في الكافيتيريا

الصبح كل يوم بوصل الكلية على الساعة تمانية و ربع كده

طبعا ده لأني صاحية من ستة

لما دخلت كلية في أبوقير تقريبا كنت فاكرة نفسي كتكوت

ماله المجمع زي الفل

كبده هوهو بره و عبده نتانة و ابو بديع الفظيع

يلا ظروف بقا

قدامي 15 دقيقة

يا أجري على المحاضرة عشان دكتور رزالة ما يفطرش بيا

أو استهبل و أخد كوباية نسكافيه في السكة و اقعد أشربها قدامه

عمدة عمدة , صباح الخير عامل ايه ؟؟

تمام يا جميل واحشاني مش باينة ليه ؟؟

امتحانات و ظروف يا عماد

طلباتك يا قمر

كوباية نسكافيه

حواري مع عماد مش بيتغير يوميا

كل يوم ازيك يا جميل , كل يوم واحشاني ,

كل يوم عندي امتحانات و ظروف و كل يوم عايزة النسكافيه

لدرجة مرة انه قالي انتي غيرتي هدومك امتى ؟؟ انتي مش لسه كنتي لابسة أحمر ؟؟

لا يا عماد كنت لابسة أحمر امبارح صباااااااااح الخير

نروح المحاضرات اليائسة و نرجع تاني للكافيتريا و ينحصر الحوار المرة دي على عندك ايه ؟

عندي بانيه و حواوشي و سوسيس و برجر

عندي كل حاجة يا جميل

امممممممم

امممممممم

و اقعد أفكر كأني مش كل يوم بقف الوقفة دي

حواوشي جبنة يا عماد

و أقعد

تبص على الطرابيزات

تستغرب

دايما فيه ولد لابس اسود شعره ملولو ناعم كده و اسود قاعد متنرفز

بقالي أكتر من سنة بشوفه

قاعد يهز رجله

يضرب في الأرض

لوحده

طيب ليه ؟؟

يا ابني ايه اللي مزعلك ؟؟

حد يزعل قمر زي ده ؟؟

بت لمي نفسك ده شكله معقد لفي وشك بقا خلي عندك ذرة حيا

تلاقي برضه طربيزة مليانة مساطر و مثلثات و حرف التي و شنط سودة كبيرة

بتاعت الجماعة بتوع العمارة

اللي قرفونا بحاجتهم و لوحهم و النماذج بتاعتهم

كل واحد ماشي ماسك النموذج شايله فوق دماغه خايف عليه

بس على مين

أول ما نحاول ندخل باص الكلية

مش النموذج بس اللي بيتهرس

الواد نفسه اللي عمل النموذج مش بنلاقيه

دايما لازم كام فقيد و شهيد يطلعوا من عملية دخول الباص دي

المهم نرجع للكافيتيريا

تلاقي برضه طرابيزة البنات

أو الراهبات بمعنى أدق

دي بتكون طربيزة عليها من ست لعشر بنات

رافضين تماما فكرة ان المجتمع مكون من ولد و بنت

و مش مقتنعين ان أبدا أبدا ان عشان تخلف و تنتج

فلازم كروموسوم اكس يمتزج مع كروموسوم اكس أو واي

معرفش ايه وجهة نظرهم بالضبط في الحياة

لو قرب ولد ظريف لطيف يختي عليه ... احم احم

ممكن كرسي ؟؟

يدوله نظرة كلهم كأنه شتمهم

الكـــــــــرسي محــــــــــــــــجوز

الولد يجري من الخوف

يا فكيــــــك

و تلاقي طرابيزة السايبر

رغم ان عندنا سايبر في الكلية نت و طباعة و بلي ستيشن

إلا انهم رغم كل الظروف و المعوقات و الروائح المقززة و الدخان و قلة الكراسي و الازعاج

فهما مصممين انهم حيلعبوا في الكافيتريا و يعملوا زحمة

و آخر حاجة طرابيزة اللي بيلعبوا صلح و اكس أو

و آه يا قفا آه يا قفا آه ه ه ه ياااااا قفا

مش معناها ان مفيش طرابيزات طبيعية

حاش و كلا طبعا

كفاية الطرابيزة بتاعتي

ست بنات , تلات ولاد , اتنين لسه مش عارفين هم ايه بالضبط احم ....

