فاضل بتاع ساعتين كده و 2009 تخلص
آخر حاجة أكتبها السنة دي
مش عارفة أوصفها
غير انها كانت أسعد سنة عدت عليا في حياتي
حققت فيها حاجات كتير
و اكتشفت فيها حاجات أكتر
1
اصدقائي
اتعرفت على ناس من أحسن ما يكون في الدنيا
اتقربت من ناس و ناس اتقربت مني
بقا ليا خوات و أصحاب و ناس تقدر بجد تعتمد عليها
و ما تخافش على نفسك طول ما هم موجودين حواليك
بجد بحس انهم عيلتي
2
شغلي
اتعلمت حاجات كتير جدا
اشتغلت في حاجات كتير
عرفت إني جوايا قدرات قيادية مدفونة
و إني بتعلم بسرعة و بسهولة ما شاء الله
ساعدت ناس كتير
كونت علاقات ممتازة
نميت نفسي و إديتها حقها و قدرت قدراتي
3
مواهبي
اكتشفت اني بعرف أكتب حلو جدا و الحمد لله
و نميت الموضوع ده و حستمر في تنميته
رجعت أرسم تاني
استمريت في شغل الجرافيكس
اتعلمت التصوير
عرفت طبخات زيادة
عملت البلوج ده
4
تجربتي
كانت كوميديا بجد
جربت حاجات عمري ما كنت مفكرة أجربها
ركبت الميكروباص و الباص العام الأزرق
ركبت الباص الأحمر أكتر من مرة جميـــل قوي
و ركبت حاجات تانية بصراحة مش عارفة أساميها
ناقص أجرب القطر :)
كلت في أماكن غريبة زي حودة جندل
سافرت مع صحابي في رحلات حلوة
حضرت حفلات تجنن و ندوات مفيدة
جتلي هدايا في عيد ميلادي من صحابي
بصراحة طول عمري كنت بحتفل بيه في البيت
عمري ما حد احتفلي بيه غير أهلي
سافرت لوحدي بره و جوه البلد
و عملت حاجات مجنونة كتير
5
نفسي
ساعات مش بتبقى عارف نفسك
و الأيام بتعلمك انت مين
ده اللي حصل معايا
في السنة دي اكتشفت صفات كتير فيا كانت مكسوفة تبان تقريبا
اكتشفت اني مجنونة شوية
مش مجنونة خبلان يعني
بس بحب أجرب و أهبل و أبسط نفسي و اللي حواليا
اكتشفت ان محدش له عندي حاجة
اكتشفت ان من حقي أعمل و اقول اللي عايزاه
اكتشفت قد ايه أنا جوايا حاجات كويسة
اتطمنت على نفسي في حاجات كتير
عرفت إزاي أتعامل مع غيري بشكل كويس
اتعلمت ما أعملش حواجز بيني و بين الناس
عرفت إزاي أتجنب مشكلة قبل ما تحصل
و عرفت إزاي أحل المشكلة لوحدي إذا حصلت
أدركت إني الحمد لله انسانة قوية يعتمد عليها
عرفت إن الشفافية و الصدق مع الذات و الغير هو الحل دايما
6
أهلي
عملت على نفسي عهد إني أخلي مامتي مبسوطة بيا طول حياتها إن شاء الله
قربت من ماما و خواتي أكتر
رفعت راس مامتي و خليتها فخورة بيا
سامحت بابا على حاجات كتير
و اتعلمت انك بترتاح لما تسامح
يمكن عيلتي و مشاكلها مكعبلة جدا
لكن الحمد لله توصلت إلى حقيقة ان العيلة بتفضل عيلة مهما حصل
7
قلبي
يمكن النقطة دي هي اللي كانت الاقل حظا في السنة دي
بس مش معناها اني ما اتعلمتش حاجة
اتعلمت ان ما ينفعش تحب حد شفقة عليه
اتعلمت ان الحب رزق من ربنا
عرفت ان كل واحد بيجيله نصيبه فجأة
عرفت ان فيه شخصيات ما ينفعش تقرب منها
أدركت ان لما حد بيبقا شاريك بيشتريك كلك على بعضك مش أجزاء منك
قررت إني أفتح قلبي بعد ما قفلته طول حياتي
صحيح قرار متأخر بس الحياة لسه قدامي
8
دراستي
الحمد لله كانت سنة موفقة
بسلاطتها ببابا غنوجها
جبت ترتيب لأول مرة في حياتي
التالتة على الدفعة بالمجموع التراكمي
و التانية بمجموع التيرم اللي فات
اتبسطت جدا و اتعلمت أذاكر إزاي
عرفت مجالات كتير
و اتعلمت أكتر و قريت و دورت و جربت حاجات في مجال دراستي
اممممممم
ده ملخص 2009 بالنسبة ليا
فيه مليون حاجة تانية حصلت بس بوست واحد ما يكفيش عشان أحكي عنها
الحمد لله كانت سنة جميلة
و ان شاء الله الجاي حيبقى أحلى
كل سنة و إنتم طيبين
و أنا كمان
ردحذفD:
ردحذف