D:

 “To forgive is to set a prisoner free and discover that the prisoner was you.”

ملاك و لكن ؟

يقفان في ممر بارد , أصوات الأقدام على السلالم تعلو المكان

تضغط على قلمها اللعبة , ينظر لها قائلا  : " توقفي عن كونك ملاكا , فعلا , أنا أتحدث لمصلحتك , توقفي عن لعب دور الملاك , أنتي بشر , أقسم لك أنتي بشر لستي ملاكا "

نظرت له حائرة , هل تفرح بوصفه لها بالملاك ؟ أم تغضب من لهجته معها ؟ أم تحزن على حالها ؟

تلعب في خاتمها و تنظر لحذائها لا تعرف ماذا تقول

أكمل كلامه " اغضبي , إحزني , لومي من يخطئ في حقك , أظهري أي مشاعر سلبية تجاه الآخرين  كيف يخطئ فيكي أحدهم و تبتسمين في وجهه , أريد أن أفهم ؟ "

ابتسمت و لم ترد

نظر لها " لا فعلا طفح الكيل , أنت غير طبيعية "

سئلته " ما بك ؟ ما المشكلة إن كنت لا أعرف كيف أغضب من أحد أو أحزن أو أن أثير شجارا ؟؟ "

رد عليها و هو يكاد أن يكسر القلم الذي في يده " كيف يتحدث عنك أحدهم بالسوء و يصفك بأسوء الألفاظ و تذهبين تخففين عنه حزنه عندما رأيته واقفا منكسرا ؟ كيف ؟ أخبريني ؟ لماذا لم تتركيه و تذهبي ؟ أجيبي "

أخرجت رأسها من النافذة و اتكئت عليها و هي تقول له

" رأيت في دنياي أنه لم يخطئ أحدهم في حقي إلا و اعتذر لي في أحد الأيام ,

   لم يظلمني أحدهم إلا و طلب مني أن أسامحه

   لم يتحدث عني أحدهم بالسوء في ظهري إلا و ندم على فعلته بعدها

   لم يؤذيني أحدهم إلا و أخذ الله لي حقي منه يوما "

لم يرد عليها و هي لم تنظر له , بقيت متكئة رأسها خارج النافذة و أكملت كلامها

" لم أعتد أن أغضب , لم أعتد أن أحزن , لم أعتد أن أكره أحدهم ,

  اعتدت أن الحقيقة تظهر دوما و أنه إن عاملنا الناس بالخير و أحببناهم مهما ظلمونا

  فسيأتي اليوم الذي يدركون مدى خطئهم

  اليوم الذي يندمون فيه على أي شيء فعلوه معنا

   اليوم الذي يجعلهم يكرهون أنفسهم أحيانا على أفعالهم أو يصلحون ما فعلوه في أحيان آخرى "

صمت قليلا ثم قال لها : " ربما أنتِ ملاك حقا , خسارة أنتي في هذا العالم "

تتنهد و لا ترد

تعرف أن الكثير أخطئوا في حقها

و تعرف أن الكثير يتمنون قربها

و تعرف أنها ستقابل عشرات سيظلمونها

و عشرات سيخونوناها في ظهرها و يتحدثون عنها

لكنها لا تعرف

هل ستقابل من سيحافظ عليها حقا ؟

من سيعتني بها ؟

 من سيقدرها و يتمنى أن لا يتنفس إلا شذى عطرها ؟

من لا يضطرها للإبتسام في وجهه رغم ألمها من الداخل 

لأنه  ببساطة سيضمها لصدره حتى تبكي و ترتاح

غتاتة

همممم

في حاجة مريبة بتحصل بقالها فترة

كل شوية واحد يدخل البلوج يقراله كام موضوع و فجأة يفتكر أو تفتكر نفسهم خبراء في حياتي

أنا مش بكتب هنا عشان كل ما أخرج و لا أقعد مع صحابي ألاقي حد يعلقلي على بوست

و لا بكتب عشان الناس تتابع حياتي

أنا بكتب عشان بحب أكتب

و عشان بفضفض

و عشان يمكن حد يستفيد من تجربة بقولها أو قصة بحكيها

أما البرود اللي شايفاه بيحصل بقاله فترة ده بجد بيخليني أفكر أعمل مدونة جديدة 

لأني بقالي كام يوم مش عارفة أخد راحتي في الكتابة

فبجد كفاية غتاتة و اللي عايز يعرف حاجة عني ييجي يسئلني في وشي مش لازم لف و دوران

بجد فعلا مرارتي اتفقعت و مش مستحملة 

الهبل في الجبل

عرفته من كام أسبوع تقريبا

استغربت إنه من أول مرة شافني فيها 

حاول بكل الطرق يلفت نظري

أنا شفته تقريبا خمس ست مرات بالكتير لغاية دلوقتي

كل مرة فيهم كان بيبذل مجهود خرافي عشان يثبتلي أي حاجة

كلام حلو بالهبل و من اللي يحبه قلبك

نظرات بلهاء خرقاء بالعبيط

هزار على الفاضية و المليانة

و رسم 

رسم إيه بتقولولي ؟؟

بيرسم عليا

" أنا عشت في ألمانيا نص عمري " 