أنا

البنت اللي قريب بدل البؤبؤ في عينيها حيطلع قلب حب

البنت المكتئبة على طول و جايبالنا النكد

البنت تيتة الحجة اللي عيب و حرام و لماذا و كيف

البنت اللي مأنتمة مع عمرو دياب من تحت و مع عمرو خالد من فوق

البنت اللزقة

الولد اللزقة

الولد اللزقة التاني

الولد اللي لازق للولدين اللزقة

صداع

صداع عارفة جالكم صداع

يعني عشان بس أكمل خيري عليكم

و محدش يقول قريت كل القصة التافهه دي من غير ما استفيد

لأ معنديش أنا الكلام ده

احنا في عالم الاختلافات

زي ما الناس متقبلاك

اتعلم تتقبل اختلافهم

احترم خصوصياتهم

افهم تصرفاتهم

و في النهاية ما تحرمش نفسك من فرصة صداقة

مهمها كان اللي قدامك ده بعيد عنك في التفكير و الأسلوب

أكيد في يوم من الأيام حتلاقي حاجة مشتركة

قميص أحمر , قميص أزرق

خدت بالي دلوقتي اني دخلت في شهري التاني للبلوج

يعني يعتبر انجاز بالنسبة ليا اني اتحملت اكتب كل ده

في العادة أكتب كام حاجة و اقفله

بس قررت أكتب و ما يهمنيش

و الحمد لله صحابي حبوا البلوج جدا و أتمنى انه يكبر و يزيد عدد المتابعين له

ححكيلكم قصة هبلة كده حصلتلي في العيد

واقفة قدام المراية ببص لنفسي

استعدادا للخروجة البهية اللي حخرجها أنا و ماما

رايحين نزور واحدة صاحبتها من ابتدائي

ما شاء الله أكتر حاجة بتعجبني في ماما

ان عندها تلاتة صحاب من ابتدائي

تروح , تسافر , ترجع , تغيب

التلاتة ما شاء الله عليهم بيحبوا بعض جدا

المهم

ببص للميك آب

يوووه بقا هو أنا رايحة اتخطب مش حاطه

أبص للبيرفيوم

امممممم

طيب بلاش نتانة ححط منك ما تبصليش كده يا عم ازازة انت

أبص للمراية تاني

قمر يا خواتي ميك آب ايه بس

بضحك على نفسي عشان مكسلة أحط

ماما ورايا

حطي حاجة في وشك يا نانسي

كحلة و بودرة , أي حاجة كده

ألف و أبصلها و تقريبا فهمت قصدها

و أسل السؤال بكل براءة

ماما هو ولاد اختها حياكلوا معانا ؟؟

معرفش يا نانسي , انتي و أسئلتك الغريبة دي , حطي حاجة في وشك يلا

و مفيش لبس أديق من كده شوية ؟؟

يا ماما أنا رايحة فين بس ؟؟

اتأخرنا يلا بينا مفيش فايدة

روحنا و معانا تورتاية حلوة كده من كلاسيك عشان العيد

طلعت السلم و ببص لماما مستنياها تقف جنبي قبل ما أخبط

ماما خبطي يلا و هي لسه في نص السلم

حاضر يا ماما

أرن الجرس

تررررن تررررن

و يفتحلي شاب عريض المنكبين , طويل الساقين و ابتسامة براقة

أنا في عقل بالي : آه منك يا ماما و يا طنط , كنت حاسة انه كمين !!!

