مصري شيك
و معانا واحد صاحبنا فلسطيني
و اتنين صحابنا كوايتة
و غمازة حبيبتي مصرية

فشكلنا للأسف مغري للنصب جدا
اللي بييجي فاكر ان باربي أجنبية
و اللي بيجيني فاكرني هبلة من الخليج
و اللي بييجي لأبو طويلة نخلة و ينصب عليه فعلا

بجد ضغطي ارتفع

واحد فجأة طلعلنا  " أصورك يا باشا ؟؟

هات الكاميرا و حصورك يا باشا

طب يا باشا تجرب اللفة الفلسطيني يا باشا ؟؟

طب جربها ما تشتريهاش , جرب بس

تعالى حصورك و انت بتبوس أبو الهول يا باشا

يا باشا اقف هنا , لأ هناك يا باشا

باشا معاك موبايل بدل الكاميرا ؟؟

باشا تحب أصوركتاني يا باشا "

و مسك جو صاحبنا ساعة يصور فيه و يربط راسه غصب باللفة العربي القديمة

و بعدين مسك نخلة ساعة كمان و احنا قاعدين بنسيح

و تديله فلوس ما تديلوش هو لازق , خد منهم بتاع 50 جنيه و برضه لسه لازق خنقنا

و ما سبناش غير لما هربنا منه فعلا

و طول النهار على كده , سواء في الهرم في الحسين في اي حتة

بجد اتدايقت قوي

مفيش عربية تيجي تشيل الناس دي كلها تحدفهم في أي حتة ؟؟

مشوهين السياحة و مشوهين البلد

طب الحكومة , البوليس , هيئة الأثار , أي حد مسؤول

عاجبهم المنظر ؟؟

مفيش حد منهم حاول يستمتع قبل كده بمعالم بلده و معرفش ؟؟

أو حس انه مش عارف ياخد راحته و يتبسط ؟؟

بجد حالة صعبة

الخميس، 11 مارس 2010

ظروف أمنية في المكتبة

امبارح كنت رايحة مع صحابي ندوة عن التدوين
كنت مبسوووووووووطة مووووووووت إني حشوف قدوتي الأولى في التدوين
دكتورة غادة عبد العال
صاحبة مدونة و كتاب " عايزة أتجوز "

بصراحة الندوة كانت مسخرة جدا . بس بشكل حلو

الأزمة من مكتبة إسكندرية لو كانوا وفروا دعاية كويسة و قاعة كويسة ما كانش حصل الي حصل

أنا ليا صحاب بالعشرات حيموتوا و يشوفوا الناس دي في اسكندرية

بس للأسف ما عرفوش غير بعد ما الموضوع انتهى

اللي حصل بقا ان المكتبة موفرة قاعة في أرض كوتة للمعارض

و القاعة دي عبارة عن خيمة

و الخيمة عبارة عن شوية قماش مقطع

و القماش المقطع بيسمح لناس غريبة بالدخول

لو قلنا الخيمة كان فيها 100 بني آدم

فممكن نقسم على الشكل التالي

10 من المثقفين و الأولاد بتوع التنمية و اللي يعرفوا يعني ايه تدوين
 و صحاب الموديريتور بتاع الندوة , اللي أنا منهم طبعا , كلنا جايين نعمل ظهر لصاحبنا

40 من اللي ميعرفوش يعني ايه تدوين و ما يعرفوش الناس اللي قاعدة و ما يعرفوش هم قاعدين ليه

20 من اللي ما يعرفوش يعني ايه كمبيوتر و يعني ايه انترنت فما بالك يعني ايه تدوين بقا

10 من الوشوش المألوفة في الندوات و ناس ما تعرفش هي جاية ضد و لا مع التدوين و المدونين

ال20 الباقي تعبوا من اللف في الشاطبي و لقوا كراسي فاضية قالوا يرتاحوا عليها بالمرة