" أنا بابا دبلوماسي كبير و ماما من عيلة معرفش مين " 

" أنا مهندس و محامي بس شهادة الهندسة مش معترف بيها عشان من ألمانيا " 

كان ناقص يقولي إنه بيطير بليل و بينور في الضلمة و شاف سلاحف النينجا مرتين قبل كده وجها لوجه

الواد ممكن يعجب أي حد بصراحة

أي واحدة هبلة كلمتين من دول حتقع من طولها و تغني بالأحضان يا بلادنا بالأحضان

طبعا صحبتكم شكاكة , غلباوية , مريضة نفسيا

مش اي حد حييجي يتحنجل و يقولي كلمتين حلوين حفرح بيه

جا النهاردة بنية إنه يلزق

قلتله تعالا عايزاك تتعرف على واحدة صحبتي

عرفته عليها , بنوتة جميلة بحبها, تعليمها ألماني و مخها كبير ما شاء الله

و قلتلها إنه كان عايش في ألمانيا

و هنا اتضحت الفضيحة 

حاولت معاه عشان ينطق كلمة واحدة ألماني ما نطقش

و فضل يهبل

وشه بقا أحمر

و منظره بقا غريب

و آخر ما اتحرج إنه صوته علا بيقولها " إيه المشكلة أنا عشت هناك بس ما كنتش بنزل الشارع " 

يا حبيب ماما

!!!

المصيبة بقا

إنه فضل لازقلي باقي اليوم

طب يعني للدرجة دي فاكرني هبلة ؟؟

و لا عشان ضحكتي طفولية و حركاتي عبيطة يبقا فيه سندويتش همبرجر في جمجمتي مش مخ ؟؟

اتخنقت شوية لأني معرفتش الأشكال دي بتتحدف عليا منين ؟

و لا أنا بجذبهم ليه ؟

بس الحمد لله إنه رازقني عقل كبير بعرف أدافع بيه عن نفسي

بقول للناس نظفوا قلوبكم و عقولكم بقا

و بطلوا الشهوانية المقززة اللي إنتم فيها دي

كل واحدة شكلها حلو شوية و لا كويسة

الولاد يتهبلوا عليها و يعملوا أفلام و تمثليات عشان يلفتوا نظرها ؟؟

طب و آخرتها ؟

قلوب بتتكسر و تتجرح

قصص كتير بتنتهي نهايات سودة

طب ليه ؟؟

ليه مش بنحترم ثقافة الحب ؟؟

ليه مش بنسعى لإننا نحب و نتحب بجد ؟

ليه لسه فيه ناس بتكدب عشان ترتبط و لا تتحنجل ؟

يعني علاقات مبنية على الكذب حتبقا آخرتها إيه ؟؟

إيه القرف ده بجد ؟

حساب 2010

بما إننا في شهر 12 

الشهر اللي بنبتدي نحاسب فيه نفسنا

بنشوف حققنا إيه ؟

عملنا إيه طول السنة 

السنة اللي فاتت كتبت لستة بالحاجات اللي عايزة أعملها في 2010

اضغط هنا لقراءة الموضوع

فتحت كده و اتبسطت جدا جدا جدا إن تقريبا 90% من الحاجات اللي في اللستة اتعملت 

لو خدناها واحدة واحدة كده 

1- ثقتي في الناس زادت الحمد لله , ما بقيتش بتكسف أوي زي الأول أو على الأقل كسوفي بقا له معنى مش على الفاضية و المليانة

2- ما خليتش حد يوقع على عريضة الأمان و الأخوة و دي محدش له دعوة هيا إيه :)

3- الحمد لله قراراتي خدتها لوحدي و اتحملت نتايجها , الوحش خدت على دماغي و الحلو الحمد لله ربنا كرمني فيه

4- بدأت أناقش مشاكلي فيس تو فيس فعلا , و بقيت برتاح في الطريقة دي أكتر من طرق التلميح و الشات و الرسايل

5- فكرت في قرار التخصص و خدته بعد تفكير استمر أربع شهور الصيف كلها و الحمد لله ربنا وفقني في الموضوع ده

6- كبرت جدا في شغلي الحمد و عملت حاجات كتير كويسة في السنة دي

7-  speck London very best loooooooooooooooooll
P:
اتجرأت أخيرا و بقيت أتكلم انجلش و لا يهمني أتخن تخين 

8- موضوع تفتيح عنيا ده مش عارفة , قراراتي نوعا ما لسه بطيئة شوية و فيها أخطاء , يعني دي فلتت مني

9- موضوع الخوف من الإرتباط ده مش بإيدي , مفيش حد كويس ظهر في حياتي من أصله و انا اللي قلت لأ