و فلاش باك على الميك آب اللي مرضيتش أحطه

الولد اتفضلي

و أنا فينك يا ميك آب بس

فوقي يا بت

و أدخل أحط التورتة على طربيزة و أنط على كنبة جوه

مفيش ثواني الولد دخل

هو

بس

مش

هو

اممممممممممم

يادي النيلة

هو لحق يغير قميصه امتى؟؟

و غيره ليه ؟؟

القميص كان أزرق

ايه اللي قلبه أحمر ؟؟

شكلي كده بخطرف من الكسفة

دخل القميص الأزرق ورا القميص الأحمر

يا حلاوة يا ولاد

دول بقوا اتنين

شكل الصنف كان معمول بمزاج المرة دي

و اكتشف انهم توأم لما طنط تقولي شايفة محمد و على يا نانسي

ولاد اختي

ما شاء الله عليهم

عندهم 25 سنة و متخرجين و لسه عاملين مشروع سوا

أنا أهلا و سهلا

و مرجان أحمد مرجان شغال في التلفزيون

أبص للفيلم كأني ما شوفتوش سبع تلات خمسوميت مرة

بحاول أشتت تفكيري اللي على يميني واحد و على شمالي واحد

يا مامي أنا خايفة

طيب أفهم بس

هما حيقسموني بالنص ؟؟

اممممممممممم

شكلها عيلة حبوبة كده و بيحبوا يحسسوا ضيوفهم انهم في بيتهم مش أكتر

يمكن أنا فهمت غلط من خبراتي الحياتية المفجعة في تاريخ العلاقات

مفيش ثواني

أنا بحاول أقنع نفسي بإن أنا اللي مخي مش لطيف

و هوبا القميص الأحمر اتكلم

انتي بتدرسي ايه ؟؟

أنا أوباااا أول سؤال من الأسئلة المقدسة اللي مالهاش معنى عند أي ولد

بدرس ادارة نقل دولي و لوجيستيكس

يا رب سترك

فجأة القميص الأزرق اتكلم

بتدرسي فين , أبوقير و لا ميامي ؟؟

أنا إرسولكم على بر

واحد بس اللي يسئل

أبو قير

القميص الأحمر : أنا درست في الأكاديمية كورسات كومبيوتر كتير

القميص الأزرق : و أنا كمان

أنا : آه مهو أنا باخد أي سي دي ال هناك في ميامي

الأحمر : و أنا خدتها من هناك

الأزرق و أنا كمان و خدت كذا من هناك

الأحمر : و أنا كمان

جالي صداع من صدى الصوت اللي في ودني

ما انتم توأم فهمت خلاص انكم فولة و اتقسمت نصين

طنط تدخل

اسئلها يا علي بتدرس ايه ؟؟

سئلناها خلاص

طنط : طيب كويس

مظاهر المؤامرة بتبان كل شوية

طب مين علي ؟؟

هي كانت بتكلم أي قميص فيهم

طيب ركزي يا بت

القميص الأزرق شكله ظريف

طب دول توأم ظريف ايه بس!!

الاحمر بيكلمني

لأ و النبي الأزرق فين

ساكت

آه الصنارة غمزت غلط

و يقعدوا ساعة يتغدوا

و ساعة يتكلموا على القطة بتاعتهم

و كده

و ابتديت أنام في مكاني

فعلا بتكلم جد

أنا بنام في مكاني في أي حتة

روحنا

و ماما شغلت إسطوانة شباب زي الفل

لو يجيلك ولد زي دول أوافق على طول

أنا بحب الشباب البيتوتي المحترم المتربي

مش بحب أزعل ماما

سبتها لأني عارفة ان الصنارة غمزت غلط و اني تجنبت أدي أي كونتاكت بأي وسيلة فضائية في الكون

