كل واحد فينا عنده دايما مجموعة من الأمنيات
في ناس عارفة هي ايه و مخططالها كويس
و ناس ياما نفسها مش أكتر
و ناس مش عارفة هي نفسها في ايه
فيه ناس أمنياتها واقعية جدا مش بتزيد عن
الجواز
وظيفة حلوة
شهادة
و فيه ناس أمنياتها بعيدة كل البعد عن أرض الواقع
طيران
ركوب مكوك فضائي
و حاجات كده
و فيه ناس عندها أمنيات مجنونة لكن تحقيقها مش مستحيل
زيي زي كل الناس بسعى في دراستي بشكل كويس
منتظرة يجيلي نصيبي في يوم من الأيام
بشتغل , بتدرب , بشغل نفسي دايما
لكن فكرت ايه الأمنيات المجنونة اللي نفسي اعملها
نفسي أسافر جزر المالديف و جزيرة سي شيل
نفسي ألعب بالتلج , أروح حتة مليانة تلج أبيض و أفضل ألعب بيه
نفسي أركب تلي فريك فوق جبل عالي
نفسي في مرجيحة مش مهم في جنينة و لا بلكونة و لا في أوضة حتى , بس مرجيحة
نفسي أركب مركب في بحيرة كبيرة و أصطاد سمك
نفسي اقعد في مساحة خضرا لا ليها أول و لا آخر و أفضل هناك لغاية ما الشمس تغيب
كان نفسي أتعلم أركب عجلة و ده كان مستحيل بالنسبة ليا
بعد محاولات استمرت سنين آخيرا ركبتها
مفيش مانع بإننا نحقق ذاتنا و نتمنى امنيات طبيعية زي الجواز و الشغل و غيره
بس ما ننساش الحاجات اللي في يوم قلنا نفسنا نعملها و ما نخليش الحياة تاخدنا في المكان اللي هي عايزاه
في يوم من الأيام ان شاء الله حبص على اللستة دي و أقول ياه خلصت حعمل ايه تاني ؟؟
و حرجع أكتب لستة تانية إن شاء الله
حتحقق اللي في اللستة لوحدك أو مع حد ده شيء يرجعلك
لكن المهم اعمل كل اللي في نفسك
لا يهمك كلام حد و لا مجتمع
طالما مش بتعمل حاجة تغضب ربنا بيها
خليك نفسك
سيبك من الناس
عجباني الفكرة...إن شاء الله هأعمل أنا كمان لستة..
ردحذفوكمان كام سنة كده نبص عاللستة..ونشوف حققنا إيه..أتمنى إنه ميكونش ولا حاجة :D
ان شاء الله :)
ردحذفميرسي على الكومنت
و أتمنى اننا نحقق أمانينا كلنا ان شاء الله
ياااه انت لسه فاكره تعملى الليسته دى
ردحذفانا عندى برضه لسته هابله كده و نفسى اعملها
1- اتعلم غطس و أغطس فى استراليا و جنوب افريقيا
2- اتعلم رقص صلصا و اروح كوبا
3- اتعلم فرنساوى
5- اعمل بانجى جنب مره واحده على الاقل
6- اعيش شهرين فى المغرب
7- اكتب سيناريو فيلم واحد على الاقل
8- تعما علاقه مع بنت من امريكا اللاتينيه و لو ليوم واحد
9- اعيش شهر مع رهبان بوذيين
10- اتعلم جيتار
و جارى العمل على تعلم الجيتار و الغطس و التحويش للسفر يا فندم
اما احد اهم الحاجات اللى كان نفسى اعملها السنه اللى فاتت و عملتها
1- اتعلم تنويم مغناطيسى
2- اجرب الغطس مره واحده على الاقل
3- اعمل شروع خاص بيا
اما الحاجات اللى معملتهاش فاترحلت للسته السنه دى
ههههههههههه شفت إزاي , افتكرت على كبر اكتبها
ردحذفهي موجودة من فترة بس ما اتعملش منها غير ركوب العجلة , و لستتك مش هبلة و الله خالص , أفكار كتير منها عجبتني بالذات الغطس و شهرين في المغرب . المغرب جميلة جدا ما شاء الله , أما عن التنويم المغناطيسي فالواحد يخاف منك كده و لا ايه ؟؟ هههه
ميرسي على الكومنت الجميل D:
عجبتنى المدونه وقرأيت اغلبية المواضيع..طالما انتى بتتكلمى عن الى الواحد نفسه فيه هاقول انا نفسى فى ايه1_
ردحذفنفسى اعيش حياتى كلها علشان احس انى سبب فى تغير للامه كلها.ولو مت قبل ما حقق دا يكفينى شرف المحاوله.