لما ألاقي الإنسان اللي أبقى متأكدة إنه يستهال أئتمنوا على نفسي حوافق إن شاء الله , غير كده مش حرتبط مهما حصل 

10-الحمد لله أنا بقيت واخدة بالي من فلوسي أكتر بكتير من الأول , بدل البنك اللي كان مفتوح للجميع ده 

صحيح لسه عبيطة شوية بس حفاجئكم بحاجة قريب إن شاء الله حتقولوا البنت دي سوسة 

11- موضوع إني اعامل الناس بالمثل ده فشلت فيه فشل ذريععععععع ,

أصل لو حعامل كل الناس بالمثل ححرق نص اللي أعرفهم بالضبط

12- الحساسية مش عارفة هيا خفت نوعا ما بس مش قوي , لسه برضه عايزة تخف أكتر من كده

يعني عموما بالنسبة للي كنت عايزة أحققه خلال سنة فالحمد لله دي تعتبر نتيجة كويسة جدا 

يلا كله يطلع ورقة و قلم

و يفكر هي السنة دي اتحسبت في حياته ؟؟

و لا سبتوها تعدي من غير ما تعملوا فيها حاجة ؟

وقفة

امبارح كان يوم تاريخي شوية

أنا فوبياتيك من صوت الرعد

كل واحد عنده فوبيا معينة أو خوف من شيء

بس أنا قلبت معايا بليلة رعب

و في الآخر انهيار عصبي

الأصوات كانت مرعبة قوي أعمل ايه

تاني مرة يحصلي انهيار عصبي في حياتي بالبشاعة دي

بس على الاقل أول مرة كان في وسط صحابي :(

كمية التليفونات و الرسائل اللي جتلي من امبارح للنهاردة فظيعة

ناس كتير قلقت عليا

أنا اتصدمت بناس كنت ما أعرفش أبدا انهم بيقرأوا البلوج بتاعي

فبجد عايزة أقولهم ميرسي ربنا يخليكم ليا يا رب على القراءة و السؤال و كل حاجة

كلنا بنوصل للحضيض في مرحلة ما

و أنا كنت وصلت للحضيض امبارح

الحمد لله على كل شيء

أنا رجعت قريت اللي كتبته امبارح لأني كتبته و أنا مش حاسه

اتوجعت قوي ان كل الأفكار السوداوية دي في دماغي و بتطلع في مرحلة معينة

حطيت البوست في المسودة لأنه بوست غير صالح للإستخدام الآدمي خالص

بصيت في المسودات لقيت اني كتبت 27 حاجة قبل كده و مسحتها

و كلها حاجات صعبة و مؤلمة

و كلها خلال سنة واحدة بس

أقل كمان

خلال 11 شهر بالضبط

طب ايه اللي يوصل بني آدم للحالة دي ؟؟

مش عارفة

العالم فعلا مليان ناس معدومة المشاعر و ناس ما تستاهلش

و ناس مش مفهومة و ناس غلبانة بتظلم بجهل

بس مش معناها نوقف حياتنا عندهم 

ببتسم لما أفتكر إن كل واحد ظلمني في حياتي كان سبب في حاجة كويسة دلوقتي أنا فيها

أنا من النوع العنيد قوي

كل ما حد يظلمني بيبقى هدفي إني أبقى أحسن من اللي أنا فيه دلوقتي

بفتكر أول مرة ظلم أثرت فيا كويس كانت و أنا عندي 18 سنة

قررت بعديها أسيب كلية العلوم لأني مش بحبها و أجي مصر 

و أكمل تعليمي في حاجة عايزاها

فكنت ماشية على الوتيرة دي

كل ما أتظلم , أموت حبة كده و أدخل بوابة الظلام و أصحى تاني و أفوق لنفسي الحمد لله

أنا كان عندي 17 سنة بتكسف أرفع سماعة التلفون

دلوقتي الحمد لله على قد ما شفت و اتقرفت و اتظلمت اتعلمت

بقيت حاجة تانية خالص

الحمد لله أنا انسانة متفائلة بطبعي

بشوف الجزء الحلو من كل حاجة

و مش بعرف أشوف الحاجة الوحشة

عادي 

عديت بلحظة ضعف

لحظة انهيار

إيه المشكلة ؟؟

كلنا بنقع عرضة للإكتئاب و الحزن 

المهم اننا ما نقفش عند المراحل دي

مش العيب إنك تقع

العيب إنك تفضل في الأرض لما تلاقي نفسك قادر تقوم

.........

على قد ما بحب المطر بكره البرق و الرعد

لى قد ما بكون مبسوطة و بلعب تحت الشتا

بكون مرعوبة و مستخبية و بترعش لما بسمع صوت الرعد

بخاف قوي

بحس بحاجات وحشة قوي ما تتوصفش

بحس إني بتجمد في مكاني

نفسي في حد يحضني لغاية ما الصوت يروح و يقولي معلش كله حيبقى تمام

معتقدش ده طلب كبير 

و لا إيه ؟؟