رغم ان كان فيه أكتر من تلميح و أكتر من فرصة للكلام ده

لأني مش فريسة تتحط في كمين

لااااااااااا

مش أنااااااا

أو عشان بتلكك و بتحجج دايما على رأي واحد من صحابي

دي حدوتة العيد

كل فترة حصدعكم بواحدة من دول

لستة الأماني

كل واحد فينا عنده دايما مجموعة من الأمنيات

في ناس عارفة هي ايه و مخططالها كويس

و ناس ياما نفسها مش أكتر

و ناس مش عارفة هي نفسها في ايه

فيه ناس أمنياتها واقعية جدا مش بتزيد عن

الجواز

وظيفة حلوة

شهادة

و فيه ناس أمنياتها بعيدة كل البعد عن أرض الواقع

طيران

ركوب مكوك فضائي

و حاجات كده

و فيه ناس عندها أمنيات مجنونة لكن تحقيقها مش مستحيل

زيي زي كل الناس بسعى في دراستي بشكل كويس

منتظرة يجيلي نصيبي في يوم من الأيام

بشتغل , بتدرب , بشغل نفسي دايما

لكن فكرت ايه الأمنيات المجنونة اللي نفسي اعملها

نفسي أسافر جزر المالديف و جزيرة سي شيل

نفسي ألعب بالتلج , أروح حتة مليانة تلج أبيض و أفضل ألعب بيه

نفسي أركب تلي فريك فوق جبل عالي

نفسي في مرجيحة مش مهم في جنينة و لا بلكونة و لا في أوضة حتى , بس مرجيحة

نفسي أركب مركب في بحيرة كبيرة و أصطاد سمك

نفسي اقعد في مساحة خضرا لا ليها أول و لا آخر و أفضل هناك لغاية ما الشمس تغيب

كان نفسي أتعلم أركب عجلة و ده كان مستحيل بالنسبة ليا

بعد محاولات استمرت سنين آخيرا ركبتها

مفيش مانع بإننا نحقق ذاتنا و نتمنى امنيات طبيعية زي الجواز و الشغل و غيره

بس ما ننساش الحاجات اللي في يوم قلنا نفسنا نعملها و ما نخليش الحياة تاخدنا في المكان اللي هي عايزاه

في يوم من الأيام ان شاء الله حبص على اللستة دي و أقول ياه خلصت حعمل ايه تاني ؟؟

و حرجع أكتب لستة تانية إن شاء الله

حتحقق اللي في اللستة لوحدك أو مع حد ده شيء يرجعلك

لكن المهم اعمل كل اللي في نفسك

لا يهمك كلام حد و لا مجتمع

طالما مش بتعمل حاجة تغضب ربنا بيها

خليك نفسك

سيبك من الناس

السعادة في الشارع

عمرك اتدايقت و انت ماشي في الشارع ؟؟

عمرك حسيت الناس مخها ضارب و لا ماشية تخبط و لا معندهمش دم و لا ذوق

بسيطة و لا تزعل نفسك الحل بسيط

مش بعمل دعاية ما تخافوش معنديش حاجة أبيعها

بس على السريع كده شوية وسائل تخلي الواحد يرتاح من الشارع و صداعه

1

السماعة

أحلى حاجة حب أعملها و أنا ماشية في الشارع أحط سماعة الموبايل في ودني

مش مهم حتسمع ايه بيها قد ما مهم اللي مش حتسمعه بسببها

من ساعة ما حطيتها و أنا لا بسمع معاكسات تحرق الدم

و لا بياعين مالهمش لازمة

و لا يا أنسة يا أنسة تعالي اتبرعي بدمك و خلينا نلوثك بالحقن القذرة بتاعتنا و الإيدز و الأمراض اللي عندنا

ماشية باشا في الشارع لا ليا و لا عليا

حاجة مريحة جدا لو بالذات مضطر زيي تعدي نفق سيدي جابر

أو تعدي جنب محطة القطر كل يوم الصبح بزحتمها و قلة ذوق الناس فيها

2

الفكة

الفكة من أسباب السعادة في هذا الكون البهيج المنشرح الخ

لو شفت حد غلبان في الشارع حتديله و ضميرك مستريح و تكمل طريقك سعيد

لو بتشتري حاجة محدش حينصب عليك و يقولك ما عييش فكة و يبقالك يا باشا و عدي عليا بعدين

3

اللبس المريح

معلش كل منطقة و لها عقلياتها اللي ساكنين فيها

ما تبقاش الواحدة رايحة المنشية تجيب خيوط تعمل بيها تريكوه اكمنها فنانة و تلبس هاي هيلز و سكيني جينز

ما أضمنلهاش حيتعمل فيها ايه

و ما تبقاش الواحدة رايحة كارفور , شيليز , روستري , سان

و تلبسلي تريننج و لا هدوم معرفش عاملة إزاي و تتوقع محدش حيعلق عليها

و الولاد نفس الشيء يعني فكروا قبل ما تلبسوا معلش يعني

ما تبقاش في الكلية و لابسلي شبشب حمام و برمودا و تقول أنا حر

ده منظر مش بمل من الضحك عليه غصبن عني :)

4

ركز و انت ماشي

لو بصيت قدامك حتعرف كويس مين اللي حيخبط فيك بقصد أو من غير قصد

فبدل ما تمشي تعد الزبالة اللي في الأرض

امشي واثق من نفسك باصص قدامك على الناس

و الله بتبقى كبسة ما بعدها كبسة لما تلاقي حد جاي ناحيتك شكله ناوي يخبطك

و انت تنزاح خطوة يمين و لا شمال و تبعد عنه

بتحس بلذة الإنتصار

نياهاهاهاهاهاها

زي الضحكة الشريرة دي بالضبط

---

دي تقريبا أسباب السعادة أثناء المشي في الشارع

حطهم حلقة في ودنك

و لو تقدر تخرج مع حد اخرج بدل الخروج وحداني

أحلى حاجة الخروج مع حد يونسك

متش , بلالين , سنو وايت

الناس بره زعلانة على المتش

بتضرب بعض

و متدايقين

و اللي قربوا يقتلوا بعض

و جاري اللي فوقي بتلات أدوار سامعاه بيتخانق مع مراته

يسبلها بالدين

و هي تزعق

و كل ده بسبب كورة و شوية ناس بتجري في ملعب

في الوقت ده فجأة اتمنيت حاجة غريبة

بلونة

أيوة بلونة من اللي فيها غاز هيليوم

بتطير كده لوحدها كام يوم

طب ليه ؟؟

افتكرت و أنا صغيرة

كنت بشبط في واحدة كل ما نروح السنتر نشتري أكل

بلونة على فاكهه

على أميرة

على علاء الدين

بلالين

بلالين

بلالين

افتكرت لما كنت صغيرة و ماما مسمياني سنووايت

و فضلت فترة مقتنعة بإني حكبر و أبقا سنووايت فاكراها وظيفة تقريبا

بفتكر كلمات الأغنية كويس عربي و انجلش لأني حتى و أنا مش فاهمة حاجة

كنت بشغل النسخة اللي قدامي و اتفرج

من كتر ما حافظة الفيلم ممكن أتفرج عليه و الصوت مكتوم حتى :)