من ضمن الحاضرين كان سايس العربيات بره
و واحد كبير في السن غلبان في مخه
و واحد بصراحة معرفش جنسه ايه بالضبط
و واحد كائن هلامي لزج بيكره النساء جاي مع والدته

بصراحة اتدايقت ان ضيوف زي دكتوة غادة و هشام علاء و غيرهم يحضروا أخيرا و يتجمعوا عشان يتكلموا
و يلاقوا المنظر ده

بس العيب مش على الناس
العيب على المكتبة بصراحة

ملحوظة : امبارح كان فيه حفلة عمر خيرت , أنا شفته داخل بعربيته حاجة محترمة كده
قام السكيوريتي بيقوله : " ممنوووووع يا بيه "
فأنا ببص للراجل بتأكد عمر خيرت فعلا و لا لأ و فعلا هو
لقيته سكت و بص لبتاع الأمن جامد كده
فقاله اتفضل يا بيه اتفضل , معلش يا بيه

و مرة كان فيه مؤتمر كان صحابي بيبقوا جوه
و أنا مش بعرف أدخل
قمت جايبة أي دي شيك كده و معلقاه
حجمه أكبر من حجم أي دي المؤتمر بمرتين
و شكله مختلف تماما
و لون الشريطة موف بينما شريطة المؤتمر زرقة

لقيت السكيوريتي بيقولي حضرتك مسجلة جوه ؟؟
فأنا بصيتله و الخوف في عنيا
لقيته مسك الآي دي بإيده و قلت حيبلغ عني
لقيته آه يا فندم اتفضلي أنا أسف

يالهوي , يعني مش للدرجة دي
أنا حطيته على أساس يلمحه كد و يدخلني
مش لدرجة يمسكه في ايده و يقراه

بجد بتوع الأمن حاجة تفضح عندنا

أشوفكم على خير

الثلاثاء، 9 مارس 2010

الحب في المعدة

ماما زمان خدتني في حجرها كده و قالتلي

" حطي الكلمة دي حلقة في ودنك , الراجل سره في معدته , الطريق لقلبه هو الأكل "

كنت صغنتتة و مقططة كده و هي قاعدة تهزر معايا :)

كبرت و أنا معنديش ايمان بالفكرة دي خالص , أنا مدركة انها ممكنة بس مش قاعدة يعني

المهم

سئلت نفسي مرة من سنة كده تقريبا

هو الواحد امتى يعرف بجد انه بيحب ؟؟ أو معجب ؟؟ أو مذهول مش أكتر ؟؟

معرفتش , بس لما سئلت غيري جاتلي اجابات كتير

بتفكر كتير في بني آدم معين

بتتوقع انه هو-هي كل ما التلفون رن

بتحلم بيه -بيها كتير

بتحس بدوخة كده لما بتشوفه-تشوفها

و أكتر حاجة اقنتعتني و لاحظتها بجد

النغزة اللي في المعدة

آن آن آن آآآآآآآآآآآآآآآآآآآآآآآآآآآآآآآآآآآآآآآآآآآن

كل ما تشوفه-تشوفها , تحس برعشة في معدتك كده

طب هو مش معقول الحب أصله المعدة يعني و لا ايه ؟؟

مش عارفة , بس وفقا للملاحظات الحديثة من مدرسة المجانين التجريبية

فأنا بطالب بإقامة دراسة على الموضوع ده

بعد كده بدل ما الواحد يقول لحبيبته يا قلبي , حيقولها يا معدتي

آه معدتي بتتقطع كل ما أشوفك و هاتك يا قلش من هنا لبكرة

كل اللي أعرفه ان الحب رغم انه إحساس في القلب إلا إنه مجموعة من الهرمونات بتضرب مرة واحدة تلخبطلك كيانك

فخلي بالك

الخميس، 25 فبراير 2010

جواز كوافيرات

من و احنا صغيرين و فكرة ان الولد أمير ,( برينس شارمنج )
بتتزرع في دماغنا , غصبا و اكراها

