الكره

كنا النهاردة في المكتبة و واحد من صحابي بيهزر بيقول

" لو بتحب واحدة اتجوزها و لو قالت لأ اتجوز اختها و غيظها " 

اتدخل في الكلام دكتور عندي في الكلية كان حاضر الندوة

و معرفش فجأة الكلام إنتقل عن معنى الحب

يعني ايه حب و إزاي بيقلب على كره و ليه ما بنحبش في مرحلة من المراحل

رأيي الشخصي ,

إن اللي بيحب فعلا ما بيعرفش يكره

ممكن ينسى إنه حب

ممكن يتجرح لدرجة إن يقرر يداري حبه

لكن مش ممكن يكره

بالنسبة ليا

اتعملت فيا عمايل سودة في حياتي

بس أكدب لو قلت إني بكره حد من اللي آذوني

معرفش هل ده أنا بس اللي كده

و لا القلب اللي بيحب فعلا صعب يكره ؟؟

أنا عن نفسي عمري ما حسيت إني بكره حد

ساعات صحابي يقولولي أصلك هبلة و على نياتك

مش عارفة

أنا مش عارفة احساس الكره ده بيتوصف إزاي

أعرف لما تبقى قرفان من حد بيبقى احساسك إزاي

لما تبقى متوتر من حد

لما تبقى مش مرتاح

بس لما تكره دي أنا بصراحة مش عارفة إيه ترجمتها

فيه جملة سمعتها مرة زمان في و لزقت في دماغي من 

Desprate Housewives

 "The opposite of love isn't hate, it's indifference, and if you hate me, it means you still care."

لما تبطل تهتم باللي قدامك , لما ما يبقاش فارق معاك , ساعتها بس تعرف إنك بطلت تحبه

بس لما تكرهه بيفضل بينكم صلة معين حتى لو الصلة دي هي شعور سالب زي الكره

حاجات كتير ملخبطة جوايا

مش عارفة آخرتها إيه و مش عايزة ارجع أملى المدونة بكلام فاضي و أمسح فيه و أرجع للدوامة القديمة

عايزة اعرف راسي من رجلي

نفسي أفهم كمية اللخبطة اللي جوا دي

محتاجة كمية استقرار نفسي بشعة

عندي إحساس اللي ماشي على حبل و كل شوية حيقع منه و يلحق نفسه على آخر لحظة

كتير بقول لنفسي أنا السبب في كل ده و إني أستاهل اللي بيحصلي

و ساعات بصبر نفسي بإن ربنا لو أحب عبدا ابتلاه

مش عارفة حاجة خالص

نفسي ألاقي إجابات ل 700 سؤال اللي جوايا