some day my prince will come

some day will meet againe

and away to his castle will go

to be happy for ever I know

في يوم من الايام , في يوم مهوش بعيد

راح ييجيني حبيبي بستانه و القى نفسي في عشه السعيد

لما ييجي الربيع , حتنور القلوب و الفؤاد ينول كل اللي يتمناه

---

معرفش ايه اللي دخل المتش في البلالين في سنو وايت

بس اللي أعرفه اننا لازم نرجع للبني آدم اللي جوانا

نسمع كلام الطفل اللي مدفون بعيد قوي جوه

نخلي أحقادنا على جنب

نفرح باللحظة

ما نخسرش نفسنا و بعضينا لأتفه الأسباب

من الآخر

نبقى بني آدمين بجد

تصنيفات

كنت بتكلم مع واحدة من أعز صحابي في مواضيع كتيرة

مش عارفة الموضوع قلب إزاي على تصنيفي للناس

و مش عارفة هل تصنيفي للناس يعتبر جمود مني

و لا تنظيم زيادة زي ما بتقول

صنفت الناس لمجموعة من الفايلات

الفايل الأول

فايل البلاك ليست

دي مجموعة الناس اللي ما يشرفنيش اعرفها

و لا عايزة أتعامل معامل

و شايفة انها ما تستهالش حتى اني أسلم عليها

دول مش بيتحاطوا عافية هنا

بيكون ليا أسبابي طبعا

الفايل التاني

صحابي

و دول بيتقسموا لدرجات

صحاب سطحيين

صحاب ما ينفعش أثق فيهم

صحاب لازم أثق فيهم

صحاب بموت فيهم

زي خواتي

دول مجموعة من الولاد

بيقسموا لإتنين

خوات سطحيين دول مترقيين من صحاب سطحيين

و خوات بمووووت فيهم و دول مترقيين من مجموعة صحاب بموت فيهم

الفرق بين صحابي و خواتي

اني مع إخواتي ممكن أتجن أكتر و أعمل اللي أنا عايزاه براحتي و مش حتفهم غلط

و آخر فايل

الإعجاب

ده فايل بين كل فترة و فترة حد يدخل فيه

و الحقه أنا بإني أرميه للفايلات اللي قبله و أسيبه فاضي

أخربها و أقعد على تلها يعني

رغم ان تصنيف خواتي ده مش بيعجبني لكن للأسف في مجتمع زي مجتمعنا غصبن عننا بنوجد النوع ده من الناس