2_افتح دار تدبر قرأن واكون انا المدرس بتاعها والحمد لله نجحت بعض الشيء فى مجال التدير مع مجموعه ضغيره بس بداية مبشرة
3_ اعمل دار ايتام كبيره ويكون فيها قسم للايتام المعاقين وبدأت بس مجرد زيارة كل شهر مره بس برضو مش بطال
دا كدا حاجات تنفعى فى اخرتى
نيجى بقا للحاجات الى ممكن كاشاب نفسى فيها نفسى اتجوز بنت بموصافات خاصة شويه..اول ماشوفها ابقا فرحان بنت طيبه بسيطه .بنت هاتبقى اول واحده فى حياتى .هاعاهد ربنا انى مازعلهاش واننا ومنازعلش ربنا منا والحمد لله لقيتها.مش عارف ليه كان نفسى وحلم حياتى اعيش فى عصر الرسول واعرف فى فترة عمله مع السيده خديجه قبل مايتجوزها كانوا بيتعاملوا ازاى..بس اكيد كانت ومازالت اعظم قصة حب لانها حب اخلاقى وفى الاخر اتجوزوا. مش قيس وليلة او رميو وجوليت.نفسى اعيش قصه حب زى الرسول والاجمل ان الرسول هاتبقى زوجته برضوا فى الاخره
ونفسى اخلف من زوجتى دى ولاد وبنات كتير..
نفسى يكون بيتى بسيط والاساس فيه الحب .مش عارف ليه بفكر دايما وبدعى ربنا انى وزوجتى نموت مع بعض .لانى مش هاقدر اعيش بعدها.وبتمنى من ربنا لو مت انا الاول ماتتجوزش بعدى لان الزوجه هاتبقى فى الجنه لاخر زوج ليها فى الدنيا علشان كدا بقول يااارب نموت احنا الاتنين مع بعض او ماتتجوزش بعدى لاانى والله وربنا مطلع على نيتى ماهاتجوز بعدها.نفسى اعيش قصة حب بس ماتكونش حرام
4_ نفسى المسجد الاقصى يتحرر واكون سبب فى دا
5_ فى حاجات ناس كتير نفسها فيها زى الرحلات والاماكن السياحيه بس انا لى دماغ تانيه نفسى شهر العسل يكون فى عمره.هاتبقى احلى رحلة فى حياتى.
6- نفسى من زمان جدا اشوف الرسول فى منامى ولحد دلوقتى ماحصلتش مع انى نفسى فيها قووووووووى
-بتمنى من ربنا ماكونش ولا غنى ولا فقير ابقا عايش سعيد وراضى.نفسى والدى والدتى يرضو عنى
نفسى اموت شهيد..كان فى حاجات تانيه نفسى فيها بس لما الانسان بيمر فى حياتة بموقف يشوف فيها ناس من اصحابه او شيوخه ميتين وبيغسلهم بايده بيحس ان الدنيا مش بتدوم علشان كدا مش بحب حاجات تضيع وقت احب اعيش حياتى كلها عمل خير او شغل وفى نفس الوقت مش لازم ازعل او اضايق علشان رزقى وعمرى مكتوب..مش عارف حاسس انى اندمجت قووى ومره واحده اكتشفت انى كتبت كتير بس مبسوط حاسس انى كان نفسى اقول الكلام من زمان.وهاكتب برضوا
نفسى البنت الى بحبها.تعرف انا بحبها جدا ومستعد اعمل اى حاجه علشانها.بس ممكن علشان انا طبعى مابعرفش اعبر عن مشاعرى او خجول دى مشكلتى وعاجزت عن حلها.نفسى تقرأ كلامى عنها.نفسى اقولها على حاجه حاصلت لى وبشرتنى انها بأذن الله هاتكون لى زوجه. نفسى اقولها ان والدتى راضية عن انى حبيت البنت دى وقالتى انت ازاى عايز تتجوز واحده وفى نفس الوقت مش عايزه تكلمها.برضو كان نفسى تعرف انى اى حاجه كنت بقولها كانت نتيجه لانى بخاف عليها .نفسى تغير فكرتها عنى انى متكبر او فى امراض نفسية.بس انا علشان مش بعرف اظهر مشاعرى ودا بيزعل ناس كتير منى بس والله حاولت بس مش عارف.نفسى اجابلها الدنيا كلهاهديه.واخيرا علشان اكون صريح
نفسى تعرف ان انا الى كنت بتصل بيها من رقم غير رقمى علشان اسمع صوتها.ههههه والغريب اننا احنا الاتنين بنسكت ههههه.نفسى انام واصحى والاقيها نايمه جانبى فى بيتنا.وافضل ابصلها وهى نايمه واقولها معلش انا ماكنتش بقولك كلام حلو علشان كنت بتكسف منك.دلوقتى ماليش عذر .معلش لو زعلتك منى معلش لو ضايقتك من غير ماقصد. معلش لما كنت بحس فى نظراتك كلام كتير واعجز عن الرد. اول مره احس انا بكتب وانا مبسوط قوووىى وعايز اضحك قوووى من كتر منا مبسوط..