امبارح كان يوم تاريخي شوية
أنا فوبياتيك من صوت الرعد
كل واحد عنده فوبيا معينة أو خوف من شيء
بس أنا قلبت معايا بليلة رعب
و في الآخر انهيار عصبي
الأصوات كانت مرعبة قوي أعمل ايه
تاني مرة يحصلي انهيار عصبي في حياتي بالبشاعة دي
بس على الاقل أول مرة كان في وسط صحابي :(
كمية التليفونات و الرسائل اللي جتلي من امبارح للنهاردة فظيعة
ناس كتير قلقت عليا
أنا اتصدمت بناس كنت ما أعرفش أبدا انهم بيقرأوا البلوج بتاعي
فبجد عايزة أقولهم ميرسي ربنا يخليكم ليا يا رب على القراءة و السؤال و كل حاجة
كلنا بنوصل للحضيض في مرحلة ما
و أنا كنت وصلت للحضيض امبارح
الحمد لله على كل شيء
أنا رجعت قريت اللي كتبته امبارح لأني كتبته و أنا مش حاسه
اتوجعت قوي ان كل الأفكار السوداوية دي في دماغي و بتطلع في مرحلة معينة
حطيت البوست في المسودة لأنه بوست غير صالح للإستخدام الآدمي خالص
بصيت في المسودات لقيت اني كتبت 27 حاجة قبل كده و مسحتها
و كلها حاجات صعبة و مؤلمة
و كلها خلال سنة واحدة بس
أقل كمان
خلال 11 شهر بالضبط
طب ايه اللي يوصل بني آدم للحالة دي ؟؟
مش عارفة
العالم فعلا مليان ناس معدومة المشاعر و ناس ما تستاهلش
و ناس مش مفهومة و ناس غلبانة بتظلم بجهل
بس مش معناها نوقف حياتنا عندهم
ببتسم لما أفتكر إن كل واحد ظلمني في حياتي كان سبب في حاجة كويسة دلوقتي أنا فيها
أنا من النوع العنيد قوي
كل ما حد يظلمني بيبقى هدفي إني أبقى أحسن من اللي أنا فيه دلوقتي
بفتكر أول مرة ظلم أثرت فيا كويس كانت و أنا عندي 18 سنة
قررت بعديها أسيب كلية العلوم لأني مش بحبها و أجي مصر
و أكمل تعليمي في حاجة عايزاها
فكنت ماشية على الوتيرة دي
كل ما أتظلم , أموت حبة كده و أدخل بوابة الظلام و أصحى تاني و أفوق لنفسي الحمد لله
أنا كان عندي 17 سنة بتكسف أرفع سماعة التلفون
دلوقتي الحمد لله على قد ما شفت و اتقرفت و اتظلمت اتعلمت
بقيت حاجة تانية خالص
الحمد لله أنا انسانة متفائلة بطبعي
بشوف الجزء الحلو من كل حاجة
و مش بعرف أشوف الحاجة الوحشة
عادي
عديت بلحظة ضعف
لحظة انهيار
إيه المشكلة ؟؟
كلنا بنقع عرضة للإكتئاب و الحزن
المهم اننا ما نقفش عند المراحل دي
مش العيب إنك تقع
العيب إنك تفضل في الأرض لما تلاقي نفسك قادر تقوم
شكرا علي هدا التفائل
ردحذفيمكن ما اتكوني عارفه بس ناس كتير بتقرا مواضيعك
وبتتاثر نفسيا فيها
مش معني انو ما في تعليقات انو ما حدا عدا علي الموضوع
بالعكس المواضيع بجد كتير مميزه
ممكن هدا يكون سبب قله التعليقات انو الناس مش عارفه شو اترد
الي بدي اوصلك اياه انك من دون ما تشعري بتوزعي الامل علي الناس وبتغيري حياتهم
يرسي جدا على المتبعة و التشجيع
ردحذفأنا بفرح قوي لما ألاقي متابعين جدد و كومنتات
ربنا يخليك يا رب
:)
ردحذف