لأن الصداقة بمعناها السامي شيء بقا صعب و الناس بتحب تشوهها و محدش بيحترمها

محدش بيقدر ان الإهتمام ممكن يكون لسبب غير عاطفي أو جنسي

ممكن يكون فقط لأن البني آدم ده بيحب يهتم باللي حواليه مش أكتر

أو البني آدم ده بيلاقي نفسه لما يساعد الناس

أو هو كده دي طبيعته و مش قاصد حاجة

مش عارفة الفايلات دي كلها آخرها ايه

لكن اللي اعرفه اننا لازم نبقى شفافبن في تعاملنا مع الناس

واضحين و صريحين

متش , تجربة , مشاعر

النهاردة خضت تجربة فريدة من نوعها بالنسبة ليا

ممكن تعتبر حاجة عادي بالنسبة لكتير

لكن بالنسبالي كانت حاجة كبيرة

كان يوم جميل من أوله عموما

حليت كويس في الإمتحان و الحمد لله

اتنين من أكتر الناس اللي بحبهم قروا فاتحتهم

و مصر كسبت الماتش

تي تري تي تي تري تي تي تري تي

مصــــــــــــــــــــــــــــر

التجربة بقا كانت اني أنزل أتفرج على الماتش بره البيت

رحت أنا و صحابي كافيه حاجزين فيه جزء لينا

كان عددنا يعتبر شلة كبيرة و محترمة

مش اي كلام يعني

لبست أحمر في إسود

لونت على وشي بألوان علم مصر

اتجهزت للتشجيع

نوعا ما كنت مكسلة أنزل و قلت أتفرج في بيتنا

لكن رحت و اعتقد اني حتفكر التجربة دي باقي سنين حياتي كلها

قاعدين كلنا بنغني و ندعي و نتفرج

أنا قاعدة و معروف عني اني ببقا حاضنة شنطتي فوقي

قال يعني البت وش كسوف قاعدة حاطة شنطتها في حجرها

المهم فجأة دخل أول جون في الدقيتين الأولانيين

ما حسيتش بنفسي

أنا بنط من الفرحة و بصفق لدرجة ان ايدي وجعتني

و ما هديتش خالص غير لما الجون اتكتب فعلا على الشاشة

و صاحبتي بتقولي شنطتك , انتي شنطتك اتحدفت من قوة نطتك

قولتها و الله ما حسيت بنفسي

بجد أنا فيه ثواني ما حسيتش بيها بنفسي فعلا

رجعنا لقواعدنا ساليمين

نشجع

نزعل

نخاف

مشاعر كتير متداخلة

و كل شعور بيجيلك بسرعة و يختفي حسب سرعة أقدام اللعيبة و سرعة حركة الكرة بينهم

كمية المشاعر اللي بتحس بيها رهيبة فعلا

أنا في عالم آخر

مع الكورة

صاحبتي اهدي يا بنتي ما تعمليش في نفسك كده

أضحك و أرجع أكشر تاني للشاشة

أحلى حاجة انك لما بتبقى بتشجع بره مش بتضطر تسمع صوت المعلق السخيف و هو قاعد يتكلم كلام مالوش لازمة

أكتر حاجة بترفع ضغطي و تديقني هي المعلقين الرياضيين في الكورة

ما عدا المعلق بتاع ماتش أيطاليا و مصر , ده كان عسل و الله

المهم

من كتر الدوشة و التشجيع بيقى كل جوارحك مع الكورة و مش سامع حاجة خالص

تركيز و تركيز فقط

مر الماتش و التكشيرة و الأعصاب الفلتانة مش بتتفك

و كل ما الماتش يقرب يخلص

كل ما أبقى عايزة أقوم أكسر التلفزيون أو أضرب حد

فاضل دقيقتين على نهاية الوقت الأساسي من الماتش

أعصابي راحت

فقدت الأمل

مفيش فايدة

اعلن الحكن عن 6 دقايق وقت أضافي كنت مبسوطة جدا

ابتسامة تتسلل على وشي فجأة

خمس دقايق يمروا

و كل اللي قاعدين أعصابهم باظت خلاص

و بدأ واحد من صحابي يقول الماتش مش بتاعنا الماتش مش بتاعنا

هو معروف بهدوئه بس في الماتش كان حاجة تانية

و واحد تاني كانت قربت تجيله سكتة قلبية , كنا بنفكر نتصل بالأسعاف

شيلوا الميتين اللي تحت يا جماعة

ابتدينا نلم حاجاتنا و نستعد للخروج مهزومين

مفيش ثواني إلا و الجون التاني دخل

كل حاجة كانت قدامي أو عليا بقت في الأرض

أنا لو قعدت أشرح عن الشعور اللي حسيته من هنا لبكرة مش حوفيه حقه

عمري ما حسيت بكم السعادة دي

عمري ما تصورت ان فيه سعادة بالقدر ده أصلا

اعتقد لو اتجوزت مش حعمل كده

آه فعلا مش حعمل خالص مالص

أنا مؤدبة , ماما معلماني الأدب و أنا برضع

نرجع للكلام المهم

أدركت ان في الحياة حاجات بسيطة قوي ممكن تخليك تجرب مشاعر جديدة

أدركت إن مفيش مانع الواحد يجرب

حتى لو التجربة ما عجبتوش أكيد اللي وراها حتعجبه إن شاء الله

يعني لو كسلت أنزل ما كنتش حعرف ايه اللي فاتني أصلا

خلينا نبقى انشط , نبقى مجانين ساعات , نخرج عن روتين حياتنا

مش بس في متش كورة لأ في حاجات تانية كتير

لو كل فترة و فترة خضنا تجربة جديدة حنحس بفررق كبير

و نرجع لروتينا العادي و احنا أنشط و عندنا قدرة على العطاء أكبر

و خبرة حياتية خبرة مشاعر مفيش مثيل ليها