عمرك شفت فيلم الولد مش بياخد البنت اللي عايزها بطريقة أو بأخرى ؟؟

عمرك شفت الفيلم مش بتتحل فيه المشكلة في آخره و البطل يبوس البطله و يخلفوا صبيان و بنات ؟

عمرك حصل معاك زي الأفلام كده إن المشكلة تتحل بنظرة من عينيك و لا كلمة تقولها و لا الصدفة البحتة ؟؟

طيب سيبكم من الأفلام

تعالى بص حواليك

كام واحد من صحابك عاش قصة حب حقيقية ابتدت حب و انتهت حب أو استمرت حب و كبرت ؟؟

حتقول أعرف فلان و يمكن فلانة ,,, امممممم بعد شوية تفكير حتلاقي 90 % من صحابك سينجلز

كنت النهاردة في الكوافير , عادي يعني بنت زي باقي البنات برضه و لا إيه ؟؟

المهم لقيت الكوافيرة بتاعتي بتقولي : لما تتخطبي إن شاء الله أو تتجوزي إياكي تروحي عند حد غيري

قلتلها : وعد يا ستي بس لما يبقا فيه بصيص أمل حتى ,  أنا غسلت ايدي من الموضوع ده

قالتلي:  ليه بقا إن شاء الله ؟؟

رديت : صالونات و مش بعترف فيه و تعارف و حب و كلام من ده و لا بفهم فيه و لا عمري حفهم

لقيتها بتقولي كل الناس دلوقتي بيتجوزوا صالونات و اللي بيتجوزا عن حب دول قلوا قوي في الزمن الزبالة ده

أنا سكتت

قالتلي آه و حياتك كل شوية زبونة تجيلي تقولي شوفيلي بنت حلال لإبني , شوفيلي بنوتة حلوة لأخويا

اتصدمت , مش للدرجة دي يعني بيدوروا على البنات في الكوافيرات

و كملت كلامها بتقولي و لا يهمك محدش حيجوزك غيري انتي عندك 25 ؟؟

طبعا الكلام ساعتها خد منحنى تاني , يا فضيحتي أنا عندي عشرين سنة بتقولي 25 ؟

و الحمد لله لا ناقصني رجل و لا ايد عشان أدور على عريس في كوافير

قلتلها عندي عشرين و والنبي أنا الحمد لله كده كويسة لما ييجي النصيب محدش حيعرف يرده طلعيني من دماغك

ضحكت و قالت ماشي ماشي لما نشوف و حسيت انها و لا فهمت أي حاجة من كلامي

يعني لما قالوا جواز صالونات كنا بنقول ايه ده !!

دلوقتي جواز كوافيرات , الله بجد , الدنيا باظت

الأربعاء، 24 فبراير 2010

.......

بتحصل حوالينا حاجات كتير مش بنبقى فاهمين هي حصلت ليه ؟ و إزاي ؟ و إمتى ؟

كل اللي بنعرفه انها حصلت و خلاص

المشكلة اننا لما بنفكر في حياتنا من غير حصول موقف معين أو قصة معينة أو تفكير معين

حنلاقي ان مفيش فرق

لو الحياة كانت معادلة , فالمتغير فيها بتاع المواقف دي = صفر

يبقا المتغير ده محطوط في المعادلة ليه من أصله ؟

إذا ما كانش له قيمة ؟

طيب يمكن مالوش قيمة لو جمعناه أو طرحناه

بس لو ضربنا أو قسمنا حنطير حاجات تانية كتير بسببه

مش كده ؟؟

ليه فيه حاجات رغم انها مش موجودة أو عمرها ما حتبقى موجودة بنفضل بينا و بين نفسنا بنفكر فيها ؟

هل الغلطة فينا و لا في غيرنا و لا في الوقت و المكان اللي إحنا فيه مش أكتر ؟

معرفش غير حاجة واحدة بس

ان مفيش حاجة بتنتهي غير لما بنعترف لنفسنا انها انتهت